ໃນລະຫວ່າງວັນທີ 10-13 ສິງຫາຜ່ານມາ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມງານສັບປະດາອາຊຽນ-ຈີນ ປະຈໍາປີ 2024 ທີ່ເມືອງສາງຈື້ ແຂວງຊານຊີ ສາທາລະນະລັດປະຊາຊົນຈີນ ພາຍໃຕ້ຫົວຂໍ້: ຄູ່ຮ່ວມຍຸດທະສາດຮອບດ້ານອາຊຽນ-ຈີນ ເພື່ອບັນລຸຄວາມຈະເລີນສີວິໄລໂດຍຜ່ານນະວັດຕະກໍາໃໝ່ ຊຶ່ງມີຜູ້ຕາງໜ້າບັນດາປະເທດສະມາຊິກອາຊຽນເຂົ້າຮ່ວມ.
ທ່ານ ຄໍາໃບ ດໍາລັດ ໄດ້ຕາງໜ້າຄະນະຜູ້ແທນ ກໍຄືສະພາແຫ່ງຊາດລາວ ຂຶ້້ນມີຄໍາເຫັນໃນພິທີເປີດ ຊຶ່ງໄດ້ຕີລາຄາສູງຕໍ່ງານສັບປະດາຄັ້ງນີ້ແມ່ນການເສີມຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ຈີນ ເພື່ອບັນລຸຄວາມຈະເລີນສີວິໄລໂດຍຜ່ານນະວັດຕະກຳໃໝ່ ໂດຍການເອົາໃຈໃສ່ຕໍ່ການຫັນປ່ຽນຢ່າງຫົວຄິດປະດິດສ້າງ ແລະ ການນຳໃຊ້ເຕັກໂນໂລຊີສີຂຽວ ເພື່ອຮັດແໜ້ນການພົວພັນຮ່ວມມືດ້ານການຄ້າ, ການລົງທຶນ, ການສຶກສາ, ຄົມມະນາຄົມ, ວັດທະນະທໍາ-ສັງຄົມ, ການທ່ອງທ່ຽວ ແລະ ອື່ນໆ ທັງຮຽນຮູ້ຊຶ່ງກັນ ແລະ ກັນ ເພື່ອຊຸກຍູ້ການເຕີບໂຕທາງດ້ານເສດຖະກິດທີ່ໝັ້ນຄົງ, ຍືນຍົງ ເພື່ອນຳຜົນປະໂຫຍດມາສູ່ບັນດາປະເທດອາຊຽນ ແລະ ສປ ຈີນ.
ໃນໄລຍະຜ່ານມາ, ສປປ ລາວ ໃນນາມເປັນສະມາຊິກອາຊຽນ ໄດ້ເຂົ້າຮ່ວມຢ່າງຕັ້ງໜ້າໃນການເສີມຂະຫຍາຍສາຍພົວພັນມິດຕະພາບ ແລະ ການເປັນຄູ່ຮ່ວມຍຸດທະສາດຮອບດ້ານລະຫວ່າງອາຊຽນ-ຈີນ ແລະ ຊຸກຍູ້ການຮ່ວມມືຮອບດ້ານ ດ້ວຍການເພີ່ມທະວີບັນດາໝາກຜົນທີ່ຕັ້ງໜ້າ, ມຸ່ງໄປສູ່ເປົ້າໝາຍທີ່ສູງກວ່າ ແລະ ນຳເອົາຜົນປະໂຫຍດທີ່ຫຼາຍກວ່າ ມາສູ່ອາຊຽນ-ຈີນ ເພື່ອບັນລຸຄວາມຈະເລີນສີວິໄລໂດຍຜ່ານນະວັດຕະກຳໃໝ່ ອາຊຽນ-ຈີນ.
ການເຄື່ອນໄຫວຄັ້ງນີ້, ຄະນະໄດ້ເຂົ້າຢ້ຽມຢາມພົບປະ ທ່ານ ສື ຈົ່ງຈຸ່ນ ເລຂາທິການໃຫຍ່ສູນອາຊຽນ-ຈີນ ຊຶ່ງທ່ານໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການເຂົ້າຮ່ວມງານສັບປະດາອາຊຽນ-ຈີນ ປະຈໍາປີ 2024 ຂອງຄະນະຜູ້ແທນສະພາແຫ່ງຊາດລາວ ພ້ອມທັງແຈ້ງໃຫ້ຊາບກ່ຽວກັບຄວາມໝາຍຄວາມສໍາຄັນຂອງການສ້າງຕັ້ງສູນຈີນ – ອາຊຽນ ແລະ ການປະກອບສ່ວນຢ່າງຕັ້ງໜ້າຂອງສູນ ເຂົ້າໃນການຊຸກຍູ້ການຮ່ວມມືໃນຂະແໜງການຕ່າງໆລະຫວ່າງ ສປ ຈີນ ແລະ ສະມາຊິກອາຊຽນ; ສູນຈີນ-ອາຊຽນ ພ້ອມທີ່ຈະສະໜັບສະໜູນ ສປປ ລາວ ໃນການເປັນປະທານ ໝູນວຽນອາຊຽນ, ຊຸກຍູ້ການກໍ່ສ້າງຂໍ້ລິເລິ່ມ “ໜຶ່ງແລວ ໜຶ່ງເສັ້ນທາງ” ຕິດພັນກັບຍຸດທະສາດການພັດທະນາ ແລະ ວິໄສທັດອາຊຽນ. ທ່ານ ຄໍາໃບ ດໍາລັດ ໄດ້ຕີລາຄາສູງຕໍ່ສູນອາຊຽນ-ຈີນ ທີ່ໄດ້ປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການເປັນຄູ່ຮ່ວມຍຸດທະສາດ ອາຊຽນ-ຈີນ ເພື່ອສ້າງສັນຕິພາບ, ມິດຕະພາບ, ສະຖຽນລະພາບ, ຄວາມຈະເລີນຮຸ່ງເຮືອງ ມາສູ່ຂົງເຂດ ແລະ ພາກພື້ນ.
