ພາຍຫຼັງລັດຖະບານ ແຫ່ງ ສປປ ລາວ ຮັບຮອງເອົາດຳລັດ ວ່າດ້ວຍປ່າສະຫງວນ (ສະບັບໃໝ່) ໃນເດືອນ ມິຖຸນາ ປີ 2023, ແຜນການຄຸ້ມຄອງ ແລະ ສະໜອງທຶນແບບຍືນຍົງໃຫ້ແກ່ ປ່າສະຫງວນແຫ່ງຊາດ ຢູ່ ສປປ ລາວ ໄດ້ຖືກຮັບຮອງ ເມື່ອວັນທີ 8 ສິງຫາຜ່ານມາ. ແຜນການຄຸ້ມຄອງດັ່ງກ່າວ ເປັນຄູ່ມືອ້າງອີງໃຫ້ແກ່ບັນດາພາກສ່ວນທີ່ກ່ຽວຂ້ອງທີ່ເຮັດວຽກຕິດພັນກັບປ່າສະຫງວນ ລວມທັງລັດຖະບານ ແຫ່ງ ສປປ ລາວ, ຄູ່ຮ່ວມພັດທະນາ, ພາກສ່ວນເອກະຊົນ, ອົງການຈັດຕັ້ງທີ່ບໍ່ສັງກັດລັດຖະບານ, ອົງການຈັດຕັ້ງທາງສັງຄົມ, ນັກວິຊາການ ແລະ ຊຸມຊົນທ້ອງຖິ່ນ ທີ່ຈະມີບົດບາດສໍາຄັນໃນການຈັດຕັ້ງປະຕິບັດດໍາລັດດັ່ງກ່າວ.
ສປປ ລາວ ມີປ່າສະຫງວນແຫ່ງຊາດ 26 ແຫ່ງ, ໃນນັ້ນ 6 ແຫ່ງ ໄດ້ຖືກປະກາດໃຫ້ເປັນ “ອຸທິຍານແຫ່ງຊາດ” ເຊິ່ງເປັນປະເພດປ່າສະຫງວນແຫ່ງຊາດທີ່ໄດ້ຮັບການຄຸ້ມຄອງໃນລະດັບສູງ ເຊັ່ນ: ອຸທິຍານແຫ່ງຊາດ ນໍ້າແອດ-ພູເລີຍ ເປັນຕົ້ນ. ປ່າສະຫງວນແຫ່ງຊາດເຫຼົ່ານີ້ ເປັນບ່ອນຢູ່ອາໄສຂອງຊີວະນານາພັນທີ່ອຸດົມສົມບູນ ແລະ ຊະນິດພັນສັດປ່າ ແລະ ພືດປ່າທ້ອງຖິ່ນ, ