ທ່ານ ນາງ ປານີ ຢາທໍ່ຕູ້ ກຳມະການກົມການເມືອງ ສູນກາງພັກ,ຮອງປະທານປະເທດ ແຫ່ງ ສປປ ລາວ ເດີນທາງຢ້ຽມຢາມ ຊຸກຍູ້ວຽກງານສະພາປະຊາຊົນຢູ່ແຂວງຈຳປາສັກ.ໃນຕອນບ່າຍ ວັນທີ 16 ມັງກອນ 2023
ພິທີຕ້ອນຮັບຈັດຂຶ້ນທີ່ສະພາປະຊາຊົນແຂວງຈໍາປາສັກ, ມີທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານສາຍທອງ ໄຊຍະວົງ, ປະທານສະພາປະຊາຊົນແຂວງ, ມີຄະນະພັກ – ອົງການປົກຄອງແຂວງ, ຄະນະນຳສະພາປະຊາຊົນແຂວງ, ສະມາຊິກສະພາແຫ່ງຊາດເຂດເລືອກຕັງທີ 15 ,ສະມາຊິກສະພາປະຊາຊົນແຂວງ, ພະແນກການກົມກອງ, ການນຳຂົງເຂດຍຸຕິທຳ ແລະ ອົງການປົກປ້ອງປະຕິບັດກົດໝາຍ, ພະນັກງານກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ຮອງປະທານປະເທດ ໄດ້ຮັບຟັງລາຍງານສະພາບການຈັດຕັ້ງປະຕິບັດວຽກງານປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງສະພາປະຊາຊົນແຂວງ, ສານປະຊາຊົນແຂວງ, ສານປະຊາຊົນພາກໃຕ້,ໄອຍະການປະຊາຊົນແຂວງ,ໄອຍະການປະຊາຊົນພາກໃຕ້ ແລະ ວຽກງານອົງການກວດສອບພາກໃຕ້ ໃນການປະຕິບັດພາລະບົດບາດ, ໜ້າທີ່ ຂອງແຕ່ລະຂະແໜງການ ໂດຍສະເພາະການປະຕິບັດພາລະບົດບາດໜ້າທີ່ ຂອງສະພາປະຊາຊົນ, ບັນດາໜ້າວຽກງານໃນຂະແໜງຍຸຕິທຳ, ອົງການປົກປ້ອງ ແລະ ປະຕິບັດກົດໝາຍ ຕິດພັນກັບການປະຕິບັດ 2 ວາລະແຫ່ງຊາດ ຄື:ວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດການເງິນ ແລະ ວາລະວ່າດ້ວຍການແກ້ໄຂບັນຫາຢາເສບຕິດ.
ຈາກຮັບຟັງລາຍງານແລ້ວ ທ່ານຮອງປະທານປະເທດ ໄດ້ເປັນກຽດໂອ້ລົມ ໂດຍໄດ້ຕີລາຄາສູງຕໍ່ການປະຕິບັດພາລະບົດບາດອຳນາດນິຕິບັນຍັດຂອງສະພາປະຊາຊົນແຂວງ ແລະ ຂະແໜງການກ່ຽວຂ້ອງໃນການປົກປ້ອງ ແລະ ປະຕິບັດກົດໝາຍຕາມໜ້າທີ່ຄວາມຮັບຜິດຊອບຂອງຕົນ ອັນໄດ້ປະກອບສ່ວນສຳຄັນໃຫ້ພື້ນຖານສັງຄົມມີຄວາມສະຫງົບເປັນລະບຽບຮຽບຮ້ອຍ.ຕີຖອຍປະກົດການຮ້ອງຟ້ອງ,ການລະເມີດກົດໝາຍໃຫ້ຫລຸດໜ້ອຍຖອຍລົງ ເທື່ອລະກ້າວ.
ໃນຕອນທ້້າຍ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ຍັງໄດ້ເນັ້ນໃຫ້ແຂວງຈໍາປາສັກຍົກສູງ ພາລະບົດບາດອຳນາດນິຕິບັນຍັດຂອງສະພາປະຊາຊົນ ແລະ ຂະແໜງການກ່ຽວຂ້ອງໃນຂົງເຂດປົກປ້ອງ ແລະ ປະຕິບັດກົດໝາຍຢ່າງແຂງແຮງ,ຮັບປະກັນຄວາມຍຸຕິທຳໃນສັງຄົມ ພ້ອມທັງ ເປັນເຈົ້າການຊຸກຍູ້, ຕິດຕາມ, ກວດກາ ສະພາບສະພາບການທີ່ເກີດຂຶ້ນ ແລະ ສົ່ງຜົນສະທ້ອນກົດໜ່ວງທ່ວງດຶງ ແລະ ເປັນອຸປະສັກກີດກັນຕໍ່ການພັດທະນາເສດຖະກິດ -ສັງຄົມ, ເອົາໃຈໃສ່ການປະຕິບັດເຂັ້ມງວດເດັດຂາດຕໍ່ຜູ້ລະເມີດລະບຽບກົດໝາຍ ເພື່ອຄວາມສະຫງົບສຸກ, ສັງຄົມສີວິໄລ ຍຸຕິທຳ.
Loading...