ພິທີຮອງຮັບແຜນງານການປັງປຸງຄວາມໝັ້ນຄົງດ້ານສຸຂະພາບ ໂດຍການສ້າງຄວາມເຂັ້ມແຂງຂອງລະບົບທີ່ຍືນຍົງ ແລະ ການຮ່ວມມືຫຼາຍພາກສ່ວນໃນ ສປປ ລາວ ໂດຍໄດ້ຮັບການສະໜັບສະໜູນຈາກ USAID ຜ່ານອົງການອະນາໄມໂລກ ( WHO )ໄດ້ຈັດຂຶ້ນວັນທີ 17 ມິຖຸນາ 2024 ທີ່ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ດຣ ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ, ທ່ານ ນາງ ແຮັດເຕີ ວາເຣຍອາວາ, ເອກອັກຄະລັດຖະທູດ ແຫ່ງ ສະຫະລັດອາເມລິກາ ປະຈຳ ສປປ ລາວ ແລະ ທ່ານ ດຣ ທິມ ອາມສະຕຣອງ,ຜູ້ຕາງໜ້າອົງການອະນາໄມໂລກປະຈຳສປປລາວ.
ດຣ ບຸນແຝງ ພູມມະໄລສິດ ກ່າວວ່າ: ” ການເພີ່ມທະວີຄວາມໝັ້ນຄົງດ້ານສຸຂະພາບ ແລະ ການປົກປ້ອງສຸຂະ ພາບຂອງປະຊາຊົນ ຖືເປັນບູລິມະສິດທີ່ສໍາຄັນອັນດັບໜຶ່ງຂອງສປປລາວ.” ເມື່ອອີງໃສ່ຂໍ້ມູນທາງດ້ານລະບາດວິທະຍາຈຶ່ງເຫັນໄດ້ວ່າໃນປີ 2023 ປະເທດລາວ ໄດ້ປະເຊີນໜ້າກັບການລະບາດຂອງພະຍາດ ແລະ ເຫດ ການສຸກເສີນທາງດ້ານສາທາລະນະສຸກຫຼາຍກວ່າ 30 ຄັ້ງ ຕໍ່ເຫດການດັ່ງກ່າວນັ້ນກະຊວງສາທາລະນະສຸກກໍຄືລັດຖະບານ ໄລຍະຜ່ານມາກໍໄດ້ສຸມໃສ່ການກໍານົດມາດຕະການກັນ ແລະ ຄວບຄຸມພະຍາດຕິດຕໍ່ກໍຄືເຫດການສຸກເສີນທາງດ້ານສາທາລະນະສຸກ ຢ່າງຕັ້ງໜ້າ ແລະ ຕໍ່ເນື່ອງ ເປັນຕົ້ນການສ້າງແຜນຄວາມກຽມພ້ອມໃນການໂຕ້ຕອບຕໍ່ການລະບາດຢ່າງເປັນປະຈໍາແຕ່ລະປີ ເພື່ອເສີມສ້າງຄວາມກຽມພ້ອມ ແລະ ຄວາມສາມາດໃນການຮອງຮັບຕໍ່ເຫດການສຸກເສີນດ້ານສາທາລະສຸກກໍ່ຄື ຄວາມໝັ້ນຄົງດ້ານສຸຂະພາບ. ພ້ອມດຽວກັນນີ້ຍັງໄດ້ນໍາເອົາບົດຮຽນ ແລະ ປະສົບ ການຈາກການຈັດຕັ້ງປະຕິບັດຕົວຈິງໃນໄລຍະຜ່ານມາ ເພື່ອມາຜັນຂະຫຍາຍເປັນແນວທາງໃນການກໍານົດແຜນຍຸດທະສາດ ທີ່ແທດເໝາະກັບສະພາບຕົວຈິງ ແລະ ພ້ອມທີ່ຈະນໍາໃຊ້ໃນຕໍ່ໜ້າ ເພື່ອສະໜັບສະໜູນໃຫ້ວຽກງານດັ່ງກ່າວທ່ວງທັນກັບພາກພື້ນ ແລະ ສາກົນເທື່ອລະກ້າວ.
