ທ່ານ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ ແລະ ທ່ານ ນາງ ຫລິງທອງ ແສງຕາວັນ ຮອງເຈົ້າແຂວງສະຫວັນນະເຂດ ຢ້ຽມຢາມສູນຝຶກອົບຮົມຄູສອນເປົ່າແຄນ, ຜະລິດແຄນ ແລະ ດົນຕີພື້ນບ້ານ ແຂວງສະຫວັນນະເຂດ ໃນວັນທີ 24 ກໍລະກົດ 2024 ໂດຍການຕ້ອນຮັບຂອງ ທ່ານ ຄໍາສິດ ພົມມະຈັນ ຄະນະບໍລິຫານງານສະມາຄົມນັກປະພັນລາວ, ຄະນະບໍລິຫານງານສະມາຄົມນັກສິລະປິນແຫ່ງຊາດ ທັງເປັນຫົວໜ້າສູນຝຶກອົບຮົມຄູສອນເປົ່າແຄນ, ຜະລິດແຄນ ແລະ ດົນຕີພື້ນບ້ານ ແຂວງສະຫວັນນະເຂດ.
ທ່ານ ຄໍາສິດ ພົມມະຈັນ ໄດ້ລາຍງານກ່ຽວກັບຄວາມເປັນມາ ແລະ ການປະຕິບັດໂຄງການສ້າງຄູສອນເປົ່າແຄນ, ຜະລິດແຄນ ແລະ ດົນຕີພື້ນບ້ານ ທີ່ເປັນເອກະລັກຂອງແຂວງສະຫວັນນະເຂດວ່າ: ສູນດັ່ງກ່າວ ໄດ້ເລີ່ມຈັດຕັ້ງປະຕິບັດມາແຕ່ວັນທີ 1 ມິຖຸນາ 2024, ອີງຕາມທິດຊີ້ນໍາຂອງເຈົ້້າແຂວງສະຫວັນນະເຂດ ກໍຄືປະຕິບັດຕາມແນວທາງນະໂຍບາຍຂອງລັດຖະບານ ໃນການອະນຸລັກແຄນລາວ ທີ່ເປັນມໍລະດົກໂລກ ແລະ ສຽງແຄນລາວ ສົມກັບວ່າ: “ສຽງແຄນເຊື້ອຊາດລາວ ແມ່ນມໍລະດົກວັດທະນະທໍາທາງດ້ານນາມມະທໍາຂອງມວນມະນຸດສະຍະຊາດ’’ ທັງເປັນການສືບສານສຽງແຄນຂອງປະທານ ໄກສອນພົມວິຫານ ວິລະບຸລຸດແຫ່ງຊາດລາວ. ພາຍຫລັງທີ່ໄດ້ມີການເປີດຊຸດຝຶກອົບຮົມໃນໄລຍະເວລາເກືອບ 1 ເດືອນ ກໍໄດ້ມີການຄັດເລືອກ ແລະ ຈັດສົ່ງໝໍແຄນຮຸ່ນເຍົາວະຊົນອາຍຸບໍ່ເກີນ 14 ປີ ຈຳນວນ 2 ຄົນ ແລະ ຮຸ່ນຊາວໜຸ່ມອາຍຸບໍ່ເກີນ 20 ປີ ຈຳນວນ 1 ຄົນ ເຂົ້າຮ່ວມການແຂ່ງຂັນເປົ່າແຄນລະດັບຊາດ ໃນນັ້ນ, ແຂວງສະຫວັນນະເຂດ ສາມາດຍາດໄດ້ລາງວັນຊະນະເລີດອັນດັບທີ 1 ທັງ 2 ຮຸ່ນ ນັ້ນກໍສະແດງໃຫ້ເຫັນເຖິງໝາກຜົນແຫ່ງຄວາມສຳເລັດ ທີ່ໝໍແຄນຮຸ່ນສືບທອດຍາດມາໄດ້ໃຫ້ກັບແຂວງພວກເຮົາ ແລະ ແຜນຝຶກອົບຮົມຕໍ່ໃນໄລຍະທີ 2 ນີ້ ທາງສູນແມ່ນຈະມີການເປີດຝຶກອົບຮົມຢ່າງເປັນທາງການໃນວັນທີ 1 ສິງຫາ 2024 ທີ່ຈະມາເຖິງນີ້ ມາຮອດປັດຈະບັນແມ່ນໄດ້ມີຜູ້ມາລົງທະບຽນເຂົ້າຝຶກອົບຮົມແລ້ວຈຳນວນ 30 ກວ່າຄົນ ໃນນີ້, ຈະມີທັງຝຶກອົບຮົມຄູສອນຜະລິດແຄນ, ເປົ່າແຄນ, ລະນາດ, ຄ້ອງວົງ, ປີ່, ຊໍ, ກະຈັບປີ່ ແລະ ດົນຕີພື້ນບ້ານອື່ນໆແບບຄົບວົງມະໂຫລີ. ຫາກທ່ານໃດມີຄວາມສົນໃຈ ຫລື ຢາກເອົາລູກຫລານມາຮຽນກໍສາມາດມາລົງທະບຽນໄດ້ທີ່ ສູນຝຶກອົບຮົມຄູສອນເປົ່າແຄນ, ຜະລິດແຄນ ແລະ ດົນຕີພື້ນບ້ານໂດຍບໍ່ເສຍຄ່າ ສູນແມ່ນຕັ້ງຢູ່ໃນເຂດຕົວເມືອງເກົ່າ ອາຄານຫ້ອງການກະສິກໍາ ແລະ ປ່າໄມ້ເກົ່ານະຄອນໄກສອນ, ຖະໜົນຄັນທະບູລີ, ກົງກັນຂ້າມກັບພິພິທະພັນແຂວງ.
ໂອກາດດັ່ງກ່າວ, ທ່ານ ນາງ ສູນທອນ ໄຊຍະຈັກ ໄດ້ກ່າວສະແດງຄວາມຊົມເຊີຍຕໍ່ການນຳຂອງແຂວງ ທີ່ໄດ້ຊີ້ນຳຢ່າງໃກ້ຊິດຕິດແທດ, ບັນດານັກທຸລະກິດຜູ້ທີ່ໃຫ້ການສະໜັບສະໜູນທາງດ້ານທຶນຮອນ ລວມທັງຫົວໜ້າສູນທີ່ໄດ້ເອົາໃຈໃສ່ໃນການນຳພາຊີ້ນຳຝຶກຊ້ອມເຍົາວະຊົນ, ຊາວໜຸ່ມຢ່າງເອົາຈິງເອົາຈັງ ທັງໝົດນັ້ນກໍເພື່ອສ້າງໃຫ້ຄົນຮຸ່ນໜຸ່ມ ຂອງແຂວງສະຫວັນນະເຂດ ມີຄວາມຮັກ, ມີຄວາມມຸ່ງໝັ້ນໃນການເປົ່າແຄນຊຶ່ງບົ່ງບອກເຖິງຄວາມເປັນເຊື້ອຊາດລາວຢ່າງແທ້ຈິງ, ກ້າວໄປເຖິງການມີຄວາມສາມາດໃນການຜະລິດແຄນ ທີ່ເປັນເອກະລັກຂອງແຂວງສະຫວັນນະເຂດ, ນັ້ນຄືເຕົ້າແຄນທີ່ມີໂລໂກ້ພະທາດອີງຮັງແລະ ໄດໂນເສົາ ເປັນຂອງຝາກຕ້ອນທີ່ລະນຶກ, ເປັນເຄື່ອງປະດັບເອ້, ເປັນດົນຕີໃຊ້ເປົ່າໃນງານຕ່າງໆ ທັງເປັນໜຶ່ງໃນສິນຄ້າສົ່ງອອກໃນອະນາຄົດນຳອີກ.
ໂອກາດນີ້, ທ່ານ ນາງ ຫລິງທອງ ແສງຕາວັນ ຮອງເຈົ້າແຂວງ ກໍໄດ້ມອບແທ່ນຕັ້ງແຄນ ແລະ ແຄນທີ່ເປັນເອກະລັກຂອງແຂວງສະຫວັນນະເຂດ ໃຫ້ທ່ານ ນາງ ສູນທອນ ໄຊຍະຈັກ ຕື່ມອີກ.
ຂ່າວ-ພາບ: ອັກສອນສິນ ພົມມະຈັນ
