ໃນຕອນບ່າຍຂອງ ວັນທີ 22 ກັນຍາ 2022ນີ້, ທ່ານ ນາງ ປານີ ຍາທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ເຄື່ອນໄຫວຢ້ຽມຢາມພື້ນຖານການຜະລິດ ຢູ່ແຂວງຈໍາປາສັກ ໂດຍການພາທາງຂອງ ທ່ານ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ. ມີການນໍາຈາກສໍານັກງານປະທານປະເທດ,ການນຳຈາກກະຊວງ.ຮອງເລຂາພັກແຂວງ, ຄະນະປະຈໍາພັກແຂວງ, ການນໍາພະແນກການກົມກອງທີ່ກ່ຽວຂ້ອງຂອງແຂວງ, ການນໍາເມືອງປາກຊ່ອງ, ການນໍາເມືອງບາຈຽງຈະເລີນສຸກ, ບັນດາຫົວໜ່ວຍພື້ນຖານການຜະລິດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ຈຸດປະສົ່ງໃນການມາເຄື່ອນໄຫວຢູ່ແຂວງຈຳປາສັກໃນຄັ້ງນີ້ແມ່ນເພື່ອເປັນການຢ້ຽມຢາມ,ຕິດຕາມ ແລະ ຊຸກຍູ້ໃຫ້ກຳລັງໃຈແກ່ປະຊາຊົນຜູ້ປະກອບການ ການຜະລິດໃຫ້ມີການຂະຫຍາຍຕົວ ແລະ ພັດທະນາກ້າວຂຶ້ນ,ຕອບສະໜອງການບໍລິໂພກ ແລະສົ່ງອອກ,ປັບປຸງຂອດການຜະລິດຫັນໄປສູ່ທັນສະໄໝກະສິກຳສະ ອາດ ແລະ ຂະຫຍາຍຕະຫຼາດພາຍໃນ ແລະ ຕ່າງປະເທດຢ່າງກ້ວາງຂວາງ.
ໃນການຢ້ຽມຢາມພື້ນຖານການຜະລິດຢູ່ເມືອງປາກຊ່ອງ ແຂວງຈຳປາສັກຄັ້ງນີ້ ແມ່ນໄດ້ໄປສວນກາເຟຂອງບໍລິສັດສົມໄຊຈະເລີນສົ່ງເສີມການກະເສດຈຳກັດຜູ້ດຽວ,ສວນຂອງບໍລິສັດອາໂກຣເຕັກ ໂປຼລາວ ຈຳກັດ (ປະເທດມາເລເຊຍ) ແລະ ຢ້ຽມຢາມບໍລິສັດ ກາເຟດາວ ຈໍາກັດ ຢູ່ຫຼັກ 20 ເມືອງບາຈຽງຈະເສີນສຸກ.ເຊິ່ງຢູ່ແຕ່ລະຈຸດແມ່ນໄດ້ຮັບການຕ້ອນຮັບຈາກທາງບໍລິສັດແຕ່ລະແຫ່ງຢ່າງອົບອຸ່ນ ພ້ອມທັງຮັບຟັງການລາຍງານສະພາບການດຳເນີນທຸລະກິດໂດຍຫຍໍ້ໃຫ້ທ່ານຮອງປະທານປະເທດໄດ້ຮັບຊາບ ຂໍ້ສະ ດວກ, ຂໍ້ຫຍຸ້ງຍາກ ແລະ ທິດທາງແຜນການພັດທະນາ ໃນຕໍ່ໜ້າອີກດ້ວຍ.
ຂ່າວ;ພາບ: ມຸກດາວັນ ວິທະຍຸ -ໂທລະພາບແຂວງຈຳປາສັກ
