ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຮັບຮອງຈຸດສຸມພັດທະນາຜາສັງ ເປັນຕົວເມືອງນ້ອຍໃນຊົນນະບົດ ແຫ່ງທໍາອິດຂອງແຂວງວຽງຈັນ
ພິທີປະກາດຮັບຮອງຈຸດສຸມພັດທະນາຜາສັງ ເມືອງເຟືອງ ເປັນຕົວເມືອງນ້ອຍໃນຊົນນະບົດແຫ່ງທໍາອິດຂອງແຂວງວຽງຈັນ ຈັດຂຶ້ນໃນຕອນເຊົ້າວັນທີ 5 ມັງກອນ 2024 ທີ່ບ້ານຜາສັງ ໂດຍມີ ທ່ານ ຄໍາພັນ ສິດທິດໍາພາ, ເຈົ້າແຂວງວຽງຈັນ, ພ້ອມດ້ວຍບັນດາເຈົ້າເມືອງພາຍໃນແຂວງ, ແຂກຮັບເຊີນຈາກແຂວງໃກ້ຄຽງ, ພະນັກງານ ແລະ ປະຊາຊົນພາຍໃນຈຸດສຸມດັ່ງກ່າວເຂົ້າຮ່ວມ.
ຈຸດສຸມພັດທະນາຜາສັງ ແມ່ນໜື່ງໃນ 3 ຈຸດສຸມພັດທະນາຂອງແຂວງວຽງຈັນ, ມີທີ່ຕັ້ງຫ່າງຈາກເທດສະບານເມືອງເຟືອງ ໄປທາງທິດໃຕ້ປະມານ 36 ກິໂລແມັດ, ຕັ້ງຢູ່ລຽບເສັ້ນທາງເລກທີ 4501 ຂອງແຂວງ, ປະກອບມີ 10 ບ້ານຂື້ນກັບ, ມີ 156 ໜ່ວຍສາມັກຄີ, ມີໜ່ວຍພັກຮາກຖານບ້ານ ທີ່ຂຶ້ນກັບຄະນະພັກຮາກ ຖານທັງໝົດ 10 ໜ່ວຍພັກ, ມີ 2.415 ຄອບຄົວ, ມີພົນລະ ເມືອງທັງໝົດ 14.265 ຄົນ, ຍິງ 7.049 ຄົນ, ປະກອບມີ 5 ຊົນເຜົ່າຄື: ເຜົ່າລາວ, ເຜົ່າໄຕ,ເຜົ່າກຶມມຸ, ເຜົ່າມົ້ງ ແລະ ເຜົ່າອີວມຽນ.
ທ່ານ ບຸນທົງ ອາໄພວົງ, ກໍາມະການພັກເມືອງ, ຫົວໜ້າຈຸດສຸມພັດທະນາຜາສັງ ໄດ້ຂຶ້ນລາຍງານໃຫ້ຮູ້ກ່ຽວກັບສະພາບ ການພັດທະນາຈຸດສຸມຜາສັງ ເພື່ອກາຍເປັນຕົວເມືອງນ້ອຍໃນຊົນນະບົດ ແມ່ນເລີ່ມແຕ່ປີ 2018 ເປັນຕົ້ນມາ ຕາມ 16 ມາດຖານຕົວຊີ້ວັດ ຕາມດໍາລັດ 348/ລບ ໂດຍຍົກໃຫ້ເຫັນທ່າແຮງ, ຂໍ້ສະດວກ, ສິ່ງທ້າທາຍ ແລະ ທິດທາງແຜນການພັດທະນາຈຸດສຸມແຫ່ງນີ້ໃນຕໍ່ຫນ້າ. ຊຶ່ງທ່າແຮງຕົ້ນຕໍໃນການພັດທະນາຈຸດສຸມ ແມ່ນມີເສັ້ນທາງຂອງແຂວງເລກທີ4501 ຜ່ານໃຈກາງ, ເປັນເຂດຊຸມຊົນໜາແໜ້ນເໝາະສົມກັບການຄ້າ ຂາຍ ແລະ ການເຮັດບໍລິການ, ປະຊາຊົນມີມູນເຊື້ອດຸໝັ່ນແລະສີ້ນເຄີຍໃນການຜະລິດມີເນື້ອທີ່ກວ້າງຂວາງຮາບພຽງ ເໝາະສົມກັບການປູກຝັງ-ລ້ຽງສັດແລະພືດອຸດສະຫະກໍາອື່ນໆ, ມີເນື້ອທີ່ທັງໝົດ34.887,3 ເຮັກຕ່າ, ໃນນັ້ນ ເນື້ອທີ່ປູກເຂົ້ານາປີ 1.982 ເຮັກຕ່າ ສະເລ່ຍສະມັດຕະພາບການພະລິດເຂົ້າ 4,5 ໂຕ່ນ/ເຮັກຕາ, ຜົນຜະລິດໄດ້ທັງໝົດ 8.919 ໂຕ່ນ, ເນື້ອທີ່ນາແຊງມີ 38 ເຮັກຕ່າ ສະມັດຕະພາບ 4 