ໃນລະຫວ່າງວັນທີ 9-10 ມັງກອນ 2024 ພົນໂທ. ສຸວອນ ເລືອງບຸນມີ ຮອງປະທານສະພາແຫ່ງ ຊາດ ໄດ້ເຂົ້າຮ່ວມພິທີລະນຶກເຖິງຜູ້ເສຍສະຫຼະຊີວິດໃນບັ້ນຮົບ 3 ບ້ານຂອງເມືອງທົ່ງມີໄຊ ແຂວງໄຊຍະບູລີ ຄົບຮອບ 40 ປີ (1984-2024) ເນື່ອງໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງໄຊ ຍະບູລີ ຊຸດທີ II ທີ່ດໍາເນີນໃນລະຫວ່າງວັນທີ 11-13 ມັງກອນນີ້; ໂດຍມີທ່ານ ເພັງນິລັນ ຄຳພັນເພັງ ປະທານສະພາປະ ຊາຊົນແຂວງໄຊຍະບູລີ, ທ່ານ ພົນຕີ. ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ, ບັນດາສະ ຫາຍຄະນະປະຈໍາ ແລະ ກໍາມະການພັກແຂວງ, ຄະນະກອງບັນຊາການທະຫານແຂວງ, ບັນດາສະຫາຍເລຂາພັກເມືອງ, ຫົວໜ້າຫ້ອງການຕ່າງໆອ້ອມຂ້າງເມືອງ, ແຂກຖືກເຊີນ ແລະ ຄະນະຕິດຕາມເຂົ້າຮ່ວມ.
ທັງນີ້ ເພື່ອເປັນການລະນຶກເຖິງຜູ້ເສຍສະຫຼະຊີວິດໃນບັ້ນຮົບ 3 ບ້ານຂອງເມືອງທົ່ງມີໄຊ ຄົບຮອບ 40 ປີ ເປັນ ອານຸສອນຈາລຶກຄຸນງາມຄວາມດີຂອງພະນັກງານ-ນັກຮົບ ແລະ ປະຊາຊົນບັນດາເຜົ່າທີ່ເສຍສະຫຼະຊີວິດໃນສົງຄາມ 3 ບ້ານດັ່ງກ່າວ ຢ່າງອົງອາດກ້າຫານ ເພື່ອປົກປັກຮັກສາປິຕຸພູມ ແລະ ດິນດອນຕອນຫຍ້າອັນສຸດທີ່ຫວງແຫນ ໄວ້ໄດ້ຢ່າງ ໝັ້ນຄົງ.
ທ່ານ ເພັງນິລັນ ຄໍາພັນເພັງ ໄດ້ເລົ່າເຫດການຄວາມເປັນມາລະນຶກບັ້ນຮົບ 3 ບ້ານຂອງເມືອງທົ່ງມີໄຊ ຄົບ ຮອບ 40 ປີ ໂດຍຫຍໍ້ ແລະ ທ່ານ ພັທ. ນຸດ ນິລະນິນ ອະດີດຫົວໜ້າກອງບັນຊາການທະຫານເມືອງປາກລາຍ, ຜູ້ຢູ່ໃນ ເຫດການ ແລະ ສູ້ຮົບຕົວຈິງໃນການເຮັດໜ້າທີ່ຮອງຫົວໜ້າກອງຮ້ອຍສູ້ຮົບໃນຕອນນັ້ນ ເຊິ່ງທ່ານໄດ້ເລົ່າເຫດການຕົວ ຈິງບາງຕອນໃນປີ 1984 ແລະ ການໂຈມຕີຕ້ານ, ຍຶດຄືນເອົາຄ້າຍກົມກອງຂອງສັດຕູ ແລະ ການສະກັດລັດຕີທະຫານ ປະຕິການ ຈົນຮອດມື້ທີ່ໄດ້ຍົກຍ້າຍໄປຮັບໜ້າທີ່ໃໝ່.
ໃນຕອນເຊົ້າຂອງວັນທີ 10 ມັງກອນ, ການນໍາພັກ-ລັດ ເຊິ່ງນໍາໂດຍທ່ານ ພົງສະຫວັນ ສິດທະວົງ ເຈົ້າແຂວງໆ ໄຊຍະບູລີ ໄດ້ນໍາພາການນໍາພັກ-ລັດ, ບັນດາທ່ານເຈົ້າເມືອງຕ່າງໆພາຍໃນແຂວງ, ພະນັກງານຫຼັກແຫຼ່ງຂອງເມືອງ ແລະ ຊາວພໍ່ແມ່ປະຊາຊົນ ຊາວພຸດທະບໍລິສັດ ຊາວເມືອງທົ່ງມີໄຊ ໃສ່ບາດຖວາຍສັງຄະທານ, ຖວາຍກອງອັດຖະ ເພື່ອອຸທິດ ບຸນກຸສົນໃຫ້ແກ່ບັນດາສະຫາຍນັກຮົບຜູ້ທີ່ເສຍສະຫຼະໃນບັ້ນຮົບ 3 ບ້ານຂອງເມືອງທົ່ງມີໄຊໃນຄັ້ງນັ້ນ.
(ຂ່າວ ແລະ ພາບ: ສອນສັກ ວັນວິໄຊ)
