ໃນວັນທີ 21 ກັນຍາ 2022, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ທັງເປັນຄະນະກໍາມະການຊີ້ນໍາລວມ ພິທີວາງສີລາລຶກເປີດການກໍ່ສ້າງໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ V (ບໍລິຄໍາໄຊ-ບຶງການ) ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມຄວາມຄືບໜ້າໂຄງການກໍ່ສ້າງຂົວມິດຕະພາບ ດັ່ງກ່າວ ທີ່ ແຂວງບໍລິຄໍາໄຊ ເພື່ອກະກຽມໃຫ້ແກ່ພິທີວາງສີລາລຶກໂຄງການດັ່ງກ່າວ ທີ່ຈະມີຂຶ້ນໃນມໍ່ໆນີ້.
ໃນໂອກາດນີ້, ທ່ານ ຮອງລັດຖະມົນຕີ ໂພໄຊ ໄຂຄໍາພິທູນ ໄດ້ຮັບຟັງການລາຍງານຄວາມຄືບໜ້າຂອງໂຄງການ ແລະ ການກະກຽມດ້ານຕ່າງໆ ໃນການຈັດພິທີວາງສີລາລຶກຈາກ ທ່ານ ລິດຕາ ຂັດທິຍະ, ຫົວໜ້າກົມຂົວທາງ, ກະຊວງໂຍທາທິການ ແລະ ຂົນສົ່ງ ໃນນາມຄະນະຮັບຜິດຊອບໂຄງການ, ຊຶ່ງເຫັນວ່າ ມີຄວາມຄືບໜ້າຫຼາຍສົມຄວນ ແລະ ບາງໜ້າວຽກກໍ່ເຮັດສໍາເລັດລື່ນຄາດໝາຍ. ໃນກອງປະຊຸມຄັ້ງນີ້, ຍັງມີທ່ານ ຄໍາແຫວນ ປັນຍານຸວົງ, ຮອງເຈົ້າແຂວງບໍລິຄໍາໄຊ ແລະ ພະນັກງານຈາກພາກສ່ວນທີ່ກ່ຽວຂ້ອງເຂົ້າຮ່ວມ. ໃນໂອກາດດັ່ງກ່າວ, ທ່ານ ຮອງລັດຖະມົນຕີ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບ ທີ່ສາມາດຈັດຕັ້ງປະຕິບັດໂຄງການໃຫ້ສໍາເລັດຕາມຄາດໝາຍເປັນກ້າວໆມາ, ຊຶ່ງພາຍຫຼັງສໍາເລັດໂຄງການ ແລະ ເປີດການນໍາໃຊ້ຢ່າງເປັນທາງການ ກໍ່ຈະເປັນທ່າແຮງອັນໃໝ່ໃນການກະຕຸກຊຸກຍູ້ເສດຖະກິດໂດຍລວມຂອງ ສປປ ລາວ ກໍ່ຄືຊຸກຍູ້ ການຍົກລະດັບການພົວພັນ ແລະ ຮ່ວມມືເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ໄລຍະ 5 ປີ (2022-2026) ຂອງສອງປະເທດ ໃນໂອກາດທີ່ທ່ານ ນາຍົກລັດຖະມົນຕີ ພັນຄໍາ ວິພາວັນ ເດີນທາງຢ້ຽມຢາມ ຣາຊະອານາຈັກໄທ ຢ່າງເປັນທາງການ ໃນລະຫວ່າງ ວັນທີ 01-02 ມິຖຸນາ 2022 ຜ່ານມາ. ພ້ອມດຽວກັນນັ້ນ, ທ່ານ ຮອງລັດຖະມົນຕີ ໂພໄຊ ໄຂຄໍາພິທູນ ຍັງໄດ້ເນັ້ນໃຫ້ຄະນະຮັບຜິດຊອບສືບຕໍ່ກະກຽມຄວາມພ້ອມໃນວຽກງານດ້ານຕ່າງໆ ໃຫ້ແກ່ການຈັດພິທີວາງສີລາລຶກໂຄງການດັ່ງກ່າວ ທີ່ຄາດວ່າຈະຈັດຂຶ້ນໃນທ້າຍເດືອນຕຸລາ 2022 ນີ້ ໂດຍສະເພາະແມ່ນ ວາລະຕ່າງໆຂອງພິທີ, ດ້ານພິທີການ ແລະ ສະຖານທີ່ ແລະ ການປ້ອງກັນຄວາມສະຫງົບ ເປັນຕົ້ນ. ນອກຈາກນີ້, ທ່ານຍັງໄດ້ລົງຕິດຕາມກວດກາສະຖານທີ່ກໍ່ສ້າງ ແລະ ສະຖານທີ່ຈັດພິທີວາງສີລາລຶກຕົວຈິງຕື່ມອີກ.
ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ V (ບໍລິຄໍາໄຊ-ບຶງການ) ໄດ້ເລີ່ມດໍາເນີນການກໍ່ສ້າງນັບແຕ່ເດືອນມັງກອນ 2021 ເປັນຕົ້ນມາ ແລະ ຄາດວ່າຈະໃຫ້ສໍາເລັດ ໃນປີ 2024. ມາຮອດປັດຈຸບັນ, ການກໍ່ສ້າງໂຄງການດັ່ງກ່າວຢູ່ເບື້ອງລາວ ແມ່ນສໍາເລັດແລ້ວຫຼາຍກວ່າ 50%.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
Loading...