ໃນລະຫວ່າງວັນທີ 4-5 ມິຖຸນາ 2024 ທີ່ ນະຄອນຫຼວງຈາກາຕາ ປະເທດອິນໂດເນເຊຍ, ທ່ານ ນ. ຂັນແກ້ວ ຫຼ້າມະນີເງົາ, ຮອງຜູ້ວ່າການທະນາຄານແຫ່ງ ສປປ ລາວ ພ້ອມດ້ວຍຄະນະ ໄດ້ສໍາເລັດການເຂົ້າຮ່ວມກອງປະຊຸມປຶກສາຫາລື ວຽກງານການຮ່ວມມືທາງດ້ານການເງິນ ອາຊຽນ-ສ. ເກົາຫຼີ ປະຈໍາປີ 2024 (2024 ASEAN-ROK Financial Cooperation Forum) ໃນຫົວຂໍ້: “ບົດບາດຂອງວິສາຫະກິດໃນຂະແໜງການເງິນໃນຖານະເປັນຜູ້ຂັບເຄື່ອນ ວຽກງານການເງິນຍືນຍົງໃນອາຊຽນ” ພາຍໃຕ້ການເປັນເຈົ້າພາບຂອງສໍານັກງານຜູ້ຕາງໜ້າຖາວອນແຫ່ງ ສ.ເກົາຫຼີ ປະຈໍາອາຊຽນ ແລະ ສູນການຮ່ວມມືທາງດ້ານການເງິນອາ ຊຽນ-ສ. ເກົາຫຼີ ທີ່ ຈາກາຕາ ປະເທດ ອິນໂດເນເຊຍ. ຜູ້ເຂົ້າຮ່ວມກອງປະຊຸມດັ່ງກ່າວ ປະກອບດ້ວຍ ເອກອັກຄະລັດຖະທູດ ຜູ້ຕາງໜ້າຖາວອນແຫ່ງ ສ. ເກົາຫຼີ ປະຈໍາອາຊຽນ, ຮອງເລຂາທິການໃຫຍ່ອາຊຽນ, ຕາງໜ້າຈາກທະນາຄານພັດທະນາອາຊີ, ຂະແໜງການ ແລະ ສະຖາບັນການເງິນ ແລະ ພາກສ່ວນກ່ຽວຂ້ອງຈາກພາກພື້ນຫຼາຍກວ່າ 100 ທ່ານ.
ໃນກອງປະຊຸມສຳມະນາດັ່ງກ່າວ ທ່ານ ນ. ຂັນແກ້ວ ຫຼ້າມະນີເງົາ, ຮອງຜູ້ວ່າການທະນາຄານແຫ່ງ ສປປ ລາວ ໄດ້ຂຶ້ນກ່າວຄໍາຊົມເຊີຍ ຕໍ່ກັບການຈັດກອງປະຊຸມສໍາມະນາວຽກງານການເງິນຍືນຍົງ ໂດຍໄດ້ຍົກໃຫ້ເຫັນເຖິງຄວາມຈໍາເປັນ ໃນການຊຸກຍູ້ວິສາຫະກິດຂອງຂະແໜງການເງິນໃຫ້ມີສ່ວນຮ່ວມຢ່າງເລິກເຊິ່ງ ໂດຍສະເພາະໃນວຽກງານການເງິນຍືນຍົງ, ການຈັດຕັ້ງປະຕິບັດຂອງອາຊຽນສູ່ການເງິນຍືນຍົງ, ແຜນແມ່ບົດສີຂຽວຕໍ່ກັບບາດ ກ້າວອັນສໍາຄັນຂອງອາຊຽນໃນການເປັນມິດຕໍ່ສິ່ງແວດລ້ອມຫຼາຍຂຶ້ນ. ນອກຈາກນີ້, ກອງປະຊຸມຍັງໄດ້ຮັບຟັງນໍາການເສວະນາຈາກພາກລັດ ແລະ ພາກສ່ວນກ່ຽວຂ້ອງກ່ຽວກັບບົດບາດຂອງສະຖາບັນການເງິນ ເພື່ອເອື້ອອໍານວຍໃຫ້ລະບົບນິເວດການປ່ອຍອາຍທາດເຮືອນແກ້ວເປັນສູນ, ການສະໜັບສະໜູນທຶນໃຫ້ແກ່ທຸລະກິດທີ່ປ່ຽນຜ່ານໄປສູ່ທຸລະກິດສີຂຽວ ໃນອາຊຽນ ພ້ອມທັງວິທີທີ່ວິສາຫະກິດຂອງຂະແໜງການເງິນສາມາດເລັ່ງການຫັນ ໄປສູ່ Net-zero.
ກອງປະຊຸມດັ່ງກ່າວ ໄດ້ສໍາເລັດຢ່າງຈົບງາມທ່າມກາງການປະກອບຄໍາເຫັນ ແລະ ເຂົ້າຮ່ວມຂອງພາກລັດ, ສະຖາບັນການເງິນ, ອົງການຈັດຕັ້ງສາກົນ ແລະ ຊ່ຽວຊານຈາກຫຼາຍພາກສ່ວນທີ່ຕິດພັນວຽກງານການເງິນຍືນຍົງ ຢ່າງຟົດຟື້ນ ແລະ ສ້າງສັນ ເພື່ອເສີມຂະຫຍາຍການຮ່ວມມືໃນພາກພື້ນອາຊຽນໃຫ້ມີປະສິດທິພາບ ແລະ ແໜ້ນແຟ້ນຂຶ້ນກວ່າເກົ່າ.
ຂ່າວ ແລະ ພາບ: ກົມຮ່ວມມືສາກົນ ແລະ ຫ້ອງການ ທຫລ
