ໃນຕອນເຊົ້າຂອງວັນທີ 20 ທັນວາ 2023, ທີ່ ກະຊວງການຕ່າງປະເທດ, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີ ກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ແລະ ຍື່ນຈົດໝາຍແຕ່ງຕັ້ງຂອງ ທ່ານ ນາງ ຄະຢອງ ມີ ຄິມ(Kyung-Mee Kim) ເພື່ອມາເປັນ ຜູ້ຕາງໜ້າຄົນໃໝ່ ຂອງ ອົງການອາຫານ ແລະ ການກະເສດ (Food and Agriculture Organization ຫຼື FAO) ປະຈໍາ ສປປ ລາວ.
ໃນໂອກາດດັ່ງກ່າວ, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີ ກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງ ຜູ້ຕາງໜ້າຄົນໃໝ່ ອົງການ FAO ປະຈໍາ ສປປ ລາວ ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ການຮ່ວມມືທີ່ດີ ແລະ ການສະໜັບສະໜູນອັນລ້ຳຄ່າຂອງ ອົງການ FAO ຢູ່ ສປປ ລາວ ຕະຫລອດໄລຍະຜ່ານມາ. ໃນນັ້ນ, ທ່ານ ຮອງລັດຖະມົນຕີ ກະຊວງການຕ່າງປະເທດ ຍັງໄດ້ສະແດງຄວາມເຊື່ອໝັ້ນວ່າ ພາຍໃຕ້ການນໍາພາຂອງ ຜູ້ຕາງໜ້າຄົນໃໝ່, ອົງການ FAO ປະຈໍາ ສປປ ລາວ ຈະເພີ່ມທະວີການຮ່ວມມື ແລະ ສືບຕໍ່ໃຫ້ການສະໜັບສະໜູນແກ່ ສປປ ລາວ ໃນວຽກງານການພັດທະນາ ທີ່ສອດຄ່ອງກັບວຽກງານບຸລິມະສິດຕ່າງໆຂອງລັດຖະບານ ດັ່ງທີ່ໄດ້ກໍານົດໄວ້ຢູ່ໃນແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ແລະ ແຜນພັດທະນາແຫ່ງຊາດໃນຕໍ່ໜ້າ ໂດຍຜ່ານການຈັດຕັ້ງປະຕິບັດບັນດາກິດຈະກໍາ ແລະ ໂຄງການຕ່າງໆ ກໍ່ຄື ແຜນຍຸດທະສາດການຮ່ວມມື ລະຫວ່າງ ລັດຖະບານ ສປປ ລາວ ແລະ ອົງການ FAO (2022-2026), ເຊິ່ງມີມູນຄ່າ ປະມານ 33 ລ້ານ ໂດລາສະຫະລັດ. ພ້ອມກັນນີ້, ທ່ານ ຮອງລັດຖະມົນຕີ ກໍໄດ້ຮຽກຮ້ອງໃຫ້ ອົງການ FAO ປະຈໍາ ສປປ ລາວ ສືບຕໍ່ປະກອບສ່ວນ ແລະ ສະໜັບສະໜູນຄວາມພະຍາຍາມຂອງລັດຖະບານ ໃນການຈັດຕັ້ງປະຕິບັດບຸລິມະສິດການພັດທະນາຂອງ ສປປ ລາວ ກໍ່ຄື ເປົ້າໝາຍການພັດທະນາແບບຍືນຍົງ ແລະ ວາລະການພັດທະນາອື່ນໆຂອງສາກົນ ລວມໄປເຖິງການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ໃນອະນາຄົດ.
