ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ ໄດ້ນຳພາຄະນະທູຕານຸທູດ ຈາກ 7 ປະເທດຄື: ບູນກາລີ, ອິນເດຍ, ຍີ່ປຸ່ນ, ສ.ເກົາຫລີ, ຕວັກເກຍ, ສສ. ຫວຽດນາມ ແລະ ຊຳບີ, ເຊິ່ງເປັນສະມາຊິກຄະນະກຳມະການມໍຣະດົກໂລກ (World Heritage Committee) ຂອງອົງການ ອຸຍແນັສໂກ ປະຈຳຢູ່ ປາຣີ, ທີ່ເດີນທາງມາຈາກປະເທດຝຣັ່ງ, ບູນກາລີ ແລະ ນະຄອນຫລວງວຽງຈັນ ເພື່ອຢ້ຽມຢາມ ແລະ ເຮັດວຽກຢູ່ນະ ຄອນຫຼວງພະບາງ ເມືອງມໍຣະດົກໂລກ ແລະ ເຂດໂຄງການກໍ່ສ້າງເຂື່ອນໄຟຟ້າ ໃນວັນທີ 20-22 ພຶດສະພາ 2024.
ຈຸດປະສົງຂອງການຢ້ຽມຢາມ ແລະ ເຮັດວຽກໃນຄັ້ງນີ້ ແມ່ນເພື່ອແລກປ່ຽນຂໍ້ມູນ ແລະ ບົດຮຽນອັນດີຈາກບັນດາປະເທດສະມາຊິກ ຄະນະກຳມະການມໍຣະດົກໂລກ ໃນການຄຸ້ມຄອງສະຖານທີ່ ມໍຣະດົກໂລກ ຂອງຕົນ ໂດຍສະເພາະການຄຸ້ມຄອງເມືອງມໍຣະດົກໂລກຫຼວງພະບາງ ຂອງ ສປປ ລາວ, ທັງເປັນການເພີ່ມທະວີມີຄວາມຮັບຮູ້ ແລະ ເຂົ້າໃຈ ຫຼາຍຂຶ້ນກວ່າເກົ່າ ກ່ຽວກັບສະພາບຄວາມເປັນຈິງ ແລະ ຄວາມຮຽກຮ້ອງຕ້ອງການຂອງໂຄງການພັດທະນາພື້ນຖານໂຄງລ່າງໃນແຂວງຫຼວງພະບາງ, ແນ່ໃສ່ຮັດແຫນ້ນການຮ່ວມມື ລະຫວ່າງບັນດາປະເທດສະມາຊິກ ອົງການອຸຍແນັສໂກ ທັງໃນຂອບຫຼາຍຝ່າຍ ແລະ ສອງຝ່າຍ ໃນອະນາຄົດ.
ໃນວັນທີ 20 ພຶດສະພາ 2024, ຄະນະຜູ້ແທນ ໄດ້ຢ້ຽມຊົມຫໍພິພິທະພັນແຫ່ງຊາດ ຫຼວງພະບາງ ແລະ ຕົວເມືອງມໍຣະດົກໂລກ ຫຼວງພະບາງ. ຈາກນັ້ນ, ໃນວັນທີ 21 ພຶດພະພາ 2024, ຄະນະຜູ້ແທນທັງໝົດ ໄດ້ເຂົ້າຮ່ວມ ກອງປະຊຸມສຳມະນາ ວ່າດ້ວຍ “ການຄຸ້ມຄອງເມືອງມໍຣະດົກໂລກຫຼວງພະບາງ”, ພາຍໃຕ້ການເປັນປະທານຮ່ວມຂອງ ທ່ານ ພະຂັນໄຊ ສີຄັນໄຊ, ຫົວ ໜ້າກົມມໍຣະດົກ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງ ທ່ຽວ ແລະ ທ່ານ ຄຳອິນ ຄິດຈະເດດ, ເອກອັກຄະລັດຖະທູດ ແລະ ຫົວໜ້າຫ້ອງການຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ອົງການອຸຍແນັສໂກ ທີ່ ນະຄອນຫຼວງປາຣີ, ປະເທດຝຣັ່ງ ໂດຍມີຫົວຫນ້າຫ້ອງວ່າການແຂວງ ແລະ ພະແນກການທີ່ກ່ຽວຂ້ອງພາຍໃນແຂວງຫຼວງພະບາງ ເຂົ້າຮ່ວມທັງໝົດຫຼາຍກວ່າ 30 ທ່ານ.
