ວັນທີ 19 ຕຸລາ 2022. ກອງບັນຊາການປ້ອງກັນຄວາມສະຫງົບເມືອງປາກອູ ໄດ້ຈັດພິທີປະກາດຮັບຮອງເອົາ ບ້ານຫ້ວຍມາດ ກຸ່ມເທດສະບານເມືອງປາກອູ ແຂວງຫລວງພະບາງ ເປັນບ້ານປອດຢາເສບຕິດ. ມີ ພັນໂທ ຄໍາວອນ ວິໄລພອນ ຫົວໜ້າການທະຫານກອງບັນຊາການທະຫານເມືອງ, ພັນໂທ ສີໄລ ຈິດຕະລັກ ຮອງຫົວໜ້າກອງບັນຊາການປ້ອງກັນຄວາມສະຫງົບເມືອງ, ພັນໂທ ສົມຫວັງ ຕາງໜ້າຄະນະບັນຊາກອງບັນຊາການປ້ອງກັນຄວາມສະຫງົບແຂວງ, ພ້ອມດ້ວຍການຈັດຕັ້ງບ້ານພາຍໃນກຸ່ມ, ແຂກຮັບເຊີນ ແລະປະຊາຊົນພາຍໃນບ້ານ ເຂົ້າຮ່ວມ. ພິທີ ທ່ານ ນາງ ບຸນມີ ນາຍບ້ານຫ້ວຍມາດ ໄດ້ຂຶ້ນຜ່ານບົດສະຫຼຸບການສ້າງຄອບຄົວ ແລະບ້ານປອດຢາເສບຕິດ ວ່າ: ບ້ານຫ້ວຍມາດ ປະກອບມີ 134 ຄອບຄົວ, ພົນລະເມືອງ 725 ຄົນ, ຍິງ 381 ຄົນ, ຜ່ານມາອົງການປົກຄອງບ້ານ ພ້ອມດ້ວຍຄະນະຮັບຜິດຊອບການສ້າງຄອບຄົວ ແລະບ້ານປອດຢາເສບຕິດ ໄດ້ນໍາພາປະຊາຊົນ ໃຫ້ມີຄວາມຕື່ນຕົວປະກອບສ່ວນການສ້າງຄອບຄົວ ແລະບ້ານປອດຢາເສບຕິດ, ສາມາດ ປະເມີນການສ້າງຄົນ-ຄອບຄົວ ແລະບ້ານ ໃນໄລຍະ 3-6 ເດືອນ ມີຄອບຄົວຄົບຕາມ 4 ມາດຖານເງື່ອນໄຂຈຳນວນ 121 ຄອບ ຄົວ, ກວມ 91,66% ບໍ່ທັນໄດ້ຄົບຕາມມາດຖານເງື່ອນໄຂມີ 13 ຄອບຄົວ, ກວມ 9,848% ຈາກນັ້ນ ໄດ້ມີການມອບໃບຢັ້ງຢືນຮັບຮອງເອົາຄອບຄົວປອດຢາເສບຕິດຄັ້ງທີ່ I ຈໍານວນ 121ຄອບຄົວ ແລະມອບໃບຢັ້ງຢືນ ຮັບຮອງເອົາບ້ານຫ້ວຍມາດ ເປັນບ້ານປອດຢາເສບຕິດ. ຕອນທ້າຍ ພັນໂທ ຄໍາວອນ ວິໄລພອນ ໄດ້ຮຽກຮ້ອງໃຫ້ອົງການປົກຄອງບ້ານ ຈົ່ງພ້ອມກັນເອົາໃຈໃສ່ແກ້ໄຂບັນຫາປະກົດ ການຫຍໍ້ທໍ້ ທີ່ຈະເກີດຂຶ້ນຢູ່ພາຍໃນບ້ານໃຫ້ທ່ວງທັນກັບສະພາບການ, ສຶກສາອົບຮົມການເມືອງ-ແນວຄິດ ໃຫ້ປະຊາ ຊົນຮັບຮູ້, ເຂົ້າໃຈໃນການປະຕິບັດລະ ບຽບກົດໝາຍຂອງບ້ານເມືອງໃຫ້ຖືກ ຕ້ອງ, ສືບຕໍ່ສ້າງເສດຖະກິດຄອບຄົວ ໃຫ້ຮັ່ງມີເຂັ້ມແຂງຂຶ້ນເລື້ອຍໆ, ພ້ອມກັນຮັກສານາມມະຍົດຂອງບ້ານ ໃຫ້ໝັ້ນຄົງຕະຫຼອດໄປ. ໂອກາດນີ້ ໄດ້ມີການເປີດປ້າຍ ແລະລັ່ນຄ້ອງ 9 ບາດ ເພື່ອເປັນສະລິມຸງຄຸນອີກດ້ວຍ.
ຂ່າວ: ເມືອງປາກອູ
