ໃນລະຫວ່າງວັນທີ 12-14 ສິງຫາ 2024 ນີ້, ທ່ານ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການ ກອງທັບປະຊາຊົນລາວ ພ້ອມຄະນະ ໄດ້ເດີນທາງຢ້ຽມຢາມ ແລະ ເຮັດວຽກຢູ່ຣາຊະອານາຈັກໄທ ຢ່າງເປັນທາງການ ໂດຍໃຫ້ການຕ້ອນຂອງ ທ່ານ ພົນເອກ ຊົງວິດ ໜຸນພັກດີ ຜູ້ບັນຊາການທະຫານສູງສຸດ ແຫ່ງຣາຊະອານາຈັກໄທ ພ້ອມຄະນະ.
ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນຢູ່ກອງບັນຊາການທະຫານສູງສຸດ ແຫ່ງຣາຊະອານາຈັກໄທ. ຈາກນັ້ນ, ກໍໄດ້ມີການພົບປະສອງຝ່າຍ ເພື່ອພ້ອມກັນຕີລາຄາຄືນໝາກຜົນການພົວພັນຮ່ວມມືໃນໄລຍະຜ່ານມາ ໂດຍສະເພາະແມ່ນການຮ່ວມມືກັນຕ້ານ ແລະ ສະກັດກັ້ນການກໍ່ຄວາມບໍ່ສະຫງົບຢູ່ຕາມບໍລິເວນຊາຍແດນຂອງສອງປະເທດ ເປັນຕົ້ນ ການສະກັດກັ້ນການລັກລອບເຂົ້າເມືອງຜິດກົດໝາຍ, ອາຊະຍາກໍາຂ້າມຊາດ, ການຄ້າຍາເສບຕິດ, ການຄ້າມະນຸດ, ການຄ້າຂາຍເຖື່ອນ, ການຄ້າອາວຸດ ແລະ ການກໍ່ອາຊະຍາກໍາຕ່າງໆ ທີ່ຜິດກົດໝາຍ. ຕໍ່ບັນຫາດັ່ງກ່າວ, ແມ່ນຈະໄດ້ພ້ອມກັນຈັດຕັ້ງປະຕິບັດ ແລະ ພ້ອມກັນຜ່ານຜ່າບັນຫາສີ່ງທ້າທາຍຢູ່ບໍລິເວນຊາຍແດນ, ຮັບປະກັນໄດ້ຄວາມສະຫງົບ ແລະ ຄວາມໜັ້ນຄົງໃຫ້ແກ່ປະຊາຊົນສອງຊາດ, ຜ່ານການຮັດແໜ້ນການຮ່ວມມື, ສອງກອງທັບໄດ້ເອົາໃຈໃສ່ປ້ອງກັນ ແລະ ປະກອບສ່ວນເຂົ້າໃນຂົງເຂດເສດຖະກິດ-ສັງຄົມ ຂອງສອງປະເທດໄດ້ຮັບການພັດທະນາດີຂຶ້ນເປັນກ້າວໆ ມີຜົນສໍາເລັດເປັນຮູບປະທໍາຫລາຍດ້ານ.
ໃນໂອກາດນີ້, ທ່ານ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບປະຊາຊົນລາວ ພ້ອມຄະນະ ກໍໄດ້ເຂົ້າຢ້ຽມຂໍ່ານັບ ທ່ານ ສຸທິນ ຄັງແສງ ລັດຖະມົນຕີວ່າການກະຊວງກະລາໂຫມ ຣາຊະອານາຈັກໄທ ຕື່ມອີກ.
ຂ່າວ-ພາບ: ພັນຕີ ສີປະພັນ ແກ້ວມະນີວົງ
