ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮອງລັດຖະມົນຕີກະຊວງສຶກສາທິການ ແລະ ກີລາ ໃຫ້ຄວາມກະຈ່າງແຈ້ງກ່ຽວກັບກໍລະນີນັກສຶກສາລາວທີ່ແຂວງຮ່າຕິ້ງລັກໜີກັບລາວ

ໃນຕອນບ່າຍມື້ນີ້ ວັນທີ 9 ເມສາ 2020, ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານ ຮສຈ ປອ ກອງສີ ແສງມະນີ, ຮອງລັດຖະມົນຕີກະຊວງສຶກສາທິການ ແລະ ກີລາ, ກຳມະການຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ຖະແຫລງຕໍ່ສື່ມວນຊົນ ເຖິງກໍລະນີ ມີນັກສຶກສາລາວ ລັກອອກຈາກຫໍພັກໂຮງຮຽນ ຢູ່ສະຖານການສຶກສາທີ່ ສສ ຫວຽດນາມ ວ່າ: ອີງຕາມໜັງສືແຈ້ງການຂອງພະແນກພົວພັນຕ່າງປະເທດ ຂອງແຂວງຮ່າຕິ້ງ, ສສ ຫວຽດນາມ, ແລະ ໜັງສືລາຍງານຈາກສະຖານກົງສູນໃຫ່ຍຂອງ ສປປ ລາວ ປະຈໍານະຄອນດານັງ ສສ ຫວຽດນາມ ໃຫ້ຮູ້ວ່າ ມີນັກສຶກສາລາວ ຈໍານວນ 151 ຄົນ ໄດ້ລັກອອກຈາກຫໍພັກໂຮງຮຽນ ເພື່ອເດີນທາງກັບ ສປປ ລາວ ເຊິ່ງນັກສຶກສາຈໍານວນດັ່ງກ່າວ ມາຈາກ 3 ສະຖານການສຶກສາຄື: ມະຫາວິທະຍາໄລຮ່າຕິ້ງ 70ຄົນ, ວິທະຍາໄລການແພດຮ່າຕິ້ງ 53 ຄົນ ແລະ ວິທະຍາໄລເຕັກນິກຫວຽດ-ເຍຍລະມັນ 28 ຄົນ, ໃນນີ້ເປັນນັກສຶກສາ ແຂວງຄໍາມ່ວນ 52 ຄົນ, ຊຽງຂວາງ 26 ຄົນ, ນະຄອນຫລວງວຽງຈັນ 18 ຄົນ, ຈໍາປາສັກ 12 ຄົນ, ສະຫວັນນະເຂດ 10 ຄົນ, ແຂວງວຽງຈັນ 10 ຄົນ, ໄຊສົມບູນ 9 ຄົນ, ບໍລິຄໍາໄຊ 3 ຄົນ, ສາລະວັນ 3 ຄົນ, ໄຊຍະບູລີ 2 ຄົນ, ຜົ້ງສາລີ 2 ຄົນ, ຫົວພັນ 2 ຄົນ, ອັດຕະປື 1 ຄົນ ແລະ ຫລວງພະບາງ 1 ຄົນ.