ຄະນະຜູ້ແທນສະພາແຫ່ງຊາດລາວຍັງໄດ້ເຂົ້າຢ້ຽມພົບປະ ສະຫາຍ ຖາງ ເຕີ້ງ ເຈ໋ຍ ເລຂາພັກແຂວງ ປະທານສະພາປະຊາຊົນແຂວງຊານຊີ ຊຶ່ງສະຫາຍ ຖາງ ເຕີ້ງ ເຈ໋ຍໄດ້ສະແດງຄວາມຍິນຕີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນສະພາແຫ່ງຊາດລາວໃນຄັ້ງນີ້, ພ້ອມທັງແຈ້ງສະພາບການພັດທະນາເສດຖະກິດ-ສັງຄົມຂອງແຂວງຊານຊີ ໃຫ້ຮັບຊາບ. ສະຫາຍ ຄໍາໃບ ດໍາລັດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການເປັນເຈົ້າພາບຈັດງານສັບປະດາອາຊຽນ-ຈີນ ປະຈໍາປີ 2024 ໃນຄັ້ງນີ້. ສອງຝ່າຍມີຄວາມພາກພູມໃຈເປັນຢ່າງຍິ່ງທີ່ເຫັນວ່າ ສປປ ລາວ ແລະ ສປ ຈີນ ເປັນປະເທດເພື່ອນມິດສະຫາຍ, ບ້ານໃກ້ເຮືອນຄຽງ ທີ່ມີສາຍພູ ແລະ ແມ່ນໍ້າຕິດຈອດກັນ, ມີສາຍພົວພັນທີ່ເປັນມູນເຊື້ອມາແຕ່ບູຮານນະການ ຊຶ່ງຜ່ານມາ ການນຳຂັ້ນສູງທັງສອງປະເທດ ໂດຍແມ່ນ ສະຫາຍ ສີຈິ້ນຜີງ ເລຂາທິການໃຫຍ່ ປະທານປະເທດແຫ່ງ ສປ ຈີນ ແລະ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປລາວ ໄດ້ລົງນາມໃນແຜນແມ່ບົດສະບັບໃໝ່ ວ່າດ້ວຍການສ້າງຄູ່ຮ່ວມຊາຕາກຳ ຈີນ-ລາວ, ລາວ-ຈີນ ຊຶ່ງເປັນພື້ນຖານອັນໜັກແໜ້ນໃຫ້ການພົວພັນຮ່ວມມື ລະຫວ່າງສອງພັກ, ສອງລັດ ກໍຄືປະຊາຊົນສອງປະເທດ ໃນຍຸກສະໄໝໃໝ່; ພ້ອມດຽວກັນນັ້ນ ໃນປີ 2024 ແມ່ນປີແຫ່ງການໄປມາຫາສູ່ກັນລະຫວ່າງ ສປ ຈີນ ແລະ ບັນດາປະເທດອາຊຽນ, ແຂວງຊານຊີ ຫວັງຢ່າງຍິ່ງວ່າການເປີດສັບປະດາອາຊຽນ-ຈີນ ປະຈໍາປີ 2024 ຈະເປັນໂອກາດອັນດີໃນການຊຸກຍູ້ການຮ່ວມມືໃນຂະແໜງການເສດຖະກິດ, ການຄ້າ – ການລົງທຶນ, ການສຶກສາ, ການພັດທະນາລະບົບພື້ນຖານໂຄງລ່າງ, ການທ່ອງທ່ຽວ ແລະ ຂະແໜງການອື່ນ ເພື່ອເປັນກຳລັງແຮງປະກອບສ່ວນສຳຄັນເຂົ້າໃນການກໍ່ສ້າງການເປັນຄູ່ຮ່ວມຊາຕາກໍາລະຫວ່າງ ຈີນ-ລາວ, ລາວ-ຈີນ ໃຫ້ນັບມື້ນັບພັດທະນາຍິ່ງໆຂຶ້ນ.
ນອກຈາກນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ເຄື່ອນໄຫວຢ້ຽມຢາມສະຖານທີ່ທ່ອງທ່ຽວອະນຸລັກລະບົບນິເວດແຄມໜອງນໍ້າຂອງເມືອງສາງຈື້ ແລະ ວັດຈິ່ນສື ຊຶ່ງເປັນສະຖານທີ່ສຳຄັນທາງປະຫວັດສາດຂອງແຂວງຊານຊີ ອີກດ້ວຍ.