ໃນໂອກາດນີ້, ທ່ານ ໂພໄຊ ໄຂຄຳພິທູນ ໄດ້ໃຫ້ກຽດກ່າວເປີດກອງປະຊຸມ ໂດຍໄດ້ເນັ້ນວ່າ ລັດຖະບານ ແຫ່ງ ສປປ ລາວ ເວລາໃດ ກໍ່ມີຄວາມເອົາໃຈໃສ່ ແລະ ໃຫ້ຄວາມສຳຄັນ ໃນການຄຸ້ມຄອງ, ປົກປັກຮັກສາ ແລະ ບູລະນະສະຖານທີ່ທາງປະຫວັດສາດ, ທາງວັດທະນະທຳ ແລະ ທາງທຳມະຊາດ ກໍຄືຮີດຄອງປະເພນີອັນດີງາມຂອງປະເທດຕົນ ໃຫ້ມີຄວາມຍືນຍົງ ແລະ ຄົງຕົວ ເປັນຊັບສົມບັດຂອງຊາດ, ເປັນມໍຣະດົກໃຫ້ແກ່ລູກຫຼານ ກໍ່ຄື ປະຊາຊົນລາວບັນດາເຜົ່າ ແລະ ມວນມະນຸດ.
ຕະຫຼອດໄລຍະເວລາ 29 ປີ ທີ່ຜ່ານມາ ວຽກງານການຄຸ້ມຄອງມໍຣະດົກໂລກຫຼວງພະບາງ ໄດ້ເຕີບໃຫຍ່ຂະຫຍາຍຕົວຂຶ້ນເທື່ອລະກ້າວ, ສະຖານະເມືອງມໍຣະດົກໂລກພາຍໃຕ້ສົນທິສັນຍາມໍຣະດົກໂລກ ຂອງອົງການອຸຍແນັສໂກ ໄດ້ປະກອບສ່ວນສຳຄັນເປັນຢ່າງຍິ່ງ ໃນການປັບປຸງຊີວີດການເປັນຢູ່ຂອງປະຊາຊົນຊາວຫຼວງພະບາງ ກໍ່ຄືການພັດທະນາເສດຖະກິດ-ສັງຄົມ ຂອງແຂວງ ແລະ ຂອງປະເທດ ນັບມື້ນັບດີຂຶ້ນເປັນກ້າວໆມາ. ພ້ອມດຽວກັນນີ້, ທ່ານ ຍັງໄດ້ມີຄຳເຫັນ ໃຫ້ກອງປະຊຸມພ້ອມກັນແລກປ່ຽນ ແລະ ປຶກສາຫາລືຢ່າງກົງໄປກົງມາ ແລະ ສ້າງສັນ ເພື່ອພ້ອມກັນພັດທະນາ ແລະ ສະໜັບໜູນວຽກງານປົກປັກຮັກສາ ແລະ ອະນຸລັກ ມໍຣະດົກຂອງລາວ ກໍ່ຄື ມໍຣະດົກຂອງໂລກ ໃຫ້ໄປຄ່ຽງຄູ່ກັບການພັດທະນາແບບຍືນຍົງ ແລະ ການປະຕິບັດທີ່ດີຂອງສາກົນ.
ນອກຈາກນັ້ນ, ໃນຕອນບ່າຍຂອງວັນທີ 21 ແລະ ວັນທີ 22 ພຶດສະພາ, ທ່ານ ຮອງລັດຖະມົນຕີ ໂພໄຊ ໄຂຄໍາພິທູນ ໄດ້ສືບຕໍ່ນຳພາຄະນະຜູ້ແທນດັ່ງກ່າວ ລົງຢ້ຽມຢາມ ເຂື່ອນໄຟຟ້າ ໄຊຍະບູລີ ແລະ ໂຄງການກໍ່ສ້າງເຂື່ອນໄຟຟ້າຫຼວງພະບາງ ທີ່ກຳລັງຢູ່ໃນຂັ້ນຕອນການກໍ່ສ້າງຕາມລຳດັບ. ຕະຫລອດໄລຍະການເຄື່ອນໄຫວໃນຄັ້ງນີ້, ຄະນະຜູ້ແທນຕ່າງໆ ໄດ້ໃຫ້ຄວາມສົນໃຈຫລາຍ ໃນການປະກອບຄຳຄິດຄຳເຫັນ ແລະ ແລກປ່ຽນບົດຮຽນປະສົບການ ພ້ອມທັງໄດ້ສອບຖາມພາກລັດ ແລະ ຜູ້ພັດທະນາໂຄງການຢ່າງກົງໄປກົງມາ ແລະ ສ້າງສັນກ່ຽວກັບຂໍ້ມູນຕ່າງໆທີ່ຕິດພັນກັບໂຄງການກໍ່ສ້າງ ເຂື່ອນຫລວງພະບາງ ແລະ ການຄຸ້ມຄອງເມືອງມໍຣະດົກໂລກ ຫລວງພະບາງ.
ທີ່ມາ: ກົມການຂ່າວ, ກະຊວງການຕ່າງປະເທດ