ທ່ານຮອງລັດຖະມົນຕີກະຊວງສຶກສາທິການ ແລະ ກີລາ ກ່າວຕື່ມວ່າ: ຕໍ່ການກະທໍາດັ່ງກ່າວ ຖືວ່າເປັນການລະເມີດຕໍ່ຄໍາສັ່ງ, ແຈ້ງການ ແລະ ລະບຽບຂອງລັດຖະບານ ສສ ຫວຽດນາມ, ລັດຖະບານ ສປປ ລາວ , ແຂວງຮ່າຕິ້ງ ແລະ ສະຖານການສຶກສາ ກ່ຽວກັບການປະຕິບັດມາດຕະການປ້ອງກັນ, ຄວບຄຸມ, ແລະ ແກ້ໄຂການແຜ່ລະບາດຂອງເຊື້ອພະຍາດ ໂຄວິດ-19 , ເພື່ອເປັນການປ້ອງກັນ ແລະ ຄວບຄຸມພະຍາດ ໂຄວິດ-19 ທີ່ກໍາລັງແຜ່ລະບາດ ແລະ ມີຄວາມສ່ຽງສູງຕໍ່ສຸຂະພາບ ແລະ ຄວາມປອດໄພຂອງຄົນພາຍໃນສັງຄົມ, ກະຊວງສຶກສາທິການ ແລະ ກິລາ ຈຶ່ງໄດ້ອອກແຈ້ງການສະບັບໜຶ່ງ ທີ່ມີເນື້ອໃນດັ່ງນີ້: – ໃຫ້ພະແນກສຶກສາທິການ ແລະ ກີລາແຂວງ, ນະຄອນຫລວງ ລາຍງານການນໍາແຂວງນະຄອນຫລວງ ປະສານສົມທົບກັບພະແນກການຕ່າງປະເທດຂອງແຂວງ ແລະ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຢູ່ຂັ້ນທ້ອງຖິ່ນ ກ່ຽວກັບສະພາບນັກສຶກສາລາວທີ່ກໍາລັງສຶກສາຢູ່ ສສ ຫວຽດນາມ ແລະ ໄດ້ເດີນທາງກັບ ສປປ ລາວ. – ຮຽກຮ້ອງມາຍັງນັກສຶກສາ, ພໍ່ແມ່-ຜູ້ປົກຄອງ ຈົ່ງໃຫ້ການຮ່ວມມື ສຶກສາອົບຮົມລູກຫລານຂອງຕົນ ຜູ້ທີ່ບໍ່ທັນກັບລາວ ໃຫ້ປະຕິບັດຕາມຄໍາສັ່ງ ແລະ ກົດໝາຍຂອງປະເທດເຈົ້າພາບ ກໍ່ຄື ຄໍາສັ່ງຂອງນາຍົກລັດຖະມົນຕີ ເລກທີ 06/ນຍ ລົງວັນທີ 26 ມິນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ການປ້ອງກັນການລະບາດ, ການຄວບຄຸມ ແລະການກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ-19 ຢ່າງເຂັ້ມງວດ; ສໍາລັບນັກສຶກສາລາວທີ່ກັບລາວແລ້ວ ໃຫ້ປະຕິບັດມາດຕະການຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດ ໂຄວິດ-19 ຢ່າງເຂັ້ມງວດ ເພື່ອຮັບປະກັນຄວາມປອດໄພຂອງຕົນເອງ, ຄອບຄົວ, ສັງຄົມ ແລະ ປະເທດຊາດ. – ໃຫ້ນັກສຶກສາທີ່ກໍາລັງສຶກສາຢູ່ສະຖານການສຶກສາແຫ່ງຕ່າງໆຂອງ ສສ ຫວຽດນາມ ໃຫ້ສືບຕໍ່ຢູ່ພາຍໃຕ້ການຄຸ້ມຄອງຂອງສະຖານການສຶກສາ, ບໍ່ໃຫ້ມີການເຄື່ອນຍ້າຍໄປມາ ຕາມທິດຊີ້ນໍາຂອງລັດຖະບານ ແລະ ໃຫ້ປະຕິບັດຕາມມາດຕະການການປ້ອງກັນຂອງປະເທດເຈົ້າພາບຢ່າງເຂັ້ມງວດ, ຈົນກວ່າສະພາບການແຜ່ລະບາດຂອງເຊື້ອພະຍາດໂຄວິດ-19 ຈະຜ່ອນຄາຍລົງ. – ສໍາລັບນັກສຶກສາລາວທີ່ກໍາລັງສຶກສາຢູ່ປະເທດອື່ນໆ ນອກຈາກ ສສ ຫວຽດນາມ ແມ່ນໃຫ້ສືບຕໍ່ປະຕິບັດຕາມທິດຊີ້ນໍາຂອງລັດຖະບານ, ສະຖານທູດລາວ, ແລະ ມາດຕະການປ້ອງກັນຂອງປະເທດເຈົ້າພາບຢ່າງເຂັ້ມງວດ.