ໃນຕອນບ່າຍວັນທີ 15ກຸມພາ 2024 ທ່ານ ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ,ຜູ້ຊີ້ນຳວຽກງານຂົງເຂດການປົກຄອງ ແລະ ວັດທະນະທຳ-ສັງຄົມ ພ້ອມດ້ວຍຄະນະຕິດຕາມຈາກ ຫ້ອງວ່າການສໍານັກງານນາຍົກລັດຖະມົນຕີ ໄດ້ເຄື່ອນໄຫວຢ້ຽມຢາມພື້ນຖານການຜະລິດ ຢູ່ເມືອງຊຳເໜືອ, ແຂວງຫົວພັນ ໂດຍມີທ່ານ ພຸດພັນ ແກ້ວວົງໄຊ, ຮອງເຈົ້າແຂວງຫົວພັນ, ພ້ອມດ້ວຍຄະນະນຳຂອງແຂວງ, ພະແນກການ, ເມືອງຊຳເໜືອ ແລະ ຕາງໜ້າພາກສ່ວນກ່ຽວຂ້ອງ ໃຫ້ກຽດຕ້ອນຮັບ ແລະ ເຂົ້າຮ່ວມການເຄື່ອນໄຫວ.
ໃນໂອກາດດັ່ງກ່າວ, ຄະນະຂອງທ່ານຮອງນາຍົກລັດຖະມົນຕີ ໄດ້ໄປຢ້ຽມຢາມສູນສົ່ງເສີມເຕັກນິກກະສິກຳ ແລະ ປ່າໄມ້ ຮ່ວມມືລາວ-ຫວຽດນາມ ທີ່ບ້ານອົ້ງ, ເມືອງຊຳເໜືອ,ເຊິ່ງສູນດັ່ງກ່າວ ເລີ່ມກໍ່ສ້າງໃນປີ 2017 ສໍາເລັດໃນປີ 2018 ແລະ ເລີ່ມນໍາໃຊ້ໃນປີ 2019 ເປັນສູນທົດລອງແນວພັນ, ເຕັກນິກ, ວິທີການຜະລິດກະສິກຳ ທີ່ໃຫ້ສຳຫຼວດ, ສຶກສາ, ເຕົ້າໂຮມຄັດເລືອກ, ບໍລິການທາງດ້ານແນວພັນພືດ ແລະ ແນວພັນສັດ,ຊຸກຍູ້,ສົ່ງເສີມ, ຖ່າຍທອດເຕັກນິກ-ເຕັກໂນໂລຊີກ່ຽວກັບການປູກ-ການລ້ຽງ ແລະ ການປຸງແຕ່ງ; ເກັບກໍາ, ສັງລວມ,ເຜີຍແຜ່ ແລະ ບໍລິການຂໍ້ມູນຂ່າວສານ ການທົດລອງຂອງຕົນ ໃຫ້ແກ່ປະຊາຊົນ ແລະ ກຸ່ມການຜະລິດ ຢູ່ແຂວງຫົວພັນ ປະກອບສ່ວນໃນການພັດທະນາກະສິກຳ ຂອງແຂວງ, ປະສານສົມທົບສົມທົບກັບບັນດາຂະແໜງການທີ່ກ່ຽວຂ້ອງ, ຫ້ອງການກະສິກຳ ແລະ ປ່າໄມ້ປະຈຳເມືອງ, ສະຖານີເຕັກນິກຂອງເມືອງ ແລະ ພາກສ່ວນເສດຖະກິດຕ່າງໆ ເພື່ອຜັນຂະຫຍາຍຜົນສໍາເລັດຂອງການທົດລອງ ອອກສູ່ສັງຄົມຢ່າງກວ້າງຂວາງ;ຈັດຝຶກອົບຮົມທັງຢູ່ພາຍໃນ ແລະ ພາຍນອກສູນ ກ່ຽວກັບທັກສະກະສິກຳແບບໃໝ່, ເຕັກໂນໂລຊີ ການປູກ-ການລ້ຽງ ແລະ ທັງເປັນບ່ອນສາທິດ ໃຫ້ວິຊາການຂັ້ນເມືອງ, ຊາວກະສິກອນ, ຜູ້ປະກອບການ, ນັກສຶກສາ ແລະ ສັງຄົມ.
