ໃນວັນທີ 23 ພຶດສະພາ 2024 ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ພ້ອມ ດ້ວຍຄະນະຈາກຂະແໜງການທີ່ກ່ຽວຂ້ອງຂອງສູນກາງ ໄດ້ລົງໄປພົບປະເຮັດ ວຽກຮ່ວມກັບ ທ່ານ ພຸດພັນ ແກ້ວວົງໄຊ, ຮອງເຈົ້າແຂວງໆຫົວພັນ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງແຂວງຫົວພັນ ເພື່ອຮ່ວມກັນປຶກສາ ຫາລື, ກວດກາ ແລະ ເກັບກຳຂໍ້ມູນດ່ານທ້ອງຖິ່ນປ່າຮ່າງ, ເມືອງສົບເບົາ, ແຂວງຫົວພັນ ເພື່ອເກັບກຳຂໍ້ມູນລາຍ ງານຕໍ່ກອງປະຊຸມນາຍົກ-ຮອງນາຍົກລັດ ຖະມົນຕີໃນເດືອນມິຖຸນາ 2024 ເພື່ອພິຈາລະນາຍົກລະດັບຂຶ້ນເປັນດ່ານສາ ກົນ.
ດ່ານທ້ອງຖິ່ນປ່າຮ່າງ, ເມືອງສົບເບົາ, ແຂວງຫົວພັນ ເປັນດ່ານຊາຍແດນທາງບົກ, ໄດ້ຮັບການສ້າງຕັ້ງຂຶ້ນ ໃນວັນທີ 1 ມີນາ 1990, ຕັ້ງຢູ່ເຊິ່ງໜ້າກັບດ່ານລ່ອງເຊີບ, ເມືອງມົກເຈົ່າ, ແຂວງເຊີນລາ, ສສ ຫວຽດນາມ. ດ່ານທ້ອງ ຖິ່ນປ່າຮ່າງ ຕັ້ງຢູ່ຫ່າງຈາກເທດສະບານເມືອງສົບເບົາ ປະມານ 21 ກິໂລແມດ ແລະ ຫ່າງຈາກເທດສະບານເມືອງ ຊຳເໜືອ, ແຂວງຫົວພັນ ປະມານ 100 ກິໂລ ແມັດ. ການລົງໄປກວດກາ ແລະ ເກັບກໍາຂໍ້ມູນຄັ້ງນີ້ ເປັນການປະຕິບັດ ຕາມກົດໝາຍວ່າດ້ວຍຊາຍແດນແຫ່ງຊາດ; ດຳລັດວ່າດ້ວຍດ່ານຊາຍແດນ ແລະ ສະໜາມບິນສາກົນ ສະບັບເລກທີ 558/ລບ, ລົງວັນທີ 31 ທັນວາ 2018 ມາດຕາ 15 ແລະ ແຈ້ງ ການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 330/ຫສນຍ, ລົງວັນທີ 15 ກຸມພາ 2024. ການຍົກລະດັບດ່ານທ້ອງຖິ່ນປ່າຮ່າງ ຂຶ້ນເປັນດ່ານສາກົນ ຈະເປັນການປະກອບສ່ວນສ້າງສາຍພົວພັນມິດຕະພາບທີ່ດີກັບປະເທດເພື່ອນບ້ານ, ປະກອບສ່ວນອຳນວຍຄວາມສະດວກໃນການບໍລິການ, ຊຸກຍູ້ສົ່ງເສີມການແລກປ່ຽນສິນຄ້າ, ການລົງທຶນ, ການທ່ອງທ່ຽວຢູ່ພາຍໃນແຂວງຫົວພັນ ແລະ ພາກເໜືອຂອງ ສປປ ລາວ ໃຫ້ມີການຂະຫຍາຍຕົວ. ສ້າງສິ່ງອຳນວຍຄວາມສະດວກໃຫ້ແກ່ພົນລະເມືອງລາວ, ຫວຽດນາມ ແລະ ພົນລະເມືອງປະເທດທີສາມສາມາດເດີນທາງ ເຂົ້າ-ອອກ ຜ່ານດ່ານປ່າຮ່າງ ຢ່າງຖືກຕ້ອງຕາມລະ ບຽບກົດໝາຍຂອງ ສປປ ລາວ, ໂດຍສະເພາະເປັນປະ ເທດເຊື່ອມໂຍງກັບປະເທດລຸ່ມແມ່ນໍ້າຂອງ ແລະ ບັນດາ ປະເທດໃນພາກພື້ນ.
ໃນໂອກາດລົງເຄືືອນໄຫວເຮັດວຽກຄັ້ງນີ້ ນອກຈາກສຳຫຼວດກວດກາເບີ່ງພື້ນທີ່ຕົວຈິງແລ້ວ, ທ່ານຮອງລັດຖະ ມົນຕີກະຊວງ ການຕ່າງປະເທດ ຍັງໄດ້ຮັບຟັງການລາຍງານຈາກເຈົ້າໜ້າທີ່ຂອງແຂວງຫົວພັນ ພ້ອມທັງຮັບຟັງການປະ ກອບຄວາມຄິດເຫັນຂອງບັນດາຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ແລະ ທ້ອງຖິ່ນ, ເຫັນວ່າດ່ານດັ່ງ ກ່າວຍັງບໍ່ສາມາດປະຕິບັດໄດ້ຄົບຕາມ 15 ເງື່ອນໄຂທີ່ກຳນົດໄວ້ໃນດຳລັດ ວ່າດ້ວຍດ່ານຊາຍແດນ ແລະ ສະໜາມບິນ ສາກົນ, ເປັນຕົ້ນ: ສະຖານທີ່ເຮັດວຽກຂອງເຈົ້າໜ້າທີ່ຍັງບໍ່ພຽງພໍ, ຫໍພັກພະນັກງານ, ເຄື່ອງມືອຸປະກອນທີ່ຈຳເປັນ, ສາງ ເກັບມ້ຽນສິນຄ້າ, ນໍ້າປະປາ, ໄຟຟ້າ ແລະ ອື່ນໆ.
ສະນັ້ນ, ທ່ານຮອງລັດຖະມົນຕີ ຈຶ່ງໄດ້ຊີ້ນຳບັນດາຂະແໜງການທີ່ ກ່ຽວຂ້ອງຂອງສູນກາງ ແລະ ທ້ອງຖິ່ນຈົ່ງຮີບຮ້ອນປະສານສົມທົບກັນກໍ່ສ້າງພື້ນຖານໂຄງລ່າງຂອງດ່ານ, ການກະກຽມ ບຸກຄະລາກອນຂອງທຸກຂະແໜງການ, ຕອບສະໜອງເຄື່ອງມືອຸປະ ກອນຮັບໃຊ້ ແລະ ດ້ານອື່ນໆ, ໂດຍສະເພາະບາງ ເງື່ອນໄຂທີ່ຈຳ ເປັນໃນການບໍລິການໃຫ້ສາມາດຮອງຮັບໃນເບື້ອງຕົ້ນນີ້ກ່ອນ, ສ່ວນເງື່ອນໄຂອື່ນໆຈື່ງພັດທະນາໄປ ແຕ່ ລະບາດກ້າວໃຫ້ຄົບຕາມເງື່ອນໄຂມາດຕະຖານ ທີ່ໄດ້ກຳນົດໄວ້ໃນດຳລັດ ວ່າດ້ວຍ ດ່ານຊາຍແດນ ແລະ ສະໜາມບິນ ສາກົນ.
