ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮອງປະທານສະພາແຫ່ງຊາດ ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງຫົງສາ

ໃນວັນທີ 4 ມີນາ 2020 ນີ້, ທ່ານ ປອ ບຸນປອນ ບຸດຕະນະວົງ, ກຳມະການສູນກາງພັກ ແລະ ຮອງປະທານສະພາແຫ່ງຊາດ ໄດ້ລົງໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງຫົງສາ ແຂວງໄຊຍະບູລີ, ໂດຍໄດ້ຖືກຕ້ອນຮັບຢ່າງອົບອຸ່ນຈາກທ່ານ ສົມລິດ ເປືອກແກ້ວ, ຮອງເລຂາພັກແຂວງ ແລະ ປະທານສະພາປະຊາຊົນແຂວງໄຊຍະບູລີ, ພ້ອມດ້ວຍບັນດາ ສະມາຊິກສະພາປະຊາຊົນແຂວງ, ຄະນະນຳຂອງເມືອງ, ສະມາຊິກພັກ, ພະນັກງານອາວຸໂສບຳນານ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ຕະຫຼອດຮອດນາຍບ້ານເທດສະບານເມືອງ ແລະ ປະຊາຊົນທ້ອງຖິ່ນ.
ໃນໂອກາດນີ້, ທ່ານ ຄຳຫຼ້າ ຜິວວັນນາ, ເລຂາພັກເມືອງ ເຈົ້າເມືອງໆຫົງສາ ກໍ່ໄດ້ກ່າວຕ້ອນຮັບ ແລະ ລາຍງານ ກ່ຽວກັບ ສະພາບລວມໂດຍຫຍໍ້ຂອງເມືອງ ຕໍ່ທ່ານຮອງປະທານສະພາແຫ່ງຊາດ ແລະ ຄະນະທີ່ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງຫົງສາຄັ້ງນີ້ວ່າ: ເມືອງຫົງສາ ປະກອບມີ 33 ບ້ານ, 483 ໜ່ວຍຄອບຄົວ, 5,900 ຄອບຄົວ, ແລະພົນລະເມືອງທັງໝົດ 29,337 ຄົນ ຍິງ 14,436 ຄົນ, ປະກອບມີ 8 ເຜົ່າ, ອາຊີບຂອງປະຊາຊົນສ່ວຍໃຫຍ່ແມ່ນເຮັດການກະເສດ (ປູກຝັງ-ລ້ຽງສັດ), ຮອງລົງມາແມ່ນການບໍລິການ-ຄ້າຂາຍ. ປະຊາຊົນສ່ວນຫຼາຍແມ່ນອາໄສຢູ່ໃນເຂດເທດສະບານເມືອງ ເຊິ່ງກວມເອົາ 61,89% ຂອງຈໍານວນພົນລະເມືອງທັງໝົດ. ເສດຖະກິດຂະຫຍາຍຕົວຕໍ່ເນື່ອງ ໃນລະດັບ 11,3% ຕໍ່ປີ; ລວມຍອດລາຍຮັບທັງໝົດແມ່ນ 644,32 ຕື້ກີບ, ສະເລ່ຍໃສ່ຫົວຄົນແມ່ນໄດ້ 21,96 ລ້ານກີບ ຫຼື ເທົ່າກັບ 2,745 ໂດລາສະຫະລັດຕໍ່ຄົນຕໍ່ປີ. ໂຄງປະກອບເສດຖະກິດຂອງເມືອງແມ່ນຫັນປ່ຽນຕາມທິດເປັນອຸດສາຫະກຳ ແລະ ທັນສະໄໝ, ເຊິ່ງສະແດງອອກໃນດ້ານກະສິກຳ ແລະ ປ່າໄມ້ ກວມເອົາ 28%, ອຸດສາຫະກໍາ-ຫັດຖະກຳ ກວມເອົາ 26%, ການບໍລິການ ກວມເອົາ 46% ແລະ ມູນຄ່າການສົ່ງອອກ ບັນລຸ 13,92 ຕື້ກີບ.


