ໃນວັນທີ 9 ກຸມພາ 2023, ທີ່ສະຖານເອກອັກຄະລັດຖະທູດຕວັກກີ້ ປະຈຳ ສປປ ລາວ, ທ່ານ ບຸນເຫຼືອພັນດານຸວົງ, ຮອງລັດຖະມົນຕີກະຊວງການຕ່າງປະເທດ ໄດ້ນຳພາຄະນະ ແລະ ຕາງໜ້າກະຊວງການຕ່າງປະເທດ ແຫ່ງ ສປປ ລາວ ເຂົ້າຮ່ວມເຊັນປຶ້ມໄຫວ້ອາໄລ ຕໍ່ເຫດການແຜ່ນດິນໄຫວ ຢູ່ ແຂວງກາຊຽນເທັບ, ປະເທດ ຕວັນກີ້ ເຊິ່ງເນື້ອໃນມີດັ່ງນີ້:
ພວກຂ້າພະເຈົ້າ ຮູ້ສຶກໂສກເສົ້າເສຍໃຈທີ່ຮັບຊາບກ່ຽວກັບເຫດການແຜ່ນດິນໄຫວທີ່ຮຸນແຮງທີ່ໄດ້ເກີດຂຶ້ນຢູ່ ແຂວງກາຊຽນເທັບ ຂອງ ຕວັກກີ, ໃນວັນທີ 6 ກຸມພາ 2023.
ໂດຍຕາງຫນ້າໃຫ້ກະຊວງການຕ່າງປະ ເທດ ແຫ່ງ ສາທາລະນະລັດ ປະຊາ ທິ ປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ແລະ ສະແດງຄວາມເຫັນໃຈຢ່າງເລິກເຊິ່ງ ມາຍັງທ່ານທູດ, ແລະ ຜ່ານທ່ານທູດ ໄປຍັງ ລັດ ຖະບານ ແລະ ປະຊາຊົນ ສາທາລະນະລັດຕວັກກີ, ໂດຍສະເພາະ ແມ່ນຄອບຄົວຂອງຜູ້ປະສົບເຄາະຮ້າຍຈາກຜົນກະທົບຂອງໄພພິບັດທຳມະຊາດທີ່ຮຸນແຮງນີ້.
ຂ້າພະເຈົ້າເຊື່ອຫມັ້ນວ່າ ດ້ວຍຄວາມປີຊາສາມາດຂອງການນຳພາ ແລະ ຄວາມພະຍາຍາມຢ່າງເຕັມທີ່ຂອງລັດຖະບານ, ປະຊາຊົນ ຕວັກກີ ຈະສາມາດຜ່ານຜ່າໄພພິບັດທຳມະຊາດນີ້ໄດ້ ແລະ ຟື້ນຟູພື້ນທີ່ ທີ່ໄດ້ຮັບຜົນກະທົບ ໃຫ້ກັບຄືນສູ່ສະພາບປົກກະຕິໄດ້ໂດຍໄວ.
ຂໍໃຫ້ດວງວິນຍານ ປະຊາຊົນຕວັກກີ ຜູ້ທີ່ໄດ້ຮັບເຄາະຮ້າຍ ຈົ່ງໄປສູ່ສຸຂະຕິດ້ວຍເຖີດ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
