ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 12 ມິຖຸນາ 2024 ນີ້, ທີ່ກະຊວງປ້ອງກັນປະເທດ, ທ່ານພົນຕີ ພັນແສງ ບຸນພັນ ຮອງຫົວຫນ້າ ກົມໃຫຍ່ເສນາທິການກອງທັບປະຊາຊົນລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະສີລະປະກອນກອງທັບແຫ່ງຣາຊະອານາຈັກໄທ ເຊິ່ງນຳໂດຍ ທ່ານ ພົນອາກາດເອກຊາກອນ ຕະວັນແຈ້ງ ຮອງເສນາທິການທະຫານກອງ ທັບໄທ, ພ້ອມດ້ວຍຄະນະ ເນື່ອງໃນໂອກາດທີ່ເດີ່ນທາງມາຢ້ຽມຢາມ ແລະ ສະແດງສີລະປະມິດຕະພາບແລກປ່ຽນວັດທະນະທຳກັບກອງສີລະປະກອນກອງທັບປະຊາຊົນລາວ ໃນລະຫວ່າງ ວັນທີ 11-13 ມິຖຸນາ 2024.
ໃນໂອກາດນີ້, ທ່ານພົນຕີ ພັນແສງ ບຸນພັນ ໄດ້ກ່າວຕ້ອນຮັບ ຢ່າງອົບອຸ່ນ ແລະ ຕີລາຄາສູງຕໍ່ການເດີນທາງມາຢ້ຽມຢາມ ແລະ ສະແດງມິດຕະພາບຢູ່ ສປປ ລາວໃນຄັ້ງນີ້ ເຊິ່ງເປັນການປະກອບສ່ວນສຳຄັນໃນການເສີມຂະຫຍາຍມູນເຊື້ອການຮ່ວມມືທີ່ດີລະຫວ່າງສອງ ກອງທັບ ລາວ-ໄທ, ເປັນການແລກປ່ຽນວັດທະນະທໍາ, ຮີດຄອງປະເພນີອັນດີງາມລະຫວ່າງສອງຊາດ, ສອງກອງທັບ, ຍັງເປັນການປຸກລະດົມ ກຳລັງໃຈໃຫ້ນາຍ ແລະ ພົນທະຫານໃຫ້ມີຄວາມຫ້າວຫັນໃນ ການຈັດຕັ້ງປະຕິບັດໜ້າທີ່ວຽກງານ, ໂຄສະນາເຜີຍແຜ່ມູນເຊື້ອ ຮີດຄອງປະເພນີ ວັດທະນະທຳທັງສ່ອງແສງໃຫ້ ເຫັນນໍ້າໃຈຄວາມສາມັກຄີ, ມິດຕະພາບລະຫວ່າງ ກອງທັບ ລາວ-ໄທ ໂດຍ ຜ່ານເນື້ອຮ້ອງທໍານອງເພງ ແລະ ເຕັກນິກການສະແດງ.
ຈາກນັ້ນ, ທ່ານ ພົນອາກາດເອກ ຊາກອນ ຕະວັນແຈງ ກໍໄດ້ສະແດງຄວາມຂອບອົກຂອບໃຈຕໍ່ທ່ານຮອງຫົວຫນ້າ ກົມໃຫ່ຍເສນາທິການກອງທັບປະຊາຊົນລາວ ກໍຄືຄະນະກົມໂຄສະນາອົບຮົມກົມໃຫຍ່ການເມືອງກອງທັບ ທີ່ໃຫ້ການຕ້ອນຮັບຢ່າງອົບອຸ່ນ ແລະ ມີຄວາມພາກພູມ ໃຈທີ່ໄດ້ນຳພາຄະນະສີລະປະກອນກອງທັບແຫ່ງຣາຊະອານາຈັກໄທມາສະແດງມິດຕະພາບຮັບໃຊ້ນາຍ ແລະ ພົນທະຫານໄດ້ຮັບຊົມ, ພ້ອມດຽວກັນ ນັ້ນສອງຝ່າຍຍັງໄດ້ປຶກສາຫາລືຂົງເຂດວຽກງານການພົວພັນຮ່ວມມື, ແລກປ່ຽນບົດຮຽນ ດ້ານຊາຍແດນ ແລະ ອື່ນໆ ທີ່ສອງ ຝ່າຍໃຫ້ຄວາມສົນໃຈ.
ໂດຍ: ໄພນາລິນ