ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຮອງປະທານປະເທດ ພົບປະໂອ້ລົມພະນັກງານຫຼັກແຫລ່ງ ແລະ ອະດີດການນຳ ແຂວງອຸດົມໄຊ

ໃນໂອກາດທີ່ທ່ານ ປອ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງສປປລາວ ພ້ອມດ້ວຍຄະນະເດີນທາງມາຢ້ຽມຢາມ ແລະ ເຮັດວຽກຢູ່ບັນດາແຂວງພາກເໜືອ ໂດຍສະ ເພາະທີ່ແຂວງອຸດົມໄຊ ກໍໄດ້ພົບປະໂອ້ລົມກັບບັນດາການນຳ, ອະດີດການນຳ ຂອງແຂວງ ແລະ ພະນັກງານຫຼັກແຫຼ່ງທົ່ວເທດສະບານແຂວງ. ເຊິ່ງການໂອ້ລົມດັ່ງກ່າວ ແມ່ນຈັດຂຶ້ນໃນຕອນເຊົ້າວັນທີ 9 ສິງຫາ 2018 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ.

ການພົບປະໂອ້ລົມຂອງທ່ານ ຮອງປະທານປະເທດໃນຄັ້ງນີ້ ໄດ້ຍົກໃຫ້ເຫັນບາງປະ ເດັນທີ່ສຳຄັນ ເປັນຕົ້ນແມ່ນວຽກງານການປັບປຸງແກ້ໄຂ ຜູ້ທີ່ປະສົບໄພພິບັດນ້ຳຖ້ວມ ແລະ ດິນເຊາະເຈື່ອນ ທັງສະເພາະໜ້າແບບຮີບດ່ວນ ແລະ ແບບຍາວນານຖາວອນ,ເຜີຍແຜ່ເນື້ອໃນ, ຄວາມຫມາຍ, ຄວາມສຳຄັນ ລວມທັງຫມາກຜົນໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຂອງຄະນະບໍລິຫານງານສູນກາງພັກ ສະໄຫມທີ 10 ໃນຈຳນວນ 6 ຄັ້ງທີ່ໄດ້ສໍາເລັດໃນການດໍາເນີນກອງປະຊຸມຜ່ານມາ ແລະ ວຽກງານການປັບປຸງກົງຈັກການຈັດຕັ້ງດ້ານບຸກຄະລາກອນຂອງແຂວງ ໂດຍສະເພາະແມ່ນການນຳຂັ້ນສູງຂອງແຂວງ.

ໂອກາດດັ່ງກ່າວ ທ່ານ ໄດ້ເນັ້ນຫນັກ ພ້ອມທັງຮຽກຮ້ອງໃຫ້ບັນດາການນໍາຂອງແຂວງ, ພະນັກງານລັດຖະກອນທົ່ວແຂວງ ຈົ່ງພ້ອມກັນນໍາເອົາເນື້ອໃນຈິດໃຈດັ່ງກ່າວ ໄປຈັດຕັ້ງປະຕິບັດໃຫ້ປະສົບຜົນສຳເລັດ ສາມາດແກ້ໄຂບັນຫາຊີວິດການເປັນຢູ່ຂອງປະຊາຊົນທີ່ປະສົບໄພພິບັດ ໄດ້ຢ່າງຫມັ້ນຄົງ, ຖາວອນ, ພ້ອມກັນຈັດຕັ້ງປະຕິບັດມະຕິກອງປະຊຸມສະໄຫມທີ 10 ຂອງພັກໃຫ້ປະກົດຜົນເປັນຈິງ ລວມທັງ ຮ່ວມແຮງ, ຮ່ວມໃຈ ກັນໃຫ້ເປັນປຶກແຜ່ນ, ສາມັກຄີເຊິ່ງກັນແລະກັນຂອງບັນດາການນຳແຂວງ ໃນການຊີ້ນຳ ນຳພາ ປະຊາຊົນພັດທະນາເສດຖະກິດ ສັງຄົມຂອງແຂວງ ໃຫ້ນັບມື້ຂະຫຍາຍຕົວເທື່ອລະກ້າວ, ສຶກສາອົບຮົມດ້ານການເມືອງ ແນວຄິດໃຫ້ແກ່ປະຊາຊົນ ປະຕິບັດຕາມແນວ ທາງນະໂຍບາຍຂອງພັກ,ລະບຽບກົດຫມາຍຂອງລັດ ເຮັດໃຫ້ແຂວງອຸດົມໄຊ ມີຄວາມສະຫງົບ, ປອດໄພ ແລະ ສະຖຽນລະພາບ.

ຂ່າວຈາກ: ຄານມະນີ ຮຽນດໍຈັນ