ໃນວັນທີ 28 ກັນຍາ 2022, ທ່ານ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ໄພວັນ ພູມິນພົນເສນາ, ຄົນເຊື້ອຊາດລາວ, ສັນຊາດ ອົດສະຕຣາລີ, ກໍາມະການສູນກາງແນວລາວສ້າງຊາດ ຢູ່ປະເທດ ອົດສະຕຣາລີ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໃນໂອກາດນີ້, ທ່ານ ຮອງລັດຖະມົນຕີ ຕິ່ງ ສຸກສັນ ໄດ້ສະແດງຄວາມຍິນດີຕ້ອນຮັບ ພ້ອມທັງສະແດງຄວາມຊົມເຊີຍຕໍ່ທ່ານ ນາງ ໄພວັນ ພູມິນພົນເສນາ ທີ່ໄດ້ມີບົດບາດທາງສັງຄົມຢູ່ປະເທດ ອົດສະຕຣາລີ ແລະ ເປັນຜູ້ໜຶ່ງທີ່ມີຄວາມຫ້າວ ຫັນໃນວຽກງານແນວລາວສ້າງຊາດ, ໃກ້ຊິດຕິດແທດ ແລະ ໃຫ້ການຊ່ວຍເຫຼືອສະຖານທູດລາວ ປະຈໍາ ອົດສະຕຣາລີ ແລະ ຊ່ວຍເຫຼືອນັກສຶກສາ ກໍ່ຄື ພະນັກ ງານຈາກບັນດາກະຊວງຕ່າງໆ ທີ່ໄປຍົກລະດັບການສຶກສາຢູ່ປະເທດດັ່ງກ່າວ, ພ້ອມທັງໄດ້ເຕົ້າໂຮມຄວາມສາມັກຄີ ແລະ ຂົນຂວາຍການຊ່ວຍເຫຼືອຈາກພີ່ນ້ອງຄົນເຊື້ອຊາດລາວຢູ່ ອົດສະຕຣາລີ ເຂົ້າມາຊ່ວຍເຫຼືອ ສປປ ລາວ ໃນໄລຍະຜ່ານມາ. ພ້ອມກັນນີ້, ທ່ານ ຮອງລັດຖະ ມົນຕີ ຍັງໄດ້ກ່າວເນັ້ນຕື່ມວ່າ ພັກ ແລະ ລັດຖະບານ ໄດ້ໃຫ້ຄວາມສໍາຄັນສູງຕໍ່ພີ່ນ້ອງຊາວລາວທີ່ອາໄສຢູ່ຕ່າງປະເທດ ໂດຍຖືວ່າເປັນວົງຄະນະຍາດແຫ່ງຊາດລາວ ທີ່ບໍ່ສາມາດຕັດແຍກອອກຈາກກັນໄດ້, ເປັນແຫຼ່ງກໍາລັງແຮງອັນໜຶ່ງໃນການສ້າງສາພັດທະນາປະເທດຊາດ, ເປັນປັດໃຈທີ່ສໍາຄັນໃນການເປີດກວ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ກັບບັນດາປະເທດທີ່ເຂົາເຈົ້າອາໄສຢູ່ ກໍ່ຄື ອົງການຈັດຕັ້ງສາກົນຕ່າງໆ.
ໃນຂະນະດຽວກັນ, ທ່ານ ນາງ ໄພວັນ ພູມິນພົນເສນາ ກໍ່ໄດ້ສະແດງຄວາມຂອບ ໃຈ ແລະ ຮູ້ບຸນຄຸນເປັນຢ່າງສູງຕໍ່ການຕ້ອນຮັບອັນອົບອຸ່ນຈາກພາກສ່ວນຕ່າງໆຂອງທາງການລາວ ທີ່ໄດ້ອໍານວຍຄວາມສະດວກໃຫ້ແກ່ການຢ້ຽມຢາມ ແລະ ເຮັດວຽກຂອງຄະນະຄົນເຊື້ອຊາດລາວຢູ່ ອົດສະຕຣາລີ ໃນຄັ້ງນີ້.
ຂ່າວໂດຍ: ກົມການຂ່າວ, ກະຊວງການຕ່າງປະເທດ
