ຕອນບ່າຍຂອງວັນທີ 5 ມິຖຸນາ 2020 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແລະ ລັດຖະມົນຕີ ກະຊວງແຜນການ ແລະ ການລົງທຶນ ແຫ່ງ ສ ປປ ລາວ ພ້ອມດ້ວຍຄະນະນຳ ໄດ້ມາເຄື່ອນໄຫວຢ້ຽມຍາມ ແລະ ເຮັດວຽກຢູ່ເມືອງຫົງສາ ແຂວງໄຊຍະບູລີ, ເຊິ່ງໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ ເຈົ້າແຂວງ ແຂວງໄຊຍະບູລີ ພ້ອມດ້ວຍຄະນຳຂອງແຂວງ, ຄະນະນຳເມືອງຫົງສາ, ຄະນະນຳໂຄງການໄຟຟ້າພະລັງງານຄວາມຮ້ອນຫົງສາ ແລະ ນ້ອງນ້ອຍເຍົາວະຊົນເຂົ້າຮ່ວມຕ້ອນຮັບຢ່າງອົບອຸ່ນ. ໃນໂອກາດນີ້, ທາງຄະນະກໍ່ໄດ້ເດີນທາງເຂົ້າໄປຢ້ຽມຢາມການປະຕິບັດງານຂອງໂຄງການໄຟຟ້າພະລັງງານຄວາມຮ້ອນຫົງສາ ທີ່ພາກສະໜາມ (ບ່ອນປະຕິບັດວຽກງານຕົວຈິງ) ພ້ອມນີ້, ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ແລະ ວິຊາການໂຄງການດັ່ງກ່າວ ກໍ່ໄດ້ອະທິບາຍເຖິງການດໍາເນີນງານຂອງໂຄງການໄຟຟ້າຫົງສາໃນປັດຈຸບັນ ຕະຫຼອດເຖິງອຸປະສັກ ແລະ ຂໍ້ຫຍຸ້ງຍາກຕ່າງໆ ຂອງໂຮງໄຟຟ້າພະລັງງານຄວາມຮ້ອນຫົງສາ ໃນຊ່ວງຂອງສະຖານະການ ການແຜ່ລະບາດຂອງພະຍາດ COVID-19 ແລະ ມາດຕະການປ້ອງກັນ, ຄວບຄຸມ ການແຜ່ລະບາດຂອງພະຍາດ COVID-19 ທີ່ທາງຄະນະສະເພາະກິດຂອງ ບໍລິສັດ ໄຟຟ້າ ຫົງສາ ຈໍາກັດ ໄດ້ກໍານົດຂຶ້ນ. ເພື່ອໃຫ້ພະນັກງານພາຍໃນໂຄງການໄຟຟ້າພະລັງງານຄວາມຮ້ອນຫົງສາທຸກຄົນໄດ້ຍຶດຖື ແລະ ປະຕິບັດຕາມຢ່າງເຄັ່ງຄັດ. ຫຼັງຈາກນັ້ນ, ທາງຄະນະກໍ່ໄດ້ເດີນທາງກັບສູ່ນະຄອນຫຼວງວຽງຈັນດ້ວຍຄວາມສະຫວັດດີພາບ.

 

ພາບ-ຂ່າວ: ກິດຕິສັກ ບົວໄລ (ນັກຂ່າວເມືອງຫົງສາ).

Loading...