ໂຕ່ນ/ເຮັກຕ່າ ຜົນຜະລິດໄດ້ 152 ໂຕ່ນ, ເນື້ອທີ່ໄຮ່ໝູນວຽນມີ 1.266 ເຮັກຕ່າ ສະມັດຕະ ພາບ 3,8 ໂຕ່ນ/ເຮັກຕ່າ ຜົນຜະລິດໄດ້ 4.810,8 ໂຕ່ນ, ລວມຜົນຜະລິດທັງໝົດ 13.729,8 ໂຕ່ນ,ສະເລ່ຍໃສ່ຫົວຄົນ 962 ກິໂລຕໍ່ຄົນຕໍ່ປີ, ຄິດເປັນເງິນ 122 ຕື້ກວ່າກີບ, ໄດ້ປະກາດເປັນບ້ານພັດທະນາ ຄັ້ງວັນທີ 16 ພະຈິກ 2023, ໄດ້ປະກາດຮັບ ຮອງເປັນໜ່ວຍພັກປອດໄສເຂັ້ມແຂງແລະໜັກແໜ້ນໃນຄັ້ງວັນທີ 7 ມີນາ 2022,ໄດ້ປະກາດເປັນບ້ານແບບຢ່າງສາທາລະນະ ສຸກໃນວັນທີ 12 ເມສາ 2010, ໄດ້ປະກາດເປັນບ້ານແມ່ຍິງ 3 ດີ ຄັ້ງວັນທີ 7 ທັນວາ 2018, ບ້ານຢຸດຕິການຖາງປ່າເຮັດໄຮ່ແບບເລື່ອນລອຍໃນຄັ້ງວັນທີ 14 ມີນາ 2014,ບ້ານປອດຢາເສບຕິດໃນຄັ້ງວັນທີ 11 ມັງກອນ 2016,ບ້ານວັດທະນະທຳໃນຄັ້ງວັນທີ 16 ສິງຫາ 2016,ບ້ານປ້ອງກັນຄວາມສະຫງົບດີ ວັນທີ 19 ທັນ ວາ 2016,ບ້ານປ້ອງກັນຊາດເຂັ້ມແຂງໃນຄັ້ງວັນທີ 12 ກໍລະກົດ 2023 ແລະ ອື່ນໆ.
ພາຍຫຼັງການປະເມີນ ເຫັນວ່າບັນລຸ 16 ມາດຕະຖານຕາມດໍາລັດ 348/ລບ, ເມືອງໄດ້ປະກອບເອກະສານສະເໜີຫາ ທ່ານ ເຈົ້າແຂວງ ອອກຂໍ້ຕົກລົງ ວ່າດ້ວຍການຮັບຮອງຈຸດສຸມພັດທະ ນາຜາສັງເປັນຕົວເມືອງໃນຊົນນະບົດ ສະບັບເລກທີ 1796/ຈຂ.ວຈ, ລົງວັນທີ 27 ທັນວາ 2023.
ໃນໂອກາດນີ້, ທ່ານ ຄໍາພັນ ສິດທິດໍາພາ, ເຈົ້າແຂວງວຽງຈັນ ໄດ້ໃຫ້ກຽດໂອ້ລົມ ຊຶ່ງທ່ານໄດ້ຮຽກຮ້ອງມາຍັງອົງຄະນະພັກ, ອົງ ການປົກຄອງທ້ອງຖິ່ນທຸກຂັ້ນ ຕະຫລອດເຖີງປະຊາຊົນບັນດາເຜົ່າພາຍໃນຈຸດສຸມພັດທະນາດັ່ງກ່າວສືບຕໍ່ເອົາໃນໃສ່ຫລາຍວຽກຈຸດສຸມ, ໃນນີ້ ໜ້າວຽກທີ່ຈະຕ້ອງໄດ້ສືບຕໍ່ ອັນໄວໆນີ້ ແມ່ນ ການປັບປຸງວຽກງານຕະຫຼາດທີ່ຖາວອນ ແລະ ອື່ນໆ ທີ່ເຫັນວ່າຍັງບໍ່ທັນໄດ້ຕ້ອງໄດ້ດີ, ໃຫ້ຄວາມຮູ້ທາງດ້ານການປູກ, ການລ້ຽງຂອງປະຊາຊົນຢ່າງແທດເຖິງ, ການສ້າງຕົວແບບດ້ານການຜະລິດ ຕິດພັນກັບການຜະລິດສິນຄ້າ ແລະ ປຸງແຕ່ງທີ່ໝັ້ນຄົງ ກໍ່ຄືສິນຄ້າໂອດ໋ອບ, ການປັບປຸງພື້ນຖານໂຄງລ່າງເສັ້ນທາງຊອຍພາຍໃນບ້ານ, ການຕິດຕັ້ງໄຟຟ້າ, ໄຟ ເຍືອງທາງທີ່ເຫັນວ່າມີຄວາມຈຳເປັນ ແລະ ເໝາະສົມຈຶ່ງສົມກັບວ່າເປັນຕົວເມືອງໃນຊົນນະບົດ ຊຶ່ງນີ້ຖືເປັນຄວາມຈຳເປັນ ແລະ ພາວະວິໄສທີ່ເອົາອັນອື່ນປ່ຽນແທນບໍ່ໄດ້.