ພິທີປະກາດຮັບຮອງເມືອງອາດສະພອນ ແຂວງສະຫວັນນະເຂດ ເປັນເມືອງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງ ຈັດຂຶ້ນໃນວັນທີ 9 ພຶດສະພາຜ່ານມານີ້, ທີ່ສະໂມສອນຂອງເມືອງ ໂດຍການໃຫ້ກຽດເຂົ້າຮ່ວມຂອງທ່ານ ນາງ ອິນລາວັນ ແກ້ວບຸນພັນ, ກຳມະການສູນກາງພັກ, ຮອງປະທານສູນກາງແນວລາວສ້າງຊາດ.
ທ່ານ ນາງ ແກ່ນຕາ ອິນທະວົງ ກຳມະການປະຈຳພັກເມືອງ, ປະທານແນວລາວສ້າງຊາດເມືອງ ໄດ້ຜ່ານບົດສະຫຼຸບການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງໃນໄລຍະຜ່ານມາ ພ້ອມທັງທິດທາງແຜນການໃນຕໍ່ໜ້າ ຊຶ່ງຂະບວນການສ້າງຄອບຄົວ ແລະບ້ານສາມັກຄີປອງດອງຂອງແນວລາວສ້າງຊາດເມືອງ ແມ່ນຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາຕາມທິດສາມສ້າງຂອງເມືອງ ເພື່ອຜັນຂະຫຍາຍວຽກງານແນວໂຮມ, ເສີມຂະຫຍາຍມູນເຊື້ອສາມັກຄີປະຊາຊົນບັນດ່ເຜົ່າທີ່ມີມາແຕ່ດົນນານ ເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ເພີ່ມທະວີຄວາມສາມັກຄີປອງດອງ, ນໍ້າໃຈຮັກເຊື້ອແພງຊາດ, ຮັກບ້ານເກີດເມືອງນອນ, ເສີມຂະຫຍາຍ ສິດເປັນເຈົ້າຕົ້ນເອງຂອງປະຊາຊົນບັນດາເຜົ່າ ເຂົ້າຮ່ວມຂະບວນການຕ່າງຂອງພັກ-ລັດ, ແນໃສ່ແກ້ໄຂຄວາມທຸກຍາກຂອງຄອບຄົວ ໃຫ້ໄດ້ຕາມມາດຖານຄອບຄົວ ແລະບ້ານສາມັກຄີປອງດອງ ໂດຍໄດ້ປະຕິບັດຕາມບາດກ້າວຕ່າງໆຕາມເນື້ອໃນຂໍ້ຕົກລົງເລກທີ 127 ຂອງສູນກາງແນວລາວສ້າງຊາດ ໃນ 4 ມາດຕະຖານຂອງຄອບຄົວ ແລະ 5 ມາດຕະຖານຂອງບ້ານສາມັກຄີປອງດອງ.
ມາຮອດປັດຈຸບັນ ທົ່ວເມືອງອາດສະພອນ ສາມາດສ້າງເປັນຄອບຄົວສາມັກຄີປອງດອງໄດ້ແລ້ວ 12.810 ຄອບຄົວ, ເທົ່າກັບ 98% ແລະໄດ້ຮັບຮອງເປັນບ້ານສາມັກຄີປອງດອງແລ້ວ 70 ບ້ານ, ເທົ່າ100% ຂອງບ້ານທັງໝົດ.
ຈາກນັ້ນ, ໃນພິທີ ກໍ່ໄດ້ມີການມອບ-ຮັບໃບຢັ້ງຢືນເມືອງອາດສະພອນ ເປັນເມືອງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງ ພ້ອມທັງມີການມອບ-ຮັບໃບຢັ້ງຢືນຮັບຮອງນາມມະຍົດບ້ານສາມັກຄີປອງດອງ 2 ປີລຽນຕິດ ຈຳນວນ 70 ບ້ານ ແລະ1 ກົມກອງ ແລະໃນຕອນທ້າຍຂອງພິທີ, ການນຳທຸກພາກສ່ວນ ກໍ່ໄດ້ຮ່ວມກັນເປີດແຜ່ນປ້າຍເມືອງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງ.