ພ້ອມກັນນີ້, ທ່ານ ນາງ KIM Kyung Mee, ຜູ້ຕາງໜ້າຄົນໃໝ່ ອົງການ FAO ປະຈໍາ ສປປ ລາວ ເຊິ່ງ ເປັນຄົນສັນຊາດ ສ. ເກົາຫລີ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງ ທ່ານ ຮອງລັດຖະມົນຕີ ກະຊວງການຕ່າງປະເທດ ແລະ ສະແດງຄວາມຍິນດີທີ່ ລັດຖະບານແຫ່ງ ສປປ ລາວ ໄດ້ອະນຸມັດຮັບເອົາທ່ານ ເພື່ອມາປະຕິບັດໜ້າທີ່ອັນສຳຄັນຢູ່ ສປປ ລາວ. ພ້ອມກັນນັ້ນ, ຜູ້ຕາງໜ້າຄົນໃໝ່ ຍັງໄດ້ໃຫ້ຄໍາໝັ້ນສັນຍາວ່າ ຕົນເອງ ກໍ່ຄື ອົງການ FAO ປະຈໍາ ສປປ ລາວ ຈະສືບຕໍ່ເພີ່ມທະວີການຮ່ວມມືກັບ ລັດຖະບານແຫ່ງ ສປປ ລາວ ໃນການຈັດຕັ້ງປະຕິບັດແຜນງານຕ່າງໆ ຕາມພາລະບົດບາດຂອງອົງການເພື່ອສະໜັບສະໜູນ ບັນດາບຸລິມະສິດດ້ານການພັດທະນາຂອງ ສປປ ລາວ ຢ່າງຕັ້ງໜ້າ.
ໃນຕອນທ້າຍ, ທ່ານ ຮອງລັດຖະມົນຕີ ກະຊວງການຕ່າງປະເທດ ກໍແຈ້ງໃຫ້ ຜູ້ຕາງໜ້າຄົນໃໝ່ ອົງການ FAO ຊາບວ່າ ລັດຖະບານ ສປປ ລາວ ຈະສືບຕໍ່ໃຫ້ການສະໜັບສະໜູນ ແລະ ຮ່ວມມືກັບອົງການດັ່ງກ່າວຢ່າງໃກ້ຊິດ ໃນການຈັດຕັ້ງປະຕິບັດບັນດາແຜນວຽກຢູ່ ສປປ ລາວ ພ້ອມທັງອວຍພອນໃຫ້ ຜູ້ຕາງໜ້າຄົນໃໝ່ ຈົ່ງປະສົບຜົນສໍາເລັດໃນການປະຕິບັດໜ້າທີ່ຂອງຕົນຢູ່ ສປປ ລາວ ໃນຄັ້ງນີ້.
ອົງການອາຫານ ແລະ ການກະເສດ (FAO) ແມ່ນອົງການຈັດຕັ້ງສາກົນ ທີ່ເປັນເຄືອຂ່າຍໜ່ຶງຂອງອົງການ ສປຊ ທີ່ຖືກສ້າງຕັ້ງຂຶ້ນໃນປີ 1945 ແລະ ໄດ້ສ້າງຕັ້ງຫ້ອງການປະຈຳ ສປປ ລາວ ໃນປິ 1980, ເຊິ່ງມີໜ້າທີ່ໃຫ້ການຊ່ວຍເຫລືອດ້ານວິຊາການເຊັ່ນ: ຊ່ຽວຊານຂະແໜງປູກຝັງ, ປ່າໄມ້, ການປະມົງ ແລະ ສັດລ້ຽງ, ນັກໂພຊະນາການ, ນັກວິທະຍາສາດສັງຄົມ, ນັກເສດຖະສາດ, ນັກສະຖິຕິ ແລະ ນັກວິຊາການດ້ານອື່ນໆ ເພື່ອໃຫ້ການສະໜັບສະໜູນດ້ານການພັດທະນາ ໃຫ້ແກ່ບັນດາປະເທດໃນທົ່ວໂລກ ໂດຍໄດ້ໃຫ້ການຊ່ວຍເຫລືອປະຊາຊົນຫລາຍລ້ານຄົນໃນຈຳນວນ 130 ກວ່າປະເທດ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