ທ່ານ ແອຊໍາ, ຫົວໜ້າສູນສູນສົ່ງເສີມເຕັກນິກກະສິກຳ ແລະ ປ່າໄມ້ ຮ່ວມມືລາວ-ຫວຽດນາມ ໄດ້ລາຍງານຫຍໍ້ກ່ຽວກັບການເຄື່ອນໄຫວຂອງສູນວ່າ: ສູນດັ່ງກ່າວມີ 6ກິດຈະກໍາຫຼັກ ຄື: 1.) ກິດຈະກໍາລ້ຽງເປັດ, ໄກ່;2.) ກິດຈະກໍາປູກໄມ້ໃຫ້ໝາກ ແລະ ສວນກ້າ; 3.) ກິດຈະກໍາປູກພືດຜັກອິນຊີ; 4.) ກິດຈະກໍາລ້ຽງປາໃນໜອງ; 5.)ກິດຈະກໍາລ້ຽງໝູ ແລະ 6.) ກິດຈະກໍາລ້ຽງແບ້ ເຊິ່ງການຈັດຕັ້ງປະຕິບັດວຽກງານໄລຍະຜ່ານມາມີທັງຜົນສໍາເລັດທີ່ພົ້ນເດັ່ນ, ຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີຈໍານວນໜຶ່ງ. ຫຼັງຈາກນັ້ນໄດ້ນໍາພາຄະນະຢ້ຽມຊົມສະຖານທີ່ຕົວຈິງເຊິ່ງນເວລາດຽວກັນ ທ່ານຮອງນາຍົກລັດຖະມົນຕີ ກໍໄດ້ມີທິດຊີ້ນໍາຄື: (1). ໃຫ້ທາງສູນສືບຕໍ່ການຮ່ວມມື ແລະ ຍາດແຍ່ງເອົາການຊ່ວຍເຫຼືອທາງດ້ານເຕັກນິກວິຊາການຈາກເພື່ອນມິດໃຫ້ຫຼາຍຂຶ້ນກວ່າເກົ່າ, ພ້ອມດຽວກັນ ກໍໃຫ້ໄປແລກປ່ຽນບົດຮຽນວຽກງານດັ່ງກ່າວ ກັບສູນອື່ນໆຢູ່ບັນດາແຂວງຕື່ມ; 2.) ສໍາລັບແນວພັນໝູ, ແບ້ ກໍໃຫ້ນໍາເອົາແນວພັນຈາກແຂວງອື່ນໆມາປະສົມປະສານຕື່ມ ເພື່ອໃຫ້ມີຄວາມຫຼາກຫຼາຍ ໂດຍສະເພາະ ແນວພັນໝູໄຊຍະບູລີ, ສະຫວັນນະເຂດ ແລະ ອື່ນໆ; 3.) ໃຫ້ພະແນກກະສິກໍາ ແລະ ປ່າໄມ້ແຂວງ ຊ່ວຍເຫຼືອສູນດັ່ງກ່າວໃນການເຂົ້າເຖິງແຫຼ່ງທຶນຕ່າງໆອີກ.
ຫຼັງຈາກນັ້ນ, ຄະນະ ໄດ້ໄປຢ້ຽມຢາມໂຄງການກໍ່ສ້າງໂຮງໝໍມິດຕະພາບລາວ-ຫວຽດນາມທີ່ບ້ານມີສຸກ, ເມືອງຊຳເໜືອ, ແຂວງຫົວພັນ ເຊິ່ງໂຄງການດັ່ງກ່າວ ໄດ້ຮັບທຶນຊ່ວຍເຫຼືອຈາກລັດຖະບານ ແລະ ແຂວງແທັງຮ່ວາ ສສ. ຫວຽດນາມ ມູນຄ່າທັງໝົດ 518, 466 ຕື້ດົ້ງ, ໃນນີ້ທຶນສົມທົບ ຂອງລັດຖະບານລາວ ມີ 1,77 ຕື້ກີບ,ໂຄງການໄດ້ເລີ່ມລົງມືກໍ່ສ້າງໃນວັນທີ 26 ມິຖຸນາ 2018, ມາຮອດປັດຈຸບັນໄດ້ກໍ່ສ້າງສຳເລັດແລ້ວ75 ສ່ວນຮ້ອຍ, ຕຶກອາຄານ ປະກອບມີ 9 ຊັ້ນ. ໂອກາດນີ້ ທ່ານຮອງນາຍົກລັດຖະມົນຕີ ໄດ້ມີທິດຊີ້ນໍາໃຫ້ແຂວງ ກໍຄືພາກສ່ວນຮັບຜິດຊອບຂອງແຂວງ ເອົາໃຈໃສ່ຊຸກຍູ້, ສືບຕໍ່ຈັດຕັ້ງປະຕິບັດໂຄງການ ຕາມຄໍາເຫັນຊີ້ນໍາຂອງຂັ້ນເທິງໄລຍະຜ່ານມາ ໃຫ້ສໍາເລັດຕາມຄາດໝາຍທີ່ວາງໄວ້ ແລະ ສາມາດເປີດນໍາໃຊ້ໂດຍໄວ.
ຂ່າວ ແລະ ພາບ: ກົມປະຊາສຳພັນ ຫສນຍ.