ນອກຈາກນີ້ ສປປ ລາວ ກໍຍັງເປັນໜື່ງໃນບັນດາປະເທດພາຄີທີ່ຮັບຮອງເອົາກົດລະບຽບສາກົນດ້ານສາທາລະນະສຸກ (IHR) ເພື່ອຮັບປະກັນຄວາມໝັ້ນຄົງດ້ານສຸຂະພາບ ເຊິ່ງຖືເປັນວຽກງານທີ່ມີຄວາມໝາຍຄວາມສໍາຄັນ ແລະ ເປັນວາລະທີ່ສໍາຄັນຂອງຊາດ ທີ່ມີຄວາມຈໍາເປັນຕ້ອງໄດ້ປະຕິບັດຢ່າງເຄັ່ງຄັດເຊິ່ງມັນຮຽກຮ້ອງໃຫ້ທຸກພາກສ່ວນຮ່ວມກັນໃນການປະຕິບັດກົດລະບຽບດັ່ງກ່າວໃຫ້ມີປະສິດທິພາບ ຊຶ່ງໃນໄລຍະຜ່ານມາກໍມີຫຼາຍພາກສ່ວນທັງພາຍໃນ ແລະ ສາກົນທີ່ໄດ້ເຂົ້າມາມີສ່ວນ ຮ່ວມໃນການສະໜັບສະໜູນການຈັດຕັ້ງປະຕິບັດກົດລະບຽບດັ່ງກ່າວ.
USAID ເປັນໜື່ງໃນພາກສ່ວນທີ່ໄດ້ມີສ່ວນຮ່ວມໃນການສະໜັບສະໜູນຕໍ່ພາລະກິດສໍາຄັນນີ້ຢ່າງຕໍ່ເນື່ອງຕະຫຼອດມາ ແລະ ການສະໜັບໜູນຈາກ USAID ຄັ້ງນີ້ກໍ່ແມ່ນມີໝາຍທີ່ສໍາຄັນທີ່ຈະຊ່ວຍໃຫ້ ສປປ ລາວ ສາມາດບັນລຸແຜນການສ້າງຄວາມກຽມພ້ອມໃນການໂຕ້ຕອບການລະບາດຂອງພະຍາດກໍ່ຄືການປະຕິບັດກົດລະບຽບສາກົນດ້ານສຸຂະພາບ(IHR) ໂດຍຜ່ານການຈັດຕັ້ງປະຕິບັດແຜນງານແຫ່ງຊາດວ່າດ້ວຍຄວາມໝັ້ນຄົງດ້ານສຸຂະພາບ ປີ 2022-2025 ເພື່ອຮັບປະກັນໄດ້ຄວາມໝັ້ນຄົງດ້ານສຸຂະພາບໃນ ສປປ ລາວ ກໍ່ຄືໃນພາກພຶື້ນ ເປັນຕົ້ນແມ່ນການສ້າງຄວາມເຂັ້ມແຂງວຽກງານເຝົ້າລະວັງພະຍາດ, ການປະເມີນຄວາມສ່ຽງ, ການສ້າງຄວາມເຂັ້ມແຂງຂອງວຽກງານວິເຄາະ, ການຄົ້ນຫາການລະບາດ, ປ້ອງກັນ ແລະ ໂຕ້ຕອບຕໍ່ການລະບາດ, ການຫຼຸດຜ່ອນຄວາມສ່ຽງຈາກການລະບາດຂອງພະຍາດຕິດຕໍ່ຈາກສັດສູ່ຄົນ ແລະ ເຊື້ອຈຸລະຊີບຕ້ານຕໍ່ຢາຕ້ານເຊື້ອ, ລະບົບການຄຸ້ມຄອງເຫດການສຸກເສີນດ້ານສາທາລະນະສຸກ ລວມທັງໄພພິບັດທາງທຳມະຊາດ, ການສື່ສານເພື່ອຫຼຸດຜ່ອນຄວາມສ່ຽງ ແລະ ການມີສ່ວນຮ່ວມຈາກຫຼາຍຂະແໜງການ.
