ໂດຍຕອບສະໜອງການເຊື້ອເຊີນ ຂອງ ທ່ານ ນ. Alice Mak, ຫົວຫນ້າທະບວງພາຍໃນ ແລະ ຊາວໜຸ່ມ, ເຂດປົກຄອງພິເສດ ຮົງກົງ ສປ ຈີນ, ໃນວັນທີ 10 ສິງຫາ 2024 ທ່ານ ກິ່ງມະໂນ ພົມມະຫາໄຊ, ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ນໍາພາຄະນະຜູ້ແທນ ແລະ ນັກສຶກສາລາວ ເຂົ້າ ຮ່ວມກອງປະຊຸມສຸດຍອດການພັດທະນາຊາວໜຸ່ມ ພາຍໃຕ້ຫົວຂໍ້: “Set Sail New Horizon” ໂດຍການເຂົ້າຮ່ວມ ແລະ ກ່າວມີຄໍາເຫັນເປີດກອງປະຊຸມ ຂອງ ທ່ານ ຈອນ ລີ (Mr. Jonh KC Lee), ຫົວໜ້າຄະນະບໍລິຫານງານເຂດປົກຄອງພິເສດ ຮົງກົງ ສປ ຈີນ ແລະ ການເຂົ້າຮ່ວມຂອງຄະນະຜູ້ແທນຂັ້ນສູງຈາກ ສປ ຈີນ, ຊາອຸດິ ອາລະເບຍ ແລະ ມາເລເຊຍ, ຂະແໜງການກ່ຽວຂ້ອງ ແລະ ພາກທຸລະກິດຂອງເຂດປົກຄອງພິເສດດັ່ງກ່າວ, ລວມທັງຄູອາຈານ ແລະ ນັກສຶກສາຈາກບັນດາປະເທດ ຫຼາຍກວ່າ 1.000 ຄົນ.
ໃນກອງປະຊຸມສຸດຍອດການພັດທະນາຊາວໜຸ່ມດັ່ງກ່າວ, ທ່ານຮອງລັດຖະມົນຕີ ກິ່ງມະໂນ ພົມມະຫາໄຊ ໄດ້ຂຶ້ນກ່າວມີຄໍາເຫັນແລກປ່ຽນຕໍ່ກອງປະຊຸມ ກ່ຽວກັບ 5 ຍຸດທະສາດສໍາລັບການພັດທະນາຊາວຫນຸ່ມ ແລະ ເຍົາວະຊົນ ຂອງ ສປປ ລາວ ຄື: 1. ການສຶກສາ, ກິລາ ແລະ ການຝຶກອົບຮົມ; 2. ສຸຂະພາບ ແລະ ສະຫວັດດີການ; 3. ວຽກເຮັດງານທໍາ ແລະ ການປະກອບການ; 4. ພັນທະພົນລະເມືອງ ແລະ ການມີສ່ວນຮ່ວມ; ແລະ 5. ການປົກປ້ອງທາງສັງຄົມ, ເຊິ່ງບັນດາຍຸດທະສາດດັ່ງກ່າວຈະສາມາດຈັດຕັ້ງປະຕິບັດໄດ້ຢ່າງເຕັມສ່ວນ ແລະ ສໍາເລັດຜົນຕາມຄາດຫມາຍໄດ້ນັ້ນ ແມ່ນຮຽກຮ້ອງໃຫ້ມີການຮ່ວມມື ແລະ ການປະສານສົມທົບຢ່າງກົມກຽວຂອງພາກສ່ວນກ່ຽວຂ້ອງພາຍໃນ, ລວມທັງການຮ່ວມມື ແລະ ສະຫນັບສະຫນູນຈາກເພື່ອນມິດສາກົນ. ສະນັ້ນ, ສປປ ລາວ ໄດ້ຖືສໍາຄັນ ແລະ ປະກອບສ່ວນຢ່າງຕັ້ງຫນ້າໃນການສົ່ງເສີມການຮ່ວມມືໃນວຽກງານການພັດທະນາຊາວຫນຸ່ມໃນຂອບການຮ່ວມມືຊາວຫນຸ່ມອາຊຽນ ເປັນຕົ້ນແມ່ນ ຂົງເຂດການສຶກສາ, ການຝຶກອົບຮົມທັກສະ ແລະ ການແລກປ່ຽນວັດທະນະທໍາ, ພ້ອມໄດ້ເຮັດວຽກຢ່າງຕັ້ງຫນ້າກັບສາກົນ ໃນການສົ່ງເສີມການສຶກສາໃນໄວຫນຸ່ມ, ການຝຶກອົບຮົມວິຊາຊີບ ແລະ ກາລະໂອກາດໃນການປະກອບການ. ໃນນາມປະທານອາຊຽນ 2024 ສປປ ລາວ ຖືສໍາຄັນໃນການເພີ່ມທະວີການເຊື່ອມໂຍງ ແລະ ຄວາມເຂັ້ມແຂງຂອງອາຊຽນ, ຮຽກຮ້ອງໃຫ້ທຸກພາກສ່ວນປະສານສົມທົບ ແລະ ເຮັດວຽກຮ່ວມກັນຢ່າງໃກ້ຊິດໃນວຽກງານການພັດທະນາຊາວຫນຸ່ມຈະເປັນຜູ້ສືບທອດການພັດທະນາຂອງຂົງເຂດພາກພື້ນ ແລະ ສາກົນໃນຕໍ່ຫນ້າ. ພ້ອມດຽວກັນນັ້ນ, ສປປ ລາວ ຢືນຢັນຄືນຄວາມຫມາຍຫມັ້ນໃນການເຮັດວຽກຮ່ວມກັນຢ່າງໃກ້ຊິດກັບລັດຖະບານ ສປ ຈີນ ກໍຄືເຂດປົກຄອງພິເສດ ຮົງກົງ ສປ ຈີນ ໃນການຜັນຂະຫຍາຍຂໍ້ລິເລີ່ມ: “ຫນຶ່ງແລວ ຫນຶ່ງເສັ້ນທາງ”, ໂດຍສະເພາະ ການຈັດຕັ້ງປະຕິບັດແຜນແມ່ບົດ ວ່າດ້ວຍ ການສ້າງຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ສະບັບໃໝ່ (2024-2028) ທີ່ໄດ້ຮັບການລົງນາມໃນເດືອນຕຸລາ 2023 ໃຫ້ເປັນຮູບປະທໍາເທື່ອລະກ້າວ.
