ວັນ​ທີ 7 ພຶດສະພາ 2021 ນີ້ ທ່ານ ທອງພັນ ສຸກ​ສະຫວັດ ຮອງ​ເຈົ້າ​ເມືອງ ພ້ອມ​ດ້ວຍ​ຄະນະ​ສະ​ເພາະ​ກິດ​ຂັ້ນ​ເມືອງ ​ໄດ້​ລົງ​ໄປຊຸກຍູ້ ​ໃຫ້​ກຳລັງ​ໃຈ ​ແລະ ​ຕິດຕາມ​ກວດກາ ວຽກງານ​ການ​ຕ້ານ ​ແລະ ສະກັດ​ກັ້ນ ພະຍາດ​ໂຄ​ວິດ 19 ​ ຢູ່​ ຈຸດ​ກວດກາ ​ສົ້ນ​ຂົວຂ້າມ​ນ້ຳຂອງ  ​ເມືອງ​ເງິນ ​ແຂວງ ​ໄຊ​ຍະ​ບູລີ ກັບ ​ເມືອງ ປາກ​ແບ​ງ ​ແຂວງ ອຸດົມ​ໄຊ .

ການລົງ​ໄປ​ຕິດຕາມ​ກວດກາ ​​ວຽກງານ​ການ​ຕ້ານ ​ແລະ ສະກັດ​ກັ້ນ ພະຍາດ​ໂຄ​ວິດ 19  ​ແລະ ຕິດຕາມ​ການ​ຂົນ​ສົ່ງ​ສິນຄ້າ ຢູ່​ຈຸດ​​ກວດກາ ສົ້ນ​ຂົວຂ້າມ​ນ້ຳຂອງ ​ເມືອງ​ເງິນ – ປາກ​ແບ​ງ ໃນ​ຄັ້ງ​ນີ້ ທ່ານ​ໄດ້​ຮັບ​ຟັງ​ການ​ລາຍງານ​ການ​ປະຕິບັດໜ້າທີ່​ວຽກງານ​ຮອບດ້ານ ​ໃນ​ການ​ຕ້ານ​ແລະ ສະກັດ​ກັ້ນ​ພະຍາດ ​ໂຄ​ວິດ 19 ​ໂດຍ​ຫຍໍ້ ​ເຊິ່​ງ​ໄດ້​ຍົກ​ໃຫ້​ເຫັນ ດ້ານ​ດີ, ດ້ານ​ອອ່ນ, ຂໍ້ຄົງ​ຄ້າງ, ຂໍ້​ສະ​ເໜີ ຂອງ​ພະນັກງານ​ປະຈຳ​ຢູ່​ດ່ານ​ດັ່ງກ່າວ. ການຈັດ​ຕັ້ງ​ປະຕິບັດ ​​ແມ່ນປະຕິບັດຄໍາສັ່ງເລກທີ 15 ຂອງ​ທ່ານນາຍົກ, ຄຳ​ສັ່ງ​ຂອງ​ທ່ານ​ເຈົ້າ​​ແຂວງ ກໍ່ຄື​ຄຳ​ສັ່ງ​ຂອງ​ທ່ານ​ເຈົ້າ​ເມືອງ ​ເມືອງ​ເງິນ ຢ່າງ​ເຂັ້ມ​ງວດ ​. ​​ເປັນ​ຕົ້ນ ການ​ປິດ​ການ​ເຂົ້າ​ອອກ​ຂອງ​ປະຊາຊົນ. ຍົກ​ເວັ້ນ ການ​ຂົນສົ່ງ​ສິນຄ້າ ​ແມ່ນ​ປະຕິບັດ​ຕາມ  ແຈ້ງການ ຂອງກະຊວງໂຍທາທິການ ແລະຂົນສົ່ງ ສະບັບເລກທີ 242/ຍທຂ, ລົງວັນທີ 23 ເມສາ 2021 ບົນ​ພື້ນຖານ​ມາດ​ຕະການ​ປ້ອງ​ກັນ​ໂຄ​ວິດ 19 ຢ່າງເຂັ້ມງວດ. ​ເຊັ່ນ: ການ​ຂົນສົ່ງ​ສິນຄ້າ​ລະ​ຫວ່າງເມືອງ ຕໍ່ ​ເມືອງ ​ແມ່ນ​ຄະນະ​ສະ​ເພາະ​ກິດ​ຂັ້ນ​ເມືອງ​ອະນຸຍາດ, ການ​ຂົ່ນສົ່ງ​ສິນຄ້າ ​ໄປ​ຕ່າງ​ແຂວງ ​ແມ່ນ ຄະນະ​ສະ​ເພາ​ກິດ​ຂັ້ນ​ແຂວງ ​ເປັນ​ຜູ້​ອະນຸຍາດ: ສຳລັບ​ ການ​ຂົ່ນສົ່ງ​ສິນຄ້າໄປຕ່າງແຂວງແມ່ນໄປຄ່ຽນຖ່າຍກັນຢູ່ຈຸດກວດກາລະຫວ່າງແຂວງຕໍ່ແຂວງ,​ຍົກເວັ້ນ: ນໍ້າມັນເຊື້ອໄຟ.

ຈາກ​ນັ້ນ ທ່ານ ທອງພັນ ສຸກ​ສະຫວັດ ຮອງ​ເຈົ້າ​ເມືອງ ພ້ອມ​ດ້ວຍ​ຄະນະ​ສະ​ເພາະ​ກິດ​ຂັ້ນ​ເມືອງ ​ໄດ້​ລົງ​ໄປຊຸກຍູ້ ​ແລະ ຕິດຕາມ​ບ້ານ​ທີ​ມີ​ຄວາມ​ສ່ຽງສູງ ​ເປັນ​ຕົ້ນ​ແມ່ນ ບ້ານ​ປາກ​ແຄນ, ບ້ານ​ຫ້ວຍ​ເງີຍ ​ເພື່ອ​ໄປ​ປຸກລະດົມ​ສຶກສາ​ອົບຮົມ​ໃຫ້​ກຳລັງ​ໃຈ ບັນດາ​ຄະນະ​ສະ​ເພາະ​ກິດ​ຕ້ານ​ແລະ ສະກັດ​ກັ້ນ​ພະຍາດ​ໂຄ​ວິດ 19 ຂັ້ນ​ບ້ານ ​ໃນ​ການ​ປະຕິ​ບັດໜ້າທີ່ວຽກງານ ການ​ເຝົ້າ​ລະວັງ ຢູ່​ພາຍ​ໃນ​ບ້ານ​ຂອງ​ຕົນ ຕະຫຼອດ 24 ຊົ່ວ​ໂມງ.

ຕອນ​ທ້າຍ ກໍ່​ໄດ້​ໄປ​ຢ້ຽມຢາມ​ຄອບຄົວ​ປະຊາຊົນ​ທີ​ປູກໝາກລີ່​ນຈີ ຢູ່​ບ້ານ​ຫ້ວຍ​ເຜີ້ງ ທີ​ຖືກ​ຜົນ​ກະທົບ​ໃນ​ການ​ຂາຍ​ຜົນລະປູກບໍ່​ໄດ້ ​ເນືອງ​ຈາກ​ຜົນ​ກະທົບ​ຈາກ​ບັນຫາ ​ໂຄ​ວິດ 19 ລະບາດ. ​ເພື່ອ​ຫາ​ທາງ​ອອກ​ຊ່ວຍ​ປະຊາຊົນ​ບ້ານ​ດັ່ງກ່າວ.

 

​ຂ່າວ: ອິນ​ແປງ ​ແຫວນ​ຄຳ

Loading...