ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮອງລັດຖະມົນຕີ ກະຊວງສາທາລະນະສຸກ ລົງຢ້ຽມຢາມຕິດຕາມການປະຕິບັດໜ້າທີ່ຂອງຄະນະສະເພາະກິດຢູ່ແຂວງຫຼວງພະບາງ.

ວັນທີ່ 22 ເມສາ 2020 ນີ້, ຢູ່ ພະແນກ ສາທາລະນະສຸກ ແຂວງ ຫລວງພະບາງ ດ໋ອກເຕີ ບຸນແຝງ ພູມມະໄລສິດ ຮອງລັດຖະມົນຕີ ກະຊວງສາທາລະນະສຸກ ພ້ອມດ້ວຍຄະນະ ໄດ້ລົງຢ້ຽມຢາມຕິດຕາມການປະຕິບັດໜ້າທີ່ຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ໂຄວິດ-19, ໂດຍໃຫ້ກຽດຕ້ອນຮັບຂອງ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ຫົວໜ້າຄະນະສະເພາະກິດຂັ້ນແຂວງ ພ້ອມດ້ວຍ ທ່ານ ຄໍາສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງແລະ ບັນດາຄະນະສະເພາະກິດຂັ້ນແຂວງເຂົ້າຮ່ວມ.

ພິທີ ທ່ານ ຄໍາສອນ ພົງສະຫວັດດີ ໄດ້ລາຍງານສະພາບການຈັດ ຕັ້ງປະຕິບັດໜ້າທີ່ຂອງຄະນະສະເພາະກິດແຂວງຫຼວງພະບາງ ໃຫ້ທ່ານຮອງລັດຖະມົນຕີ ກະຊວງສາທາລະນະສຸກ ໄດ້ຮັບຊາບວ່າ: ຄະນະສະເພາະກິດຂັ້ນແຂວງ ຈິ່ງໄດ້ຜັນຂະຫຍາຍບັນດາຄຳສັ່ງ, ແຈ້ງການ, ຂໍ້ຕົກລົງຕ່າງໆຂອງຄະນະສະເພາະກິດແຫ່ງຊາດ, ຂອງກະຊວງສາທາ ແລະ ບັນດາພາກສ່ວນຕ່າງໆ ພ້ອມທັງມີການປະສານງານກັບແຕ່ລະພາກສ່ວນວາງແຜນໂຕຕອບຄື: ວຽກງານປະສານງານ, ວຽກງານເຝົ້າລະວັງ, ສອບສວນ, ວຽກງານເຝົ້າລະວັງແຮງງານຈາກຕ່າງປະເທດ ແລະ ຕິດຕາມຜູ້ສຳພັດໄກ້ສິດກັບຜູ້ຕິດເຊື້ອ, ວຽກງານປິ່ນປົວຄົນເຈັບຜ່ານມາ, ວຽກງານໂຄສະນາສຸຂະສຶກສາ, ການຂ້າເຊື້ອຕາມສະຖານທີ່ຕ່າງໆ ,ການລະດົມທືນ ແລະ ການຊ່ວຍເຫຼືອຕ່າງໆ.  ແຂວງຫຼວງພະບາງເລີ່ມມີກໍລະນີສົງໄສໃນທ້າຍເດືອນມີນາ 2020 ຍ້ອນມີການກວດພົບເຊື້ອຈາກຜູ້ນຳທ່ຽວກໍລະນີທີ່ 1 ທີ່ມາຫຼວງພະບາງ, ມີກໍລະນີເຂົ້າຄ່າຍນິຍາມ ແລະ ໄດ້ສອບສວນເກັບຕົວຢ່າງໄປກວດຢູ່ຫ້ອງວິເຄາະທັງໝົດ 63 ກໍລະ ນີ, ພົບເຊື້ອ 3 ກໍລະນີ, ຍິງ 1 ກໍລະນີ, ມີຜູ້ສຳພັດໃກ້ສິດກັບຜູ້ຕິດເຊື້ອທັງ 3 ກໍລະນີທັງໝົດ 51 ຄົນ ແລະ ບັນດາຜູ້ສຳພັດທັງໝົດແມ່ນຄົບກຳນົດຕິດຕາມ 14 ວັນແລ້ວ, ມາຮອດປັດຈຸບັນນີ້ຜູ້ຕິດເຊື້ອທັງ 3 ກໍລະນີ ແມ່ນມີອາການເບົາບາງ ແລະ ໄດ້ເກັບຕົວຢ່າງໄປກວດວິເຄາະຄືນ 2 ຄັ້ງ ຜົນກວດເປັນລົບ 2 ກໍລະນີລໍຖ້າກັບບ້ານ ແລະ ຕິດຕາມແຍກປ່ຽວຢູ່ບ້ານອີກ 14 ມື້.

