ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນລະຫວ່າງວັນທີ 28-31 ພຶດສະພາ 2024, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ປະທານຄະນະອະນຸກໍາມະການເຕັກນິກຊາຍແດນຮ່ວມ ລາວ-ກໍາປູເຈຍ ຮ່ວມກັບ ທ່ານ ໄອ ວຸທີ, ຮອງລັດຖະມົນຕີປະຈໍາຄະນະກໍາມະການຊາຍແດນ ແຫ່ງ ຣາຊະອານາຈັກກໍາປູເຈຍ, ປະທານຄະນະອະນຸກໍາມະການເຕັກນິກຊາຍແດນຮ່ວມ ກໍາປູເຈຍ-ລາວ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ແລະ ແຂວງທີ່ກ່ຽວຂ້ອງຂອງທັງສອງຝ່າຍໄດ້ລົງກວດກາຊາຍແດນບາງຈຸດ ທີ່ນອນຢູ່ໃນຈໍານວນທີ່ໄດ້ສໍາຫຼວດແລ້ວ 86% ແຕ່ຍັງບໍ່ເປັນເອກະພາບການແກ້ໄຂ ຄື: ຈຸດຄາດກະທີ່ຕັ້ງຫຼັກໝາຍຊາຍແດນເລກທີ 002 ແລະ ຈຸດຄາດກະທີ່ຕັ້ງຫຼັກໝາຍເລກທີ 003 ຢູ່ ເມືອງມູນລະປະໂມກ ແລະ ເມືອງຈອມກະສານ, ບໍລິເວນຫຼັກໝາຍຊາຍແດນເລກທີ 033-033/3, 031-031/1 ແລະ 032-032/6 ຢູ່ ເມືອງໂຂງ ແລະ ເມືອງໂບໄຣໂອສະໄວແສນໃຈ, ທີ່ຂຶ້ນກັບແຂວງຈໍາປາສັກ, ສປປ ລາວ ແລະ ແຂວງຊຽງແຕງ ແລະ ແຂວງເພຣຍວິເຮຍ, ຣາຊະອານາຈັກກໍາປູເຈຍ.
ພາຍຫຼັງການລົງກວດກາຮ່ວມ, ປະທານຄະນະອະນຸກໍາມະການເຕັກນິກຊາຍແດນຮ່ວມຂອງທັງສອງຝ່າຍ ໄດ້ປະຊຸມປຶກສາຫາລືຜົນການກວດກາຢູ່ພື້ນທີ່ຕົວຈິງຮ່ວມກັນ ໂດຍໄດ້ແລກປ່ຽນທັດສະນະໃນການແກ້ໄຂບໍລິເວນຊາຍແດນດັ່ງກ່າວ ສອງຝ່າຍໄດ້ມີການແລກປ່ຽນທັດສະນະຢ່າງກົງໄປກົງມາ, ພາຍໃຕ້ບັນຍາກາດແຫ່ງຄວາມສາມມັກຄີ ແລະ ເຂົ້າອົກ-ເຂົ້າໃຈຊຶ່ງກັນ ແລະ ກັນ ອັນໄດ້ເຮັດໃຫ້ສອງຝ່າຍສາມາດສ້າງຄວາມຄືບໜ້າອັນສໍາຄັນ ໃນການແກ້ໄຂບັນຫາຊາຍແດນ ລະຫວ່າງສອງປະເທດຮ່ວມກັນ.
