ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຮອງລັດຖະມົນຕີ ຖວທ ພົບປະສອງຝ່າຍກັບຄະນະຜູ້ແທນ ຫວຽດນາມ

ຕາມຂ່າວສານປະເທດລາວໃຫ້ຮູ້ວ່າ:  ເນື່ອງໃນໂອກາດສະເຫລີມສະຫລອງ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ຄົບຮອບ 40 ປີ, ໃນວັນທີ 17 ກໍລະກົດ 2017 ນີ້ ທີ່ນະຄອນຫລວງວຽງຈັນ, ທ່ານ ສະຫວັນຄອນ ລາຊະມຸນຕີ ຮອງລັດ ຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ພົບປະສອງຝ່າຍກັບ ທ່ານ ເວື່ອງ ຢຸ່ຍປ່ຽນ ຮອງລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ທີ່ມາຈັດຕັ້ງງານສັບ ປະດາວັດທະນະທຳ ແລະ ທ່ອງທ່ຽວ ຫວຽດນາມ ຢູ່ສປປ ລາວ ລະຫວ່າງວັນທີ 16-22 ກໍລະກົດ ນີ້.
ໃນໂອກາດດັ່ງກ່າວ, ທ່ານ ສະຫວັນຄອນ ລາຊະມຸນຕີ ໄດ້ສະແດງຄວາມຊົມເຊີຍ, ຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງທ່ານ ເວື່ອງ ຢຸ່ຍ ປ່ຽນ ພ້ອມຄະນະ ເຊິ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະ ພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະ ຊາຊົນສອງຊາດ ລາວ-ຫວຽດນາມ. ເວົ້າລວມ, ເວົ້າສະເພາະ ເປັນການຮັດແໜ້ນການພົວພັນຮ່ວມມືຮອບ ດ້ານ ລະຫວ່າງ ສອງກະຊວງວັດທະນະທຳ ແລະ ທ່ອງທ່ຽວ ລາວ-ຫວຽດນາມ ໃຫ້ໄດ້ຮັບການພັດທະນາ ແລະ ແຕກດອກອອກຜົນງອກງາມຍິ່ງໆຂຶ້ນ.
ພ້ອມດຽວກັນ, ທ່ານ ເວື່ອງ ຢຸ່ຍ ປ່ຽນ ກໍໄດ້ສະແດງຄວາມຂອບອົກຂອບໃຈ ຕໍ່ທ່ານ ສະຫວັນຄອນ ລາຊະມຸນຕີ ທີ່ໄດ້ສະຫລະເວລາອັນມີຄ່າໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງ ຂອງການເດີນທາງມາ ສປປ ລາວ ໃນຄັ້ງນີ້ ໃຫ້ທ່ານ ຊາບຕື່ມອີກ./.