ໃນໂອກາດນີ້, ດ໋ອກເຕີ ບຸນແຝງ ພູມມະໄລສິດ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ ຍ້ອງຍໍຊົມເຊີຍການນໍາແຂວງ, ຄະນະສະເພາະກິດ, ພະນັກງານແພດໜໍ, ພະນັກງານທຸກຂະແໜງການ, ນັກທຸລະກິດທັງພາຍໃນ ແລະ ຕ່າງ ປະເທດທີ່ມາລົງທຶນຢູ່ແຂວງຫຼວງພະບາງ ຕະຫລອດປະຊາຊົນບັນດາເຜົ່າທີ່ໃຫ້ການຮ່ວມມືປະຕິບັດຄໍາສັ່ງ ເລກທີ່ 06 ຂອງທ່ານນາຍົກລັດຖະມົມຕີ ວາງອອກຢ່າງເຂັ້ມງວດ ເຮັດໃຫ້ຫລວງພະບາງມີການປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ໂຄວິດ 19 ໄດ້ດີ ແລະ ການລົງມາເຮັດວຽກໃນຄັ້ງນີ້ ເພື່ອມາຕິດຕາມກວດກາສະຖານທີ່ຮອງຮັບຜູ້ຕິດເຊື້ອພະຍາດໂຄວິດ 19 ກໍຄືການຈັດຕັ້ງປະຕິບັດໜ້າທີ່ວຽກງານ ແລະ ການປິ່ນປົວ ຜູ້ທີ່ຕິດເຊື້ອໂຄວິດ 19 ຢູແຂວງຫຼວງພະບາງເປັນຄືແນວໃດ, ມີຂໍ້ດີ ແລະ ຂໍ້ຫຍຸ້ງຍາກແນວໃດແດ່ ເພື່ອເກັບກຳຂໍ້ມູນດັ່ງກ່າວນັ້ນນໍາໄປສະເໜີຕໍ່ຄະນະສະເພາະກິດແຫ່ງຊາດ ກໍຄືລັດຖະບານ ຊ່ວຍແກ້ໄຂ ແລະ ວາງແຜນໂຕຕອບກັບພະຍາດໂຄວິດ 19. ພາຍຫຼັງສໍາເລັດການພົບປະໂອ້ລົມກັບຄະນະສະເພາະກິດຂອງແຂວງແລ້ວ ທ່ານຮອງລັດຖະມົນຕີກະຊວງສາທາລະ ນະສຸກ ໄດ້ລົງຕິດຕາມກວດກາເບິ່ງສະຖານທີ່ຕຶກພິເສດເພື່ອຮອງຮັບ ຖ້າຫາກມີກໍລະນີແຜ່ລະບາດຂອງພະຍາດໂຄວິດ-19 ຢູ່ໂຮງໝໍ ແຂວງຫຼວງພະບາງ ແລະ ໄດ້ໄປຢ້ຽມຢາມສູນກັກບໍລິເວນ 14 ວັນ ຂອງແຮງງານລາວທີ່ກັບມາຈາກຕ່າງປະ ເທດ ຢູ່ສອງຈຸດຄື: ສູນໂຮງຮຽນ ບ້ານໜອງບົວຄໍາ ແລະ ສູນໂຮງຮຽນ ມສ ເມືອງຂາຍ ນະຄອນຫຼວງພະບາງຕື່ມອີກ ເພື່ອເປັນການຊຸກຍູ້ ແລະ ໃຫ້ກຳລັງໃຈແກ່ເຂົາເຈົ້າ.

 

ຂ່າວ: ວໍລະນຸດ ສີລິກຸນ