ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຮອງປະທານປະເທດພົບປະໂອ້ລົມພະນັກງານຫຼັກແຫຼ່ງແຂວງຫຼວງພະບາງ
ຕອນບ່າຍວັນທີ່ 21 ມິຖຸນາ 2024 ນີ້ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະ ເລຂາທິການສູນກາງພັກ, ຮອງປະທານປະເທດ ໄດ້ພົບປະໂອ້ລົມພະນັກງານຫຼັກແຫຼ່ງແຂວງຫຼວງພະບາງ ຢູ່ສະໂມສອນໃຫຍ່ຫ້ອງວ່າການແຂວງ.
ທ່ານ ຄຳຂັນ ຈັນທະວີສຸກ ກຳມະການສູນກາງພັກ, ເຈົ້າແຂວງຫຼວງພະບາງ, ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງ, ຕິດພັນກັບການຈັດຕັ້ງປະຕິບັດວຽກງານກະກຽມ ແລະດຳເນີນກອງປະຊຸມໃຫຍ່ 3 ຂັ້ນ ວ່າ: ເສດຖະ ກິດຂອງແຂວງຫລວງພະບາງ ສືບຕໍ່ຂະຫຍາຍຕົວຢ່າງຕໍ່ເນື່ອງບັນລຸ 5,1 % ຕໍ່ປີ, ລວມຍອດຜະລິດຕະພັນພາຍໃນບັນລຸລື່ນແຜນ 0,93%, ສະເລ່ຍໃສ່ຫົວຄົນໜຶ່ງໄດ້ 33 ລ້ານກວ່າກີບ, ລື່ນແຜນ 0,95%, ໄດ້ຊຸກຍູ້ບັນດາພະແນກການທີ່ມີລາຍຮັບ ໂດຍສະເພາະແມ່ນຂົງເຂດເສດຖະກິດໃນການຈັດຕັ້ງປະຕິບັດ ແຜນງົບປະມານລາຍຮັບ-ລາຍຈ່າຍຂອງແຂວງ, ໄດ້ເອົາໃຈໃສ່ປັບປຸງກົນໄກໃນການເກັບລາຍຮັບ, ຄຸ້ມ ຄອງລາຍຈ່າຍ, ຫັນເປັນລະບົບທັນສະໄໝເທື່ອລະກ້າວ, ໄດ້ສໍາເລັດການດໍາເນີນກອງປະຊຸມໃຫຍ່ ຮາກຖານພັກບ້ານ ແລະຮາກຖານພັກສໍານັກງານ-ອົງການອ້ອມຂ້າງເມືອງ-ນະຄອນ ຈໍານວນ 1.055 ຮາກຖານ ກວມເອົາ 67,19% ຂອງຮາກຖານພັກທັງໝົດໃນທົ່ວແຂວງ.
ປັດຈຸບັນພວມສືບຕໍ່ດໍາເນີນກອງປະຊຸມໜ່ວຍພັກຂັ້ນສໍານັກງານ ອ້ອມຂ້າງເມືອງ-ນະຄອນ, ທັງໄດ້ກຳນົດແຜນດໍາເນີນກອງປະຊຸມໃຫຍ່ ແຕ່ລະຂັ້ນ ຈົນຮອດການດໍາເນີນກອງປະຊຸມໃຫຍ່ ຄັ້ງທີ IX ອົງຄະນະພັກແຂວງ ໃນເດືອນກັນຍາປີ 2025. ຈາກນັ້ນ ຄະນະນຳຈາກສູນກາງໄດ້ມີຄຳເຫັນຊີ້ນຳວຽກງານບາງດ້ານ ຕໍ່ອົງ ຄະນະພັກແຂວງຫຼວງພະບາງ ເພື່ອສຸມໃສ່ການແກ້ໄຂບັນຫາຄົງຄ້າງ ແຕ່ນີ້ຈົນຮອດການດຳເນີນກອງປະຊຸມໃຫຍ່ຂອງອົງຄະນະພັກແຂວງ, ຕອນທ້າຍ ທ່ານ ບຸນທອງ ຈິດມະນີ ໄດ້ເນັ້ນໃຫ້ອົງການປົກຄອງແຂວງ ສືບຕໍ່ໃນການເຮັດວຽກງານການເມືອງແນວຄິດ ເພື່ອເຮັດໃຫ້ພະນັກງານ-ສະມາຊິກພັກ ແລະປະຊາຊົນບັນດາເຜົ່າ ມີຄວາມເຊື່ອໝັ້ນຕໍ່ການນຳພາຂອງພັກ-ລັດ ໂດຍສະເພາະໃນໄລຍະທີ່ພາກພື້ນ-ສາກົນ ລວມທັງພາຍໃນປະເທດ ມີຄວາມຫຍຸ້ງຍາກ ແລະສີ່ງທ້າທາຍຫຼາຍດ້ານ, ທັງປຸກລະດົມໃຫ້ທຸກພາກສ່ວນພ້ອມກັນປະກອບສ່ວນ ການພັດທະນາເສດຖະກິດຕາມທ່າແຮງ ເພື່ອເຮັດໃຫ້ແຕ່ລະທ້ອງຖີ່ນໄດ້ຮັບການພັດທະນາດີຂື້ນ, ໂດຍສະເພາະແມ່ນການສືບຕໍ່ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະວາລະແຫ່ງຊາດຄວາມຫຍຸ້ງຍາກທາງດ້ານເສດຖະກິດ-ການເງີນ, ຕິດພັນກັບຂະບວນການວຽກງານ 3 ສ້າງ, ລວມທັງການປະຕິບັດຂໍ້ແຂ່ງຂັນຮັກຊາດ ແລະພັດ ທະນາໃຫ້ແຂງແຮງກວ່າເກົ່າ.
ພາຍຫຼັງສຳເລັດການໂອ້ລົມ ທ່ານ ບຸນທອງ ຈິດມະນີ ຮອງປະທານປະເທດ ພ້ອມດ້ວຍການນຳຈາກສູນກາງ ແລະແຂວງຫຼວງພະບາງ ໄດ້ໄປຮ່ວມການປູກຕົ້ນໄມ້ໄວ້ເປັນທີ່ລະນຶກ ຢູ່ມະຫາວິທະຍາໄລສຸພານຸວົງ ຕື່ມອີກ.
ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