ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຮອງຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບ ເອກອັກຄະລັດຖະທູດ ແຫ່ງ ອົດສະຕຣາລີ ປະຈຳ ສປປ ລາວ ແລະ ທູດພິດເສດທາງດ້ານການຄ້າຂອງອົດສະຕຣາລີ

​ໃນ​ຕອນ​ເຊົ້າຂອງ​ວັນ​ທີ 14 ພຶດສະພາ 2018 ທີ່​​ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ທ່ານ ສົມດີ ບຸນຄຸ້ມ, ຮອງຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຕ້ອນຮັບການ​ເຂົ້າ​ຢ້ຽມ​ຂໍ່ານັບ ​ຂອງ ທ່ານ ​Jean-Bernard Carrasco, ເອກອັກຄະລັດຖະທູດວິສາມັນຜູ້ມີອຳນາດເຕັມຂອງປະເທດອົດສະຕຣາລີປະຈຳ ສປປ ລາວ ແລະ ທ່ານ Dave Vosen ທູດພິດເສດທາງດ້ານການຄ້າ ຂອງອົດສະຕຣາລີ.

​​​​ໃນ​ໂອກາດ​ດັ່ງກ່າວ, ທ່ານ ສົມດີ ບຸນຄຸ້ມ, ຮອງຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ໄດ້ສະ​ແດງ​ຄວາມຍິນດີຕ້ອນຮັບ​ ທ່ານ Jean-Bernard Carrasco  ແລະ ທ່ານ Dave Vosen  ພ້ອມດ້ວຍຄະນະ ແລະໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງ ທ່ານ Dave Vosen  ຄັ້ງນີ້ ເຊິ່ງຈະເປັນການປະກອບສ່ວນອັນສຳຄັນເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດໃຫ້ແຕກດອກອອກຜົນຍິ່ງໆຂຶ້ນ.

ທ່ານ Jean-Bernard Carrasco ແລະ ທ່ານ Dave Vosen ​ໄດ້ສະ​ແດງ​ຄວາມຂອບໃຈ​ເປັນ​ຢ່າງ​ສູງ ທີ່​ໄດ້​ມີ​ໂອ​ກາດ​ເຂົ້າ​ຢ້ຽມ​ຂ່ຳ​ນັບ ທ່ານ ​​ຮອງຫົວໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ປປ ລາວ ແລະ ​ໄດ້​ແຈ້ງ​ເຖິງ​ຈຸດປະສົງ​ຂອງການມາຢ້ຽມຢາມລາວ ຂອງຄະນະຄັ້ງນີ້ແມ່ນເພື່ອປຶກສາຫາລືກ່ຽວກັບດ້ານນະໂຍບາຍການຕ່າງປະເທດ ແລະ ຄວາມໝັ້ນຄົງພາກພື້ນເພື່ອເປັນຂໍ້ມູນໃນການປັບປຸງປຶ້ມປົກຂາວກ່ຽວ​ກັບນະໂຍບາຍຕ່າງປະເທດຂອງອົດສະຕຣາລີ.

ທັງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງສອງປະເທດ ໃນລະຍະທີ່ຜ່ານມາ, ນອກນັ້ນຍັງໄດ້ແຈ້ງສະພາບການພັດທະນາເສດຖະກິດ-ສັງຄົມ ຢູ່​ແຕ່ລະ​ປະ​ເທດ​ໃຫ້​ກັນຊາ​ບ ແລະ ແລກປ່ຽນຄຳຄິດຄຳເຫັນກ່ຽວກັບສະພາບການທີ່ພົ້ນເດັ່ນຢູ່ໃນພາກພື້ນ ແລະ ສາກົນ ທີ່ທັງສອງຝ່າຍໃຫ້ຄວາມສົນໃຈ. ແຂກ ​ແລະ ​ເຈົ້າພາບສະ​ແດງ​ຄວາມ​ເປັນເອກະພາບກັນ​ວ່າ ຈະພ້ອມກັນຊຸກຍູ້​ເຮັດໃຫ້ການພົວພັນຮ່ວມ​ມືລະຫວ່າງສອງປະເທດໃຫ້ມີບາດກ້າວຂະຫຍາຍຕົວໃໝ່​ເພື່ອປະ​ກອບ​ສ່ວນ​ເຂົ້າ​ໃນ​ການ​ເສີມ​ຂະ​ຫຍາຍ​ສາຍ​ພົວ​ພັນ​ ລະ​ຫວ່າງ ສອງ​ປະເທດ ກໍຄືປະ​ຊາ​ຊົນ​ສອງ​ຊາດ ລາວ – ອົດສະຕຣາລີໃຫ້ມີບາດກ້າວຂະຫຍາຍຕົວໃໝ່ເພື່ອນຳເອົາຜົນປະໂຫຍດມາໃຫ້ແກ່ປະຊາຊົນສອງຊາດ ແລະ ເພື່ີອສັນຕິພາບ, ມິດຕະພາບ ແລະ ການຮ່ວມມືໃຫ້ພັດທະນາຢູ່ໃນພາກພື້ນ ແລະ ໃນໂລກ. ​

​ທ່ານ Jean-Bernard Carrasco ແລະ ທ່ານ Dave Vosen ໄດ້ເນັ້ນ​​ໜັກວ່າຕົນ​ເອງຈະພະຍາຍາມສືບ​ຕໍ່​ປະ​ຕິ​ບັດ​ໜ້າ​ທີ່ການທູດຂອງຕົນ​ ​ໃນ​ການ​​ເສີມຂະຫຍາຍສາຍພົວພັນລະຫວ່າງສອງປະເທດ ໃຫ້​ນັບ​ມື້​ນັບ​ມີການຂະຫຍາຍຕົວ ແລະ ມີ​ປະ​ສິດ​ທິ​ຜົນ​ຍິ່ງໆ​ຂຶ້ນ.