ໃນໂອກາດການເຄື່ອນໄຫວຮ່ວມກັນໃນຄັ້ງນີ້, ຄະນະຜູ້ແທນທັງສອງຝ່າຍໄດ້ເຂົ້າຮ່ວມພິທີປັກຫຼັກໝາຍຊາຍແດນ ເລກທີ 034 ເພື່ອເປັນສັນຍາລັກແຫ່ງການເລີ້ມຕົ້ນການກໍ່ສ້າງຫຼັກໝາຍຊາຍແດນແບບໃໝ່ ກໍຄືການບູລະນະຫຼັກໝາຍຊາຍແດນ ລະຫວ່າງສອງປະເທດ ລາວ ແລະ ກໍາປູເຈຍ ໃຫ້ມີຄວາມແໜ້ນໜາຖາວອນ ແລະ ໃຫຍ່ກວ່າເກົ່າ ເພື່ອປ່ຽນແທນຫຼັກໝາຍຊາຍແດນເກົ່າ ໂດຍການເຂົ້າຮ່ວມເປັນສັກຂີພິຍານຂອງຜູ້ຕາງໜ້າຂະແໜງການກ່ຽວຂ້ອງຂອງສູນກາງ ແລະ ອໍານາດການປົກຄອງທ້ອງຖິ່ນ ຂັ້ນແຂວງ, ເມືອງ ແລະ ບ້ານຊາຍແດນຂອງທັງສອງປະເທດ.
ການເຄື່ອນໄຫວຮ່ວມກັນຂອງຄະນະຜູ້ແທນຊາຍແດນ ຂອງສອງປະເທດໃນຄັ້ງນີ້ ແມ່ນພາຍໃຕ້ບັນຍາກາດແຫ່ງການຮ່ວມມືອັນດີ ລະຫວ່າງສອງປະເທດທີ່ນັບມື້ແໜ້ນແຟ້ນ, ເປັນການຜັນຂະຫຍາຍຕາມເຈດຕະນາລົມຂອງການນໍາຂັ້ນສູງ ກໍ່ຄືລັດຖະບານຂອງສອງປະເທດ ທີ່ຊຸກຍູ້ໃຫ້ສອງຝ່າຍ ຕັດສິນໃຈແກ້ໄຂບັນຫາຊາຍແດນທີ່ຍັງຄົງຄ້າງ ໃຫ້ມີຄວາມຄືບໜ້າຢ່າງຕໍ່ເນື່ອງ ແລະ ສໍາເລັດເທື່ອລະກ້າວ, ເປັນການຈັດຕັ້ງປະຕິບັດສົນທິສັນຍາ ວ່າດ້ວຍ ການກໍານົດຊາຍແດນປະເທດ ລະຫວ່າງ ສປປ ລາວ ແລະ ຣາຊະອານາຈັກກໍາປູເຈຍ ທີ່ໄດ້ລົງນາມໃນວັນທີ 13 ກຸມພາ 2023 ແລະ ຍັງເປັນການເຜີຍແຜ່ໃຫ້ອໍານາດການປົກຄອງທ້ອງ ຖິ່ນ ກໍຄືປະຊາຊົນຂອງສອງປະເທດ ເຂົ້າໃຈໄດ້ເຖິງຄວາມໝາຍຄວາມສໍາຄັນຂອງວຽກງານຊາຍແດນ ກໍ່ຄືຄວາມເອົາໃຈໃສ່ຂອງພັກ ແລະ ລັດຖະບານ ໃນການສ້າງຊາຍແດນລະຫວ່າງສອງປະເທດ ໃຫ້ມີຄວາມຈະແຈ້ງ ເປັນທີ່ຮັບຮູ້ໄດ້ງ່າຍສໍາລັບປະຊາຊົນ ແລະ ສ້າງຄວາມສະດວກໃຫ້ແກ່ເຈົ້າໜ້າທີ່ ໃນການຄຸ້ມຄອງຊາຍແດນ ແລະ ຫຼັກໝາຍຊາຍແດນ, ທັງເປັນການປະກອບສ່ວນເຂົ້າໃນການສ້າງຊາຍແດນ ລະຫວ່າງສອງປະເທດໃຫ້ກາຍເປັນຊາຍແດນແຫ່ງສັນຕິພາບ, ສະຖຽນລະພາບ, ມິດຕະພາບ, ການຮ່ວມມື ແລະ ການພັດທະນາທີ່ຍືນຍົງຢ່າງແທ້ຈິງ.
ທີ່ມາ: ກົມການຂ່າວ, ກະຊວງການຕ່າງປະເທດ