ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮອງປະທານປະເທດເນັ້ນໃຫ້ຄະນະໂຄສະນາອົບຮົມເອົາໃຈໃສ່ 5 ເນື້ອໃນ ໃນການເຄື່ອນໄຫວກິດຈະກໍາຂອງຕົນ

ໃນໂອກາດໂອ້ລົມຕໍ່ກອງປະຊຸມຄະນະໂຄສະນາອົບຮົມທົ່ວປະເທດປະຈໍາປີ 2019 ທີ່ຈັດຂຶ້ນໃນວັນທີ 13 ກຸມພາ 2020 ທີ່ຫ້ອງປະຊຸມໃຫ່ຍຄະນະໂຄສະນາອົບຮົມສູນກາງພັກ, ນະຄອນຫຼວງວຽງຈັນ, ທ່ານພັນຄໍາ ວິພາວັນ, ຮອງປະທານປະເທດ ໄດ້ເນັ້ນໃຫ້ບັນດາຜູ້ແທນແຕ່ລະພາກສ່ວນຂອງອົງການພັກ ແລະ ລັດຕ່າງໆ ຈົ່ງເອົາໃຈໃສ່ 5 ບັນຫາສໍາຄັນ ຈາກທັງໝົດບັນດາວຽກງານທີ່ນອນໃນພາລະບົດບາດທີ່ໄດ້ຮັບມອບໝາຍ ໃນໂອກາດການກະກຽມກອງປະຊຸມໃຫຍ່ ຄັ້ງທີ 11 ຂອງພັກ ກໍ່ຄື ການສະເຫຼີມສະຫຼອງວັນປະຫວັດສາດສໍາຄັນຕ່າງໆຂອງພັກ-ລັດ. ນອກນີ້, ໃນການເຄື່ອນໄຫວຂົງເຂດການເມືອງ-ແນວຄິດ ຫຼື ວຽກໂຄສະນາອົບຮົມ ກໍ່ຄວນກໍານົດທິດ, ເນື້ອໃນ ແລະ ກິດຈະກໍາເຄື່ອນໄຫວອັນຈໍາເປັນ ດັ່ງນີ້: 1). ການເຄື່ອນໄຫວຂອງຄະນະໂຄສະນາອົບຮົມແຕ່ລະຂັ້ນ ຕ້ອງປິ່ນອ້ອມການສ້າງການຫັນປ່ຽນອັນແຂງແຮງ, ເລິກເຊິ່ງແລະ ຮອບດ້ານ, ໂດຍສະເພາະ ແມ່ນໃນດ້ານຈິນຕະນາການ (ຜ່ານມາ ພວກເຮົາກໍ່ເວົ້າເຖິງ 4 ບຸກທະລຸ ແຕ່ຕົວຈິງແມ່ນຍັງບໍ່ທັນມີການຫັນປ່ຽນພໍເທົ່າໃດ). ຖ້າບໍ່ມີຄວາມຮັບຮູ້ເຂົ້າໃຈ ຫຼື ຕື່ນຕົວແທ້, ບັນຫາທີ່ຕັ້ງຂຶ້ນໃນກອງປະຊຸມໃຫຍ່ 3 ຂັ້ນ ກໍ່ຄື ກອງປະຊຸມໃຫຍ່ຄັ້ງທີ 11 ບໍ່ວ່າຈະເປັນເນື້ອໃນ, ບຸກຄະລາກອນ, ຫຼື ແຜນພັດທະນາ ກໍ່ຍາກຈະບັນລຸໄດ້. 2). ຕ້ອງສຸມໃສ່ໂຄສະນາ, ສຶກສາອົບຮົມຕ້ານ, ຕີຖອຍບັນດາປະກົດການຫຍໍ້ທໍ້ ຢູ່ພາຍໃນພັກ ແລະ ໃນສັງຄົມ, ຕິດພັນກັບການສ້າງສະຕິເຄົາລົບ, ປະຕິບັດລັດຖະທໍາມະນູນ, ກົດໝາຍ, ກົດລະບຽບພັກ… ພ້ອມກັນນັ້ນ, ກໍ່ຕ້ອງໂຕ້ຕອບຕໍ່ຖ້ອຍທໍານອງຂອງພວກຄົນບໍ່ດີ ທີ່ສວຍໃຊ້ບາງປະກົດການຫຍໍ້ທໍ້ ໂຄສະນາບິດເບືອນ, ໃສ່ຮ້າຍປ້າຍສີ, ໂຈມຕີຕໍ່ການນໍາພາຂອງພັກ, ຫວັງທໍາລາຍຄວາມເຊື່ອໝັ້ນຂອງປະຊາຊົນ ຕໍ່ພັກ ແລະ ລະບອບຂອງພວກເຮົາ. 3). ຄະນະໂຄສະນາອົບຮົມສູນກາງ ຮ່ວມກັບ ພາກສ່ວນອື່ນໆ ຄົ້ນຄວ້າທິດສະດີ ແລະ ພິຶດຕິກໍາ ຂອງພັກ, ຄົ້ນຄວ້າປະຫວັດການເຄື່ອນໄຫວຂອງບັນດາທ່ານຜູ້ນໍາ, ພ້ອມທັງ ເອົາໃຈໃສ່ເຜີຍແຜ່ອອກສູ່ສັງຄົມໃຫ້ກວ້າງຂວາງ, ປະກອບ ສ່ວນສົມກຽດເຂົ້າໃນການປັບປຸງຄວາມເຂັ້ມແຂງຂອງພັກໃນຂົງເຂດວຽກງານການເມືອງຂອງພັກ. 4). ປັບປຸງລະບົບກົງຈັກການຈັດຕັ້ງຂອງຄະນະໂຄສະນາອົບຮົມ ແຕ່ສູນກາງລົງເຖິງທ້ອງຖິ່ນ ໃຫ້ມີຄວາມໜັກແໜ້ນ, ເຂັ້ມແຂງ ສົມຄູ່ກັບ ພາລະບົດບາດ ແລະ ຄວາມສໍາຄັນ ຂອງວຽກງານນີ້; ເອົາໃຈໃສ່ສ້າງ-ຍົກລະດັບຖັນແຖວພະນັກງານ ທີ່ເຮັດວຽກງານໂຄສະນາອົບຮົມຂອງພັກ ຢ່າງເປັນລະບົບ ແລະ ຕໍ່ເນື່ອງ ດ້ວຍການສົມທົບສ້າງກັບວຽກງານຕົວຈິງ, ທັງສົ່ງໄປຮຽນຢູ່ພາຍໃນ ແລະ ຕ່າງປະເທດ, ໃນນີ້ ຖືສໍາຄັນການສ້າງໃຫ້ມີຖັນແຖວພະນັກງານວິຊາການທີ່ເກັ່ງ, ທີ່ຊໍານານງານດ້ານຕ່າງໆ ເປັນຕົ້ນ: ນັກຄົ້ນຄວ້າຂີດຂຽນເກັ່ງ, ນັກໂຄສະນາ-ປາຖະກະຖາເກັ່ງ. ພ້ອມນັ້ນ, ກໍ່ຕ້ອງປັບປຸງດ້ານເນື້ອໃນ, ຮູບການ, ວິທີການຂອງວຽກງານໂຄສະນາອົບຮົມ ໃຫ້ສອດຄ່ອງ, ຕິດແທດກັບສະພາບ ແລະ ຄວາມຮຽກຮ້ອງຕ້ອງການຕົວຈິງ ຂອງໜ້າທີ່ການເມືອງ, ແທດກັບແຕ່ລະເປົ້າໝາຍ, ມີຄຸນນະພາບ ແລະ ມີປະສິດທິຜົນສູງຂຶ້ນກວ່າເກົ່າ. 5). ປັບປຸງລະບົບກົນໄກປະສານງານ ລະຫວ່າງ ຄະນະໂຄສະນາອົບຮົມສູນກາງພັກ ກັບ ຄະນະພັກຂອງກະຊວງ-ອົງການຕ່າງໆ ຢູ່ສູນກາງ ແລະ ກັບຄະນະພັກ ກໍ່ຄື ຄະນະໂຄສະນາອົບຮົມຂັ້ນທ້ອງຖິ່ນ ໃຫ້ກົມກຽວ ແລະ ວ່ອງໄວ ເພື່ອກໍາສະພາບການຫັນປ່ຽນ ຂອງສະພາບການ ແລະ ດ້ານແນວຄິດຈິດຕະສາດ ຂອງພະນັກງານ, ສະມາຊິກພັກ ກໍ່ຄື ຂອງສັງຄົມ, ເອກະພາບດ້ານການເຄື່ອນໄຫວໂຄສະນາອົບຮົມ ແຕ່ເທິງລົງລຸ່ມ. ທັງໝົດນັ້ນ ແມ່ນເພື່ອເຮັດໃຫ້ການປະຕິບັດພາລະບົດບາດຂອງຄະນະໂຄສະນາອົບຮົມຂອງພັກ ຢູ່ຂັ້ນສູນກາງ ແລະ ທ້ອງຖິ່ນ ໄດ້ຮັບການເຊີດຊູສູງຂຶ້ນ, ເຮັດໃຫ້ວຽກງານໂຄສະນາອົບຮົມຂອງພັກ ຂະຫຍາຍຕົວສູ່ຄຸນນະພາບໃໝ່, ສາມາດເຮັດຫຼ້ອນໜ້າທີ່ການເມືອງໄລຍະໃໝ່ ທີ່ພັກມອບໝາຍໃຫ້.