ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ບຸນທອງ ຈິດມະນີ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາ ຂອງທ່ານ ນາງ ຊີ.ເອ ຊາມິນດາ ໄອ. ໂຄລອນເນ (C.A. Chaminda I. Colonne) ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ສັງຄົມນິຍົມ ປະຊາທິປະໄຕ ສີລັງກາ ປະຈໍາ ສປປ ລາວ ໃນວັນທີ 4 ກໍລະກົດ 2024 ທີ່ນະຄອນຫລວງວຽງຈັນ, ໃນໂອກາດສຳເລັດການປະຕິບັດໜ້າທີ່ການທູດຢູ່ ສປປ ລາວ.
ໃນ ໂອກາດນີ້, ທ່ານ ບຸນທອງ ຈິດມະນີ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງຕໍ່ ທ່ານ ນາງ ຊີ.ເອ ຊາມິນດາ ໄອ. ໂຄລອນເນ ທີ່ປະສົບຜົນສຳເລັດ ໃນການປະຕິບັດໜ້າທີ່ການທູດ ປະຈຳ ສປປ ລາວ ຊຶ່ງຕະຫລອດໄລຍະການປະຕິບັດໜ້າທີ່ການທູດ, ທ່ານທູດໄດ້ເອົາໃຈໃສ່ຢ່າງຕັ້ງໜ້າເຂົ້າໃນການປະກອບສ່ວນ ເສີມຂະຫຍາຍ ສາຍພົວພັນອັນດີງາມທີ່ເປັນມູນເຊື້ອ ລະຫວ່າງ ສປປ ລາວ ແລະ ສີລັງກາ ທີ່ມີມາແຕ່ດົນນານ ໃຫ້ນັບມື້ມີບາດກ້າວຂະຫຍາຍຕົວຂຶ້ນຢ່າງບໍ່ຢຸດຢັ້ງ ພ້ອມທັງ ອວຍພອນ ໃຫ້ທ່ານທູດ ຈົ່ງເດີນທາງກັບຄືນປະເທດ ດ້ວຍຄວາມສະຫວັດດີພາບ ແລະ ປະສົບຜົນສຳເລັດໃນໜ້າທີ່ໃໝ່ ອັນມີກຽດຂອງທ່ານ.
ທ່ານ ນາງ ຊີ.ເອ ຊາມິນດາ ໄອ. ໂຄລອນເນ ໄດ້ສະແດງຄວາມຂອບໃຈຕໍ່ ທ່ານຮອງປະທານປະເທດ ແຫ່ງ ສປປ ລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຂອບໃຈຕໍ່ການຈັດຕັ້ງທຸກຂັ້ນ ຂອງ ສປປ ລາວ ທີ່ໄດ້ໃຫ້ຄວາມຮ່ວມມື ແລະ ອຳນວຍຄວາມສະດວກ ໃນໄລຍະການປະຕິບັດໜ້າທີ່ການທູດ ປະຈຳ ສປປ ລາວ ຈົນໄດ້ຮັບຜົນສຳເລັດເປັນຢ່າງດີ.
ສປປ ລາວ ແລະ ສີລັງກາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 20 ກໍລະກົດ 1965, ເຊິ່ງການພົວພັນຮ່ວມມື ລະຫວ່າງ ລາວ ແລະ ສີລັງກາ ປັດຈຸບັນມີທ່າຂະຫຍາຍຕົວ ສະແດງອອກໃນການແລກປ່ຽນສານຊົມເຊີຍ ໃນໂອກາດວັນສໍາຄັນຕ່າງໆ ລວມເຖິງການພົບປະ ລະຫວ່າງ ການນໍາຂັ້ນສູງຂອງສອງປະເທດ ໃນໂອກາດເຂົ້າຮ່ວມກອງປະຊຸມສາກົນຕ່າງໆ ໂດຍສະເພາະ ພາຍຫລັງການຢ້ຽມຢາມ ສປປ ລາວ ຂອງປະທານລັດຖະສະພາສີລັງກາ, ຊຶ່ງຝ່າຍລາວ ກໍໄດ້ປະກາດຍົກເລີກຂໍ້ຫ້າມ ການຂໍເອົາວີຊາກັບດ່ານ ຂອງພົນລະເມືອງສີລັງກາ (ມີຜົນບັງຄັບໃຊ້ໃນວັນທີ 01 ສິງຫາ 2018), ຊຶ່ງເປັນການປະກອບສ່ວນອັນສໍາຄັນ ໃນການສົ່ງເສີມ ແລະ ອຳນວຍຄວາມສະດວກ ໃນການໄປມາຫາສູ່ກັນ, ແຕ່ເຖິງຢ່າງໃດກໍຕາມເຫັນວ່າ ການພົວພັນສອງຝ່າຍ ຍັງບໍ່ທັນເປັນຮູບປະທຳຫລາຍປານໃດ.
ພ້ອມນີ້, ສອງຝ່າຍໄດ້ຮ່ວມກັນລົງນາມ ແລະ ລໍຖ້າລົງນາມຫລາຍສັນຍາຄື: ເດືອນພຶດສະພາ 1999 ໄດ້ເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືທາງດ້ານການສຶກສາ, ກິລາ, ການຄ້າ ແລະ ວັດທະນະທຳ ທີ່ ສປປ ລາວ, ເດືອນກັນຍາ 2018 ໄດ້ລົງນາມບົດບັນທຶກຄວາມເຂົ້າໃຈ ວ່າດ້ວຍການປຶກສາຫາລືດ້ານການເມືອງ ລະຫວ່າງສອງກະຊວງການຕ່າງປະເທດ ສປປ ລາວ ແລະ ສີລັງກາ ທີ່ ນິວຢອກ. ສອງຝ່າຍ ເຫັນດີໂດຍພື້ນຖານຕໍ່ຮ່າງສັນຍາ ວ່າດ້ວຍການຍົກເວັ້ນວີຊາ ສໍາລັບບຸກຄົນຖືໜັງສືຜ່ານແດນ ການທູດ ແລະ ລັດຖະບານ (ປັດຈຸບັນ ຝ່າຍສີລັງກາ ສະເໜີປັບປຸງເນື້ອໃນຮ່າງສັນຍາ, ເຊິ່ງກົມກົງສູນກຳລັງຄົ້ນຄວ້າພິຈາລະນາ ຕໍ່ຂໍ້ສະເໜີດັ່ງກ່າວ). ປັດຈຸບັນ ສີລັງກາ ໄດ້ສະເໜີເຊັນສັນຍາການຍົກເວັ້ນວີຊາ ສໍາລັບໜັງສືຜ່ານແດນທາງລັດຖະການ ແລະ ການທູດ ລະຫວ່າງ ສປປ ລາວ ແລະ ສີລັງກາ (ຍັງຢູ່ໃນຂັ້ນຕອນຄົ້ນຄວ້າພິຈາລະນາ) ອີກດ້ວຍ.
ຂ່າວ: ວຽງສະຫວັນ, ພາບ: ຂັນໄຊ