ນອກຈາກນີ້, ການກໍ່ສ້າງຮາກຖານການເມືອງ ແລະ ລຶບລ້າງຄວາມທຸກຍາກ ໄດ້ສຸມໃສ່ປະຕິບັດຢ່າງເປັນລະບົບຕໍ່ເນື່ອງ ໂດຍຖືເອົາເປັນບູລິມາສິດອັນດັບໜຶ່ງ ເຮັດໃຫ້ອັດຕາຄວາມທຸກຍາກຫຼຸດລົງໃນປີ 2014 ເຫຼືອພຽງ 2,45% ແລະ ປີ 2019 ເຫຼືອພຽງ 1,3% ຂອງຄອບຄົວທັງໝົດ.
ພ້ອມນີ້, ທົ່ວເມືອງໄດ້ຊົມໃຊ້ໄຟຟ້າແລ້ວ 100%, ໂຄງລ່າງພື້ນຖານໄດ້ຮັບການພັດທະນາຍົກລະດັບໃຫ້ດີຂຶ້ນ ແລະ ສາມາດເຂົ້າເຖິງທຸກໆບ້ານ.
ໃນໂອກາດດຽວກັນນີ້, ທ່ານ ປອ ບຸນປອນ ບຸດຕະນະວົງ ກໍ່ໄດ້ມີຄຳເຫັນໂອ້ລົມ ແລະ ຊີ້ນໍາຕໍ່ຄະນະການນໍາຂອງແຂວງ-ຂອງເມືອງ, ສະມາຊິກພັກ, ພະນັກງານຫຼັກແຫຼ່ງ ຕະຫຼອດຮອດ ນາຍບ້ານ ໃຫ້ຕັ້ງໜ້າເຕົ້າໂຮມຄວາມສາມັກຄີເປັນປຶກແຜ່ນແໜ້ນໜາ ຕິດພັນກັບ ການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບໃນທົ່ວປວງຊົນ, ເຮັດໃຫ້ເມືອງຫົງສາ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍຢ່າງໜັກແໜ້ນ, ປຸກລະດົມກຳລັງແຮງສັງລວມຂຸດຄົ້ນທຸກຄວາມອາດສາມາດທີ່ບົ່ມຊ້ອນຢ່າງສຸດຂີດ, ແລະ ດຶງດູດການລົງທຶນໃຫ້ຫຼາຍຂຶ້ນ ເພື່ອເຮັດໃຫ້ເສດຖະກິດມີການຂະຫຍາຍຕົວໃນລະບົບຕໍ່ເນື່ອງ; ຄ່ຽງຄູ່ກັນນັ້ນ, ກໍ່ໃຫ້ຕັ້ງໜ້າປັບປຸງແລະ ບູລະນະການຈັດຕັ້ງໃຫ້ມີຄວາມເຂັ້ມແຂງ, ໜັກແໜ້ນ, ມີປະສິດທິພາບ, ຍົກສູງຄຸນນະພາບຂອງສະມາຊິກພັກ-ພະນັກງານໃຫ້ມີການຫັນປ່ຽນທີ່ຕັ້ງໜ້າ, ຍົກສູງຈິດໃຈຮັບໃຊ້ປະຊາຊົນ ແລະ ເປັນຜູ້ບໍລິການປະຊາຊົນທີ່ດີຕື່ມອີກ.
ຫຼັງຈາກນັ້ນ, ທ່ານ ປອ ບຸນປອນ ບຸດຕະນະວົງ, ກຳມະການສູນກາງພັກ ແລະ ຮອງປະທານສະພາແຫ່ງຊາດ ພ້ອມດ້ວຍຄະນະ, ແລະ ການນຳຂອງແຂວງ, ສະມາຊິກສະພາປະຊາຊົນແຂວງ, ແລະ ຄະນະນຳຂອງເມືອງ ກໍ່ໄດ້ເດີນທາງໄປຢ້ຽມຊົມອາຄານຫົງຄໍາໄຊຍາຄານ ແລະ ຫ້ອງວາງສະແດງຂໍ້ມູນ ທີ່ເປັນອາຄານຈັດສະແດງໃຫ້ຄວາມຮູ້, ຄວາມເຂົ້າໃຈກ່ຽວກັບການດໍາເນີນງານຂອງບໍລິສັດໄຟຟ້າຫົງສາ ແລະ ຂະບວນການຜະລິດກະແສໄຟຟ້າ ທີ່ເປັນມິດກັບສິ່ງແວດລ້ອມ, ການພັດທະນາຊຸມຊົນ ແລະ ສັງຄົມ.