ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ເຄື່ອນໄຫວເຮັດວຽກຢູ່ແຂວງບໍ່ແກ້ວ ພ້ອມທັງເຂົ້າພົບທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ໃນວັນທີ 12 ກໍລະກົດ 2024 ເພື່ອແຈ້ງຈຸດປະສົງການມາເຮັດວຽກ ຢູ່ແຂວງບໍ່ແກ້ວ ໃນຄັ້ງນີ້ ເພື່ອເຜີຍແຜ່ກົດໝາຍ ວ່າດ້ວຍການແກ້ໄຂຄໍາຮ້ອງທຸກ ສະບັບປັບປຸງ ປີ 2022.
ທ່ານ ຄໍາຜະຫຍາ ພົມປັນຍາ ໄດ້ລາຍງານສະພາບການພັດທະນາ ເສດຖະກິດ-ສັງຄົມ ຂອງແຂວງບໍ່ແກ້ວ ເປັນຕົ້ນ ການພັດທະນາພື້ນຖານໂຄງລ່າງ ພ້ອມທັງສະເໜີບາງບັນຫາ ໃຫ້ລັດຖະບານຊ່ວຍແກ້ໄຂ ໂດຍສະເພາະ ບັນຫາແຮງງານທີ່ເຂົ້າມາຜິດກົດໝາຍ ເຊັ່ນ: ແຮງງານມຽນມາ. ພ້ອມກັນນີ້, ຍັງໄດ້ສະເໜີ ໃຫ້ພິຈາລະນາ ເປີດດ່ານທັງ 2 ເພື່ອອໍານວຍຄວາມສະດວກ ໃນການເຂົ້າ-ອອກ, ບັນຫາການຂົນສົ່ງ ຂອງສາຍການບິນ ຢູ່ສາມຫລ່ຽມຄໍາ ຍັງມີລາຄ່າແພງ, ບັນຫາການຕ້ານຕາຝັ່ງເຈື່ອນ ແລະ ການແກ້ໄຂບັນຫາວຽກງານຕຸລາການ ບາງຄະດີຍັງແກ່ຍາວ.
ໂອກາດນີ້, ທ່ານ ນາງ ສູນທອນ ໄຊຍະຈັກ ໄດ້ເຂົ້າຮ່ວມກອງປະຊຸມ ການເຜີຍແຜ່ກົດໝາຍ ວ່າດ້ວຍການແກ້ໄຂຄໍາຮ້ອງທຸກ ສະບັບປັບປຸງ ປີ 2022 ທີ່ສະພາປະຊາຊົນ ແຂວງບໍ່ແກ້ວ, ເຊິ່ງກົດໝາຍດັ່ງດ່າວ ປະກອບມີ 8 ພາກ, 6 ໝວດ ແລະ 48 ມາດຕາ, ກົດໝາຍສະບັບນີ້ ກໍານົດຫລັກການ ລະບຽບການ ແລະ ມາດຕະການກ່ຽວກັບການພິຈາລະນາ ແລະ ແກ້ໄຂຄໍາຮ້ອງທຸກ, ຄຸ້ມຄອງ ແລະ ຕິດຕາມ, ກວດກາ ການຕົກລົງ ກ່ຽວກັບການພິຈາລະນາ ແລະ ແກ້ໄຂຄໍາຮ້ອງທຸກຂອງບຸກຄົນ, ນິຕິບຸກຄົນ ຫລື ການຈັດຕັັ້ງ ເພື່ອໃຫ້ຖືກຕ້ອງຕາມກົດໝາຍ ແນໃສ່ເພີ່ມທະວີນິຕິທໍາ ປົກປັກຮັກສາຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທໍາ ຂອງພົນລະເມືອງລາວ ປະກອບສ່ວນເຮັດໃຫ້ສັງຄົມ ມີຄວາມສະຫງົບ ເປັນລະບຽບຮຽບຮ້ອຍ, ຍຸຕິທໍາ ແລະ ສີວິໄລ.
ໂອກາດດຽວກັນ, ທ່ານ ນາງ ສູນທອນ ໄຊຍະຈັກ ໄດ້ມອບປື້ມກົດໝາຍ ພ້ອມດ້ວຍໂພສສະເຕີ ໃຫ້ສະພາປະຊາຊົນແຂວງ ເພື່ອນໍາໄປເຜີຍແຜ່ ໃຫ້ບັນດາພະແນກການ, ອົງການ, ທັງພາກລັດ ແລະ ເອກະຊົນ ໃຫ້ເຂົ້າໃຈເຖິງກົດໝາຍ ວ່າດ້ວຍການແກ້ໄຂຄໍາຮ້ອງທຸກ ສະບັບປັບປຸງ ແລະ ບັນດາຄໍາຮ້ອງທຸກຕ່າງໆ ຄວນສະເໜີຫາພາກສ່ວນໃດ ເພື່ອໃຫ້ຖືກຕາມລະບຽບການຂອງກົດໝາຍ.
ຂ່າວ: ຄໍາເພັງ ສີສະຫວ່າງ
