ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນລະຫວ່າງວັນທີ 6 ຫາ 8 ພຶດສະພາ 2024 ທ່ານ ຄໍາມ່ວນ ຊົມສີຫາປັນຍາ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ເຄື່ອນໄຫວເຮັດວຽກ ຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດໂຄງການເຊົ່າ ແລະ ສໍາປະທານທີ່ດິນຂອງບັນດາໂຄງການພັດທະນາແຮ່ທາດ ແລະ ເຂື່ອນໄຟຟ້າ ຢູ່ພາຍໃນແຂວງ ອັດຕະປື, ເຊິ່ງໄດ້ຈັດກອງປະຊຸມຂື້ນທີ່ຫ້ອງປະຊຸມສະພາປະຊາຊົນແຂວງ ໂດຍການເຂົ້າຮ່ວມຂອງທ່ານ ນາງ ມີນາພອນ ໄຊສົມພູ ປະທານສະພາປະຊາຊົນແຂວງ ອັດຕະປື, ມີບັນດາຄະນະກໍາມະການ, ຄະນະເລຂາທິການ, ຕາງໜ້າຈາກພະແນກການທີ່ກ່ຽວຂ້ອງເຂົ້າຮ່ວມ.
ໂອກາດນີ້, ໄດ້ຮັບຟັງການລາຍງານຈາກບັນດາພະແນກການເປັນຕົ້ນ: ສະພາບການຈັດຕັ້ງປະຕິບັດວຽກງານການລົງທຶນດ້ານພະລັງງານໄຟຟ້າ ແລະ ແຮ່ທາດ, ການຫັນປ່ຽນທີ່ດີນປ່າໄມ້, ການຟື້ນຟູປ່າ ແລະ ປູກປ່າທົນແທນຄືນພື້ນທີ່ປ່າໄມ້ທໍາມະຊາດ, ການເຊົ່າສໍາປະທານທີ່ດິນ ແລະ ຂື້ນທະບຽບອອກໃບຕາດິນ, ຜົນກະທົບຕໍ່ສິ່ງແວດລ້ອມ, ການຟື້ນຟູຊີວິດການເປັນຢູ່, ການຊົດເຊີຍຜົນກະທົບໃຫ້ແກ່ປະຊາຊົນ, ການນໍາເຂົ້າອຸປະກອນທີ່ຕິດພັນກັບການປຸງແຕ່ງແຮ່ທາດ, ການເກັບລາຍຮັບ ຈາກໂຄງການພັດທະນາໄຟຟ້າ ແລະ ໂຄງການຂຸດຄົ້ນບໍ່ແຮ່ປົກກະຕິ ແລະ ທົດລອງຂຸດຄົ້ນແຮ່ທາດ ແລະ ອື່ນໆ. ພ້ອມນີ້ຜູ້ເຂົ້າຮ່ວມ ໄດ້ປະກອບຄຳເຫັນສົນທະນາ ແລະ ແລກປ່ຽນບົດຮຽນ ເຊິ່ງລ້ວນແຕ່ມີເຫດມີຜົນ ບົນພື້ນຖານຄວາມຮັບຜິດຊອບຕໍ່ໜ້າທີ່ການເມືອງ ຕິດພັນກັບການເຄື່ອນໄຫວວຽກງານຕົວຈິງໃນທ້ອງຖິ່ນຂອງຕົນ ເພື່ອຮັບປະກັນຄວາມຖືກຕ້ອງຕາມກົດໝາຍ ແລະ ສອດຄ່ອງກັບຄວາມເປັນຈິງຂອງປະເທດກໍ່ຄືຂອງແຂວງ.
ໃນກອງປະຊຸມ ທ່ານ ຄໍາມ່ວນ ຊົມສີຫາປັນຍາ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມສະພາແຫ່ງຊາດ ໄດ້ມີຄໍາເຫັນ ໂດຍໃຫ້ບັນດາພະແນກການ ເອົາໃຈໃສ່ຄຸ້ມຄອງ ການຊອກຄົ້ນ, ສໍາຫຼວດ ແລະ ຂຸດຄົ້ນແຮ່ທາດ ພາຍໃນແຂວງ ໃຫ້ມີປະສິດທິພາບ, ປະສິດທິຜົນ, ຍືນຍົງ, ປະຢັດ, ນໍາເອົາຜົນປະໂຫຍດສູງສຸດ ມາສູ່ປະເທດຊາດ ແລະ ບໍ່ໃຫ້ສົ່ງຜົນກະທົບຕໍ່ສິ່ງແວດລ້ອມສັງຄົມ ແລະ ທໍາມະຊາດ ເກີນກວ່າແຜນກໍານົດໄວ້, ຮີບຮ້ອນປະເມີນຜົນການຈັດປະຕິບັດໂຄງການຊອກຄົ້ນ, ສຳຫຼວດ, ຂຸດຄົ້ນ ແລະ ປຸງແຕ່ງແຮ່ທາດ ໂດຍສະເພາະ ໂຄງການຂຸດຄົ້ນແຮ່ທາດແບບທົດລອງ ທີ່ພວມຈັດຕັ້ງປະຕິບັດຢູ່ພາຍໃນແຂວງວ່າ ມີຜົນໄດ້ ຜົນເສຍ ຄືແນວໃດ ແລະ ມີມາດຕະການຢ່າງເຂັ້ມງວດ ຕໍ່ໂຄງການທີ່ບໍ່ມີປະສິດທິພາບປະສິດທິຜົນ, ໂຄງການບໍ່ທີ່ປະຕິບັດຕາມສັນຍາ ແລະ ກົດໝາຍ, ການຄົ້ນຄວ້າອະນຸມັດໂຄງການຂຸດຄົ້ນບໍ່ແຮ່ ໃນຕໍ່ໜ້າ ທີ່ຢູ່ໃນຄວາມຮັບຜິດຊອບ ຕາມຂອບເຂດສິດຂອງຕົນນັ້ນ ຕ້ອງໃຫ້ສອດຄ່ອງຕາມຍຸດທະສາດການພັດທະນາແຮ່ທາດ ທີ່ສະພາແຫ່ງຊາດໄດ້ຮັບຮອງ, ເອົາໃຈໃສ່ໃນການຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດວຽກງານການຊົດເຊີຍ, ປັບປຸງຊີວິການເປັນຢູ່ຂອງປະຊາຊົນ ແລະ ຮັບປະກັນບໍ່ໃຫ້ມີບັນຫາການຕົກຫຼົ່ນ ຫຼື ການຮ້ອງຟ້ອງ ຮ້ອງຂໍຄວາມເປັນທຳ ໃນອະນາຄົດ, ພ້ອມທັງ ເອົາໃຈໃສ່ຢ່າງໃກ້ສິດ ໃນການຕິດຕາມ ການຟື້ນຟູ ຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບຈາກໂຄງການ ເຮັດແນວໃດເພື່ອຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂື້ນກວ່າເກົ່າ.
ຂ່າວ: ວິນັດ ສີສຸລາດ ຂ.ອັດຕະປື