ຮອງລັດຖະມົນຕີ ກະຊວງຍຸຕິທຳ ພ້ອມດ້ວຍຄະນະເຄື່ອນໄຫວຕິດຕາມ, ກວດກາ ແລະ ຊຸກຍູ້ ວຽກງານຍຸຕິທໍາ ຢູ່ແຂວງຫົວພັນ

ວັນທີ 27 ສິງຫາ 2024 ທ່ານ ບຸນທາ ຊົງເຢີທ່າວ, ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງຍຸຕິທຳ ພ້ອມ ດ້ວຍຄະນະ ໄດ້ລົງເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານຍຸຕິທໍາ ຢູ່ແຂວງຫົວພັນ, ເຊິ່ງການລົງມາເຄື່ອນໄຫວໃນຄັ້ງນີ້ທ່ານໄດ້ເຂົ້າພົບ ທ່ານ ຄຳແພງ ໄຊສົມແພງ ກຳມະການສູນ ກາງພັກ, ເລຂາພັກແຂວງ ເຈົ້າແຂວງຫົວພັນ ຢູ່ທີ່ຫ້ອງວ່າການແຂວງຫົວພັນ ເພື່ອລາຍງານບາງວຽກງານໃນການເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານຍຸຕິທຳຢູ່ພະແນກຍຸຕິທຳ ແລະ ຫ້ອງການຍຸຕິທຳ ໂດຍສະເພາະແມ່ນ ວຽກງານການໂຄສະນາເຜີຍແຜ່ກົດໝາຍ, ການຈັດຕັ້ງປະຕິບັດຄຳຕັດສິນຂອງສານ, ວຽກງານຍຸຕິທຳຮາກຖານ ແລະ ການປັບປຸງກົງຈັກການຈັດຕັ້ງຂອງຂະແໜງການຍຸຕິທຳ.

ຈາກນັ້ນ, ທ່ານ ບຸນທາ ຊົງເຢີທ່າວ, ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງຍຸຕິທຳ ພ້ອມດ້ວຍຄະນະໄດ້ລົງພົບປະໂອ້ລົມ ຄະນະພັກ, ຄະນະພະແນກພະແນກຍຸຕິທຳ ແລະ ພະນັກງານ-ລັດຖະກອນເຂົ້າຮ່ວມຢ່າງພ້ອມພຽງ. ທີ່ຫ້ອງປະຊຸມພະແນກຍຸຕິທຳແຂວງຫົວພັນ. ໃນກອງປະຊຸມທ່ານ ອານຸເດດ ສີຄຳໄຊ ກຳມະການພັກແຂວງ ຫົວໜ້າພະແນກຍຸຕິທຳ ໄດ້ລາຍ ງານສະພາບການເຄື່ອນໄຫວວຽກງານຍຸຕິທໍາ ໄລຍະ 6 ເດືອນຕົ້ນປີ ແລະ ທິດທາງແຜນການໃນຕໍ່ໜ້າ. ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບັນດາຂໍ້ຄົງຄ້າງທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂໃນຕໍ່ໜ້າ ແລະ ໃນໂອກາດນີ້ກໍໄດ້ຮັບຟັງການໂອ້ລົມຂອງ ທ່ານ ຮອງລັດຖະມົນຕີກະຊວງຍຸຕິທໍາ ຊຶ່ງທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພະແນກຍຸຕິທໍາແຂວງຍາດມາໄດ້ໃນໄລຍະຜ່ານມາ ພ້ອມທັງເນັ້ນໜັກໃຫ້ຄະນະພັກ, ຄະນະນຳ, ເອົາ ໃຈໃສ່ເພີ່ມທະວີສຶກສາອົບຮົມການເມືອງແນວຄິດ ໃຫ້ກວ້າງ ຂວາງ, ເລິກເຊິ່ງ, ຄົ້ນຄວ້າ, ເຊື່ອມຊຶມ, ກໍາແໜ້ນແນວທາງນະໂຍ ບາຍຂອງພັກ, ກົດໝາຍ ແລະ ລະບຽບການຂອງລັດ, ເອົາໃຈໃສ່ເຄື່ອນໄຫວຈັດຕັ້ງປະຕິບັດວຽກງານຂອງຕົນ ເປັນຕົ້ນ: ວຽກ ງານກວດກາ, ວຽກງານສ້າງ ແລະ ປັບປຸງກົດໝາຍ, ວຽກງານໂຄສະນາເຜີຍແຜ່ກົດໝາຍ, ວຽກງານສ້າງບຸກຄະລາກອນທາງດ້ານກົດໝາຍ, ວຽກງານບໍລິການທາງດ້ານກົດໝາຍ, ເພີ່ມທະວີຄວາມສາມັກຄີ ແລະ ເປັນເອກະພາບພາຍໃນ, ຍົກສູງສະຕິຕໍ່ການຈັດຕັ້ງ, ຄວາມເປັນເຈົ້າການ, ຄວາມເປັນແບບຢ່າງ ແລະ ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ຂອງຕົນໃຫ້ສຳເລັດຕາມລະດັບຄາດໝາຍ ແລະ ທິດທາງແຜນການທີ່ໄດ້ກຳນົດໄວ້.

ໃນໂອກາດການລົງເຄື່ອນໄຫວໃນຄັ້ງນີ້, ທ່ານຮອງລັດຖະມົນຕີພ້ອມດ້ວຍຄະນະ ຍັງໄດ້ລົງຕິດຕາມ, ຊຸກຍູ້ການຮຽນ-ການສອນກົດໝາຍຊັ້ນຕົ້ນ 3 ເດືອນໃຫ້ແກ່ພະນັກງານຫຼັກແຫ່ງຂັ້ນເມືອງ ແລະ ບ້ານຢູ່ເມືອງ ວຽງໄຊ, ແຂວງຫົວພັນຕື່ມອີກ.

ຂ່າວ – ພາບ: ພວງເພັດ ເພັດຍາວົງ