ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮອດວັນທີ 15 ຕຸລາ 2020 ທົ່ວໂລກມີຜູ້ຕິດເຊື້ອພະຍາດໂຄວິດ19 ທັງໝົດ 38,752,973ຄົນ

ມາຮອດວັນທີ 15 ຕຸລາ 2020, ທົ່ວໂລກມີ ລາຍງານການລະບາດ ຂອງເຊື້ອພະຍາດໂຄວິດ19 ທັງໝົດ 214 ປະເທດ/ເຂດ ມີຜູ້ຕິດເຊື້ອທັງໝົດ 38,752,973ຄົນ; ເສຍຊິວິດ 1,096,065ຄົນ ເຊິ່ງກວມເອົາ 2.83 % ຂອງຜູ້ຕິດເຊື້ອທັງໝົດ; ປົວດີ 29,098,677ຄົນ ເຊິ່ງກວມເອົາ 75.1 % ຂອງຜູ້ຕິດເຊື້ອທັງໝົດ; ປະເທດທີ່ມີການລາຍງານການຕິດເຊື້ອ ແລະ ເສຍຊີວິດຫຼາຍກວ່າໝູ່ ແມ່ນ ສະຫະລັດອາເມຣິກາ ເຊິ່ງມີຜູ້ຕິດເຊື້ອສະສົມ 8,145,010 ຄົນ, ເສຍຊີວິດສະສົມ 221,769ຄົນ;
ສ່ວນຢູ່ຂົງເຂດອາຊີຂອງພວກເຮົາກໍ່ແມ່ນປະເທດອິນເດຍທີ່ມີທ່າອ່ຽງໃນການຕິດເຊື້ອ COVID-19 ເພິ່ມຂຶ້ນ, ມີຜູ້ຕິດເຊື້ອສະສົມ 7,305,070ຄົນ ແລະ ຜູ້ຕິດເຊື້ອມື້ດຽວສູງເຖິງ 67,988ຄົນ; ໃນບັນດາກຸ່ມປະເທດອາຊຽນມາຮອດວັນທີ15 ຕຸລາ 2020 ມີຜູ້ຕິດເຊື້ອພະຍາດ COVID-19 ທັງໝົດ 803,265ຄົນ ແລະເສຍຊີວິດ19,629ຄົນ.
ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ພະຍາດ COVID-19 ຖະແຫລງຕອນເຊົ້າວັນທີ 15 ຕຸລານີ້ ເຖິງວຽກງານການເຝົ້າລະວັງ COVID-19ຢູ່ ສປປ ລາວວ່າ: ຮອດ 17 ໂມງ ວັນທີ 14 ຕຸລາ 2020 ທົ່ວປະເທດມີຜູ້ເດີນທາງເຂົ້າມາມີທັງໝົດ 2,050ຄົນ: ໃນນັ້ນຈຸດຜ່ານດ່ານລາວ-ໄທ 1,079ຄົນ ມີແຮງງານລາວກັບມາແຕ່ໄທ101ຄົນ; ຈຸດຜ່ານດ່ານລາວ-ຈີນ 184ຄົນ, ໃນນັ້ນ ແຮງງານລາວ 6 ຄົນ, ຈຸດຜ່ານດ່ານລາວ-ຫວຽດນາມ 614ຄົນເຊິ່ງ, ຈຸດຜ່ານດ່ານ ລາວ-ກຳປູເຈຍ 1ຄົນ ເຊິ່ງເປັນຄົນລາວ; ເດີນທາງຜ່ານສະໜາມບິນສາກົນວັດໄຕທັງໝົດ 172ຄົນ (ຄົນຈີນ 171 ຄົນ, ຄົນລາວ 1 ຄົນ); ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະໄດ້ເກັບຕົວຢ່າງທຸກໆຄົນມາກວດ ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14ວັນ.
ດຣ. ລັດສະໝີ ວົງຄຳຊາວ ໃຫ້ຮູ້ອີກວ່າ: ປະຈຸບັນທົ່ວປະເທດ ມີສູນຈໍາກັດບໍລິເວນທີ່ຍັງເປີດຢູ່ມີ ທັງໝົດ 35ສູນ, ມີຜູ້ຖືກຈຳກັດບໍລິເວນຢູ່ສູນ 2,599 ຄົນ, ຂະນະດຽວກັນ ໃນວັນທີ14 ຕຸລາ 2020, ໄດ້ເກັບຕົວຢ່າງມາກວດວິເຄາະທັງໝົດ 304ຄົນ,ໃນນັ້ນມີແຮງງານລາວມາແຕ່ໄທ 93ຕົວຢ່າງ,ແຮງງານຈີນ 161ຕົວຢ່າງ, ແຮງງານຫວຽດນາມ 25 ຄົນ, ບຸກຄົນທົ່ວໄປທີ່ບໍ່ມີອາການ 8 ຕົວຢ່າງແລະ ບຸກຄົນທົ່ວໄປທີ່ມີອາການ 17 ຕົວຢ່າງ; ຜົນກວດວິເຄາະທັງໝົດແມ່ນບໍ່ພົບເຊື້ອ, ໝາຍຄວາມວ່າໃນວັນທີ 14ຕຸລາ 2020 ບໍ່ມີຜູ້ຕິດເຊື້ອໃໝ່.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ14 ຕຸລາ2020 ໄດ້ເກັບຕົວຢ່າງມາກວດທັງໝົດ 59,194ຕົວຢ່າງ, ກວດພົບເຊື້ອສະສົມ 23ຄົນ. ສ່ວນຄົນເຈັບຕິດເຊື້ອພະຍາດ COVID-19 ກໍລະນີທີ 23 ແມ່ນຍັງສືບຕໍ່ປີ່ນປົວຢູ່ໂຮງໝໍມິດຕະພາບ ແລະ ມີອາການບໍ່ຮ້າຍແຮງ.