ໃນໂອກາດເຂົ້າຮ່ວມກອງປະຊຸມສຸດຍອດການພັດທະນາຊາວຫນຸ່ມ ຢູ່ ເຂດປົກຄອງພິເສດ ຮົງກົງ ສປ ຈີນ ຄັ້ງນີ້, ທ່ານຮອງລັດຖະມົນຕີ ກິ່ງມະໂນ ພົມມະຫາໄຊ ຍັງໄດ້ຢ້ຽມຢາມສອງຝ່າຍ, ເຊິ່ງ ໄດ້ພົບປະກັບ ຫົວຫນ້າທະບວງພາຍໃນ ແລະ ຊາວໜຸ່ມ, ຫົວຫນ້າທະບວງສຶກສາທິການ ແລະ ມູນນິທິ ຮົງກົງ-ອາຊຽນ ຂອງ ເຂດປົກຄອງພິເສດ ຮົງກົງ ສປ ຈີນ, ເຊິ່ງສອງຝ່າຍ ລາວ ແລະ ຂະແຫນງການກ່ຽວຂ້ອງຂອງເຂດປົກຄອງພິເສດດັ່ງກ່າວ ໄດ້ຢືນຢັນຄວາມໝາຍໜັ້ນໃນການປະສານສົມທົບ ແລະ ເຮັດວຽກຮ່ວມກັນຢ່າງໃກ້ຊິດ ເພື່ອຊຸກຍູ້ສົ່ງເສີມການພົວພັນ ແລະ ການຮ່ວມມືໃນວຽກວານພັດທະນາການສຶກສາ, ກິລາ, ຊາວໜຸ່ມ, ກໍຄືການສົ່ງເສີມການໄປມາຫາສູ່ເຊິ່ງກັນ ແລະ ກັນ ຂອງ ພາກລັດ ແລະ ປະຊາຊົນ ໃຫ້ມີບາດກ້າວຂະຫຍາຍຕົວໃຫມ່, ອັນຈະເປັນການສົ່ງເສີມການຮ່ວມມືດ້ານເສດຖະກິດ ກໍຄືການຄ້າ, ການລົງທຶນ ຢູ່ ສປປ ລາວ ແລະ ການສົ່ງສົ່ງເສີມການທ່ອງທ່ຽວ ລະຫວ່າງ ສປປ ລາວ ແລະ ເຂດປົກຄອງພິເສດ ຮົງກົງ ສປ ຈີນ ໃນຕໍ່ຫນ້າ.
ການຢ້ຽມຢາມເຂດປົກຄອງພິເສດ ຮົງກົງ ສປ ຈີນ ຄັ້ງນີ້ ຂອງ ຄະນະຜູ້ແທນລາວ ໄດ້ກາຍເປັນຂີດໝາຍສໍາຄັນສໍາລັບການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ເຂດປົກຄອງພິເສດ ຮົງກົງ ສປ ຈີນ ອັນໄດ້ເປັນການຊຸກຍູ້ສົ່ງເສີມການຈັດຕັ້ງປະຕິບັດ ແລະ ຜັນຂະຫຍາຍຜົນການຢ້ຽມຢາມທາງການ ຢູ່ ສປປ ລາວ ຂອງ ທ່ານ ຈອນ ລີ, ຫົວໜ້າຄະນະບໍລິຫານເຂດປົກຄອງພິເສດ ຮົງກົງ ສປ ຈີນ ໃນທ້າຍເດືອນກໍລະກົດ 2024 ທີ່ຜ່ານມາ ໃຫ້ເປັນຮູບປະທໍາເທື່ອລະກ້າວ, ໂດຍສະເພາະ ການຊຸກຍູ້ສົ່ງເສີມການພົວພັນ ແລະ ຍາດແຍ່ງການຮ່ວມມື ຈາກ ເຂດປົກຄອງພິເສດດັ່ງກ່າວ ໃຫ້ແກ່ ສປປ ລາວ ໃນຂະແໜງການສຶກສາ ກໍຄືການພັດທະນາການສຶກສາ ແລະ ຊາວໜຸ່ມ ໃນຕໍ່ໜ້າ.
