ຮອງລັດຖະມົນຕີ ກະຊວງປ້ອງກັນປະເທດ ຕ້ອນຮັບຄະນະ ຜູ້ແທນ ກະຊວງປ້ອງກັນປະເທດ ຣັດເຊຍ

ວັນທີ 28 ສິງຫາ 2024 ທີ່ກະຊວງປ້ອງກັນປະເທດ, ສະຫາຍ ພົນຕີ ປະສິດ ທ່ຽງທໍາ ຮອງລັດຖະມົນກະຊວງ ປ້ອງກັນປະເທດ ພ້ອມຄະນະ ໄດ້ຕ້ອນຮັບການເຂົ້າຢ້ຽມພົບປະ ຂອງສະຫາຍ ພັນເອກ ຕີໂມເຟບ ນີໂກລາຍ ເວິລາດີມີໂຣວິດ ຮອງຫົວໜ້າກົມ 6, ກົມໃຫຍ່ຮ່ວມມືສາກົນດ້ານການທະຫານ ກະຊວງປ້ອງກັນປະເທດ ແຫ່ງ ສ ຣັດເຊຍ ພ້ອມຄະນະ ໃນໂອ ກາດທີ່ເດີນທາງມາເຮັດວຽກຢູ່ ສປປ ລາວ ລະຫວ່າງວັນທີ 27 ສິງຫາ-2 ກັນຍາ 2024 ເພື່ອເຮັດວຽກຮ່ວມກັບກົມທີ່ກ່ຽວ ຂ້ອງຂອງ ກະຊວງປ້ອງກັນປະເທດ ແຫ່ງ ສປປ ລາວ ແລະ ຫ້ອງການຜູ້ຕາງໜ້າກະຊວງປ້ອງກັນ ແຫ່ງ ສ ຣັດເຊຍ ປະຈໍາລາວ.

ໃນໂອກາດນີ້, ສະຫາຍ ພົນຕີ ປະສິດ ທ່ຽງທໍາ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ສະຫາຍ ພັນເອກ ຕີໂມເຟບ ນີໂກລາຍ ເວິລາດີມີໂຣວິດ ພ້ອມດ້ວຍຄະນະ ທີ່ໄດ້ເຂົ້າພົບປະພ້ອມທັງທົບທວນຜົນຂອງການພົວພັນຮ່ວມມືຊ່ວຍ ເຫລືອ ເຊິ່ງກັນ ແລະ ກັນ ລະຫ່ວາງ ສອງກອງທັບ ລາວ-ຣັດ ເຊຍ, ຣັດເຊຍ-ລາວ ໃນໄລຍະຜ່ານມາ, ສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອມາແຕ່ດົນນານ ລະຫວ່າງສອງຊາດ, ສອງກອງທັບ ລາວ-ຣັດເຊຍ, ຣັດເຊຍ-ລາວ ໄດ້ມີການພັດທະນາ ແລະ ສືບຕໍ່ຂະຫຍາຍຕົວຢ່າງໜັກແໜ້ນ ໂດຍສະ ເພາະໃນຂົງເຂດການທະຫານ ກໍໄດ້ມີການສືບຕໍ່ພົວ ພັນຮ່ວມມືກັນຫລາຍຂຶ້ນ ເປັນຕົ້ນ ການແລກປ່ຽນຄະນະຜູ້ແທນນໍາກັນໃນຫລາຍລະດັບ ນັບແຕ່ຂັ້ນລັດຖະມົນຕີລົງຮອດ ຂັ້ນວິຊາການເຫລົ່າຮົບວິຊາສະເພາະ, ການຮ່ວມມືດ້ານຄວາມໝັ້ນຄົງ, ຮ່ວມມືໃນຂົງເຂດວຽກເກັບກູ້ລະເບີດເພື່ອມະນຸດສະທຳ, ກະຊວງປ້ອງ ກັນປະເທດ ສ ຣັດເຊຍ ໄດ້ໃຫ້ການຊ່ວຍເຫລືອໃນການກໍ່ສ້າງຊັບພະຍາກອນມະນຸດ, ພາຫະນະເຕັກນິກ ດ້ານການທະຫານ ແລະ ການນຳເອົາໜ່ວຍງານເກັບກູ້ລະເບີດສາກົນ ຂອງກຳລັງປະກອບອາວຸດແຫ່ງ ສ ຣັດເຊຍ ມາຊ່ວຍກວດກູ້ລະ ເບີດທີ່ຕົກຄ້າງຢູ່ ສປປ ລາວ ເຊິ່ງການຊ່ວຍເຫລືອດັ່ງກ່າວ ເປັນການປະກອບສ່ວນສໍາຄັນເຂົ້າໃນການປັບປຸງກໍ່ສ້າງກອງທັບປະຊາຊົນລາວ ໃຫ້ມີຄວາມເຂັ້ມແຂງ ແລະ ທັນສະໄໝ ເພື່ອຮັບປະກັນເຮັດສຳເລັດໜ້າທີ່ໃນການປົກປັກຮັກສາເອກະລາດ, ອຳນາດອະທິ ປະໄຕ ຂອງ ສປປ ລາວ.

ພ້ອມນີ້, ສະຫາຍ ພັນເອກ ຕີໂມເຟບ ນີໂກລາຍ ເວິລາດີມີໂຣວິດ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງ ສະຫາຍ ຮອງລັດຖະມົນຕີ ກະຊວງປ້ອງກັນປະເທດ ໃນຄັ້ງນີ້ ເຊິ່ງເປັນໂອກາດທີ່ດີໃນການເສີມສ້າງສາຍພົວພັນມິດຕະພາບ, ການຮ່ວມມື ລະຫວ່າງ ກະຊວງປ້ອງກັນປະເທດແຫ່ງ ສປປ ລາວ ແລະ ກະປ້ອງກັນປະເທດ ແຫ່ງ ສ ຣັດເຊຍ, ພ້ອມທັງລາຍງານຈຸດປະສົງການມາເຮັດວຽກໃນຄັ້ງນີ້ ໃຫ້ສະຫາຍຮອງລັດຖະມົນຕີກະຊວງປ້ອງກັນປະເທດ ຮັບຊາບ.

ຂ່າວ: ບຸນຊ້ອຍ