ໃນວັນທີ 10 ສິງຫາ 2022 ການນຳຂອງແຂວງ ສະຫວັນນະເຂດ ນຳໂດຍ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງ ແລະ ພະແນກການຕ່າງໆຂັ້ນແຂວງ ໄດ້ລົງຕິດຕາມສະພາບນ້ຳຖ້ວມ ແລະບ້ານທີ່ຖືກຜົນກະທົບຂອງເມືອງທ່າປາງທອງ ໂດຍການຕ້ອມຮັບຂອງທ່ານ ຄຳປະສົງ ຂົງຄຳ ເຈົ້າເມືອງ ທ່າປາງທອງ.
ໂອກາດນີ້ ກໍໄດ້ຮັບຟັງການລາຍ ໂດຍສັງເຂບ ຈາກ ທ່ານ ບຸນຍົງ ຍົດສີຟອງ ຮອງເຈົ້າເມືອງ ໄດ້ລາຍງານໃຫ້ຮູ້ວ່າໃນໄລຍະແຕ່ວັນທີ 6-9 ສິງຫາ 2022 ຢູ່ເມືອງທ່າປາງທອງ ໄດ້ເກີດມີສະພາບຝົນຕົກຕິດຕໍ່ກັນເຮັດໃຫ້ເກີດມີນໍ້າຂັງ ແລະ ຖ້ວມບ້ານເຮືອນ ລວມທັງເນື້ອທີ່ທຳການຜະລິດຂອງພໍ່ແມ່ປະຊາຊົນຈຳນວນໜຶ່ງ ຕາມສາຍນ້ຳເຊປ໋ອງ ຕໍ່ກັບສະພາບການດັ່ງກ່າວການນໍາຂອງເມືອງພ້ອມດ້ວຍຄະນະກໍາມະການຕ້ານໄພພິບັດຂັ້ນເມືອງ ໄດ້ລົງຕິດຕາມສະພາບນໍ້າຖ້ວມຢູ່ບ້ານທີ່ໄດ້ຮັບຜົນກະທົບ ແລະ ໄດ້ນຳໃຊ້ກຳລັງທະຫານ-ຕຳຫຼວດ, ພະນັກງານ-ລັດຖະກອນ ສຸມໃສ່ໃຫ້ການຊ່ວຍເຫຼືອພໍ່ແມ່ປະຊາຊົນເຮັດໃຫ້ມີຄວາມປອດໄພໂດຍພື້ນຖານ ປັດຈຸບັນສະພາບນ້ຳຢູ່ໃນເກນປົກກະຕິ; ຜ່ານການເກັບກຳຂໍ້ມູນເບື້ອງຕົ້ນບ້ານທີ່ໄດ້ຮັບຜົນກະທົບທັງໝົດ 09 ບ້ານ ມີ: ບ້ານຫ້ວຍໝື່ນ ຖ້ວມເຮືອນປະມານ 35 ຫຼັງ, ເລົ້າເຂົ້າ 20 ຫຼັງ ( ໄຫຼໄປກັບນ້ຳ 01 ຫຼັງ ), ວິດຖ່າຍ 30 ຫົວ, ນ້ຳບາດານ 31 ບໍ່, ໜອງປາ ແລະ ເນື້ອທີ່ນາ ຈຳນວນໜຶ່ງ. ບ້ານກຸດຮີ ( ຄຸ້ມກຸດລຳພັນ ), ຖ້ວມເຮືອນປະມານ 15 ຫຼັງ, ວັດ 01 ແຫ່ງ, ໜອງປາ ແລະ ເນື້ອທີ່ນາ ຈຳນວນໜຶ່ງ. ບ້ານທ່າສະລາຄຳ ຖ້ວມເຮືອນປະມານ 13 ຫຼັງ, ບ້ານພັກ 01 ຫຼັງ.
ບ້ານໂນນຈານ, ບ້ານໜອງກັນ, ບ້ານນາຫົວຄວາຍ, ບ້ານພູແສງຄຳ, ບ້ານໃໝ່ໂພສີ ( ຄຸ້ມໃໝ່ເຊ ) ແລະ ບ້ານທົ່ງປາງ ຖ້ວມເນື້ອທີ່ນາ, ໜອງປາ, ຝາຍລວມ ແລະ ພື້ນຖານໂຄງລ່າງຈຳນວນໜຶ່ງ. ດ້ານພື້ນຖານໂຄງລ່າງ: ມີຫົວຂົວຂາດ ແລະ ເປ້ເພຈຳນວນ 04 ແຫ່ງ, ໃນນັ້ນ, ຫົວຂົວຂາດ 03 ແຫ່ງ ( ຂົວເບເລບ້ານທ່າສະລາຄຳ 01 ແຫ່ງ, ຂົວເບຕົງແກ້ງແກບ ຢູ່ຈຸດກິໂລແມັດທີ 36 ມີ 01 ແຫ່ງ, ຂົວບ້ານຫ້ວຍໝື່ນຢູ່ຈຸດກິໂລແມັດທີ 42 ມີ 01 ແຫ່ງ ) ແລະ ຂົວເບເລບ້ານຫ້ວຍໝື່ນເປ້ເພໜັກ 01 ແຫ່ງ ບໍ່ສາມາດທຽວໄດ້ ພ້ອມນີ້ການນຳຂອງເມືອງກໍ່ໄດ້ຊຸກຍູ້ໃຫ້ອໍານາດການປົກຄອງບ້ານ ແລະ ພໍ່ແມ່ປະຊາຊົນ ຢູ່ໃນເຂດທີ່ມີຄວາມສ່ຽງ ຍົກຍ້າຍຄົນ, ສິ່ງຂອງ ແລະ ສັດລ້ຽງໄປຢູ່ຈຸດທີ່ສູງ. ສະພາບເສັ້ນທາງຄົມມະນາຄົມໃນບາງເຂດພົບຄວາມຫຍຸ້ງຍາກ. ລະດັບປະລິມານນໍ້າຝົນ: ໃນວັນທີ 09 ສິງຫາ 2022 ວັດແທກປະລິມານນໍ້າຝົນໄດ້ 135,5 ມິນລີແມັດ. ລາຍງານຂໍ້ມູນເບື້ອງຕົ້ນມູນຄ່າເສຍຫາຍທາງດ້ານເນື້ອທີ່ທໍາການຜະລິດກະສິກໍາ, ດ້ານພື້ນຖານໂຄງລ່າງ, ເສັ້ນທາງຄົມມະນາຄົມ ແລະ ດ້ານຜົນເສຍຫາຍອື່ນໆ ຍັງບໍ່ທັນສາມາດປະເມີນໄດ້ ແລະ ລາຍງານໃຫ້ທ່ານຮັບຊາບຕາມພາຍຫຼັງ. ຈາກນັ້ນ ກໍ່ໄດ້ລົງຕິດຕາມ ຊຸກຍູ້ ອຳນາດການປົກຄອງ ພ້ອມທັງລົງເບິ່ງຈຸດສະຖານທີ ທີ່ໄດ້ຮັບຜົນກະທົບ ແລະ ເສຍຫາຍຕາມຈຸດຕ່າງໆ ຕໍສະພາບການດັ່ງກ່າວ ການນຳຂອງແຂວງ ກໍ່ໄດ້ມອບເຄື່ອງເຫຼືອໃຫ້ເມືອງ ເພື່ອນຳໄປມອບ ແລະ ແຈກຍາຍໃຫ້ຄອບຄົວທີ່ໄດ້ຮັບຜົນກະທົບ ເຄື່ອງທີ່ນຳມາມອບໃນຄັ້ງນີ ປະກອບມີ ເຂົ້າສານຈຳນວນ 15 ສອບ ( 750 ກິໂລກຣາມ ), ນ້ຳດື່ມ 400 ແພັກ, ໝີ່ 15 ແກັດ, ປາກະປ໋ອງ 3 ແກັດ ແລະ ເຮືອ 01 ລໍາ ( ມອບໃຫ້ເມືອງນໍາໃຊ້ ) ໂດຍຕ່າງໜ້າໃຫ້ກຽດມອບຂອງທ່ານນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ຕ່າງໜ້າ ຮັບຂອງທ່ານຄໍາປະສົງ ຂົງຄໍາ ເຈົ້າເມືອງທ່າປາງທອງ.
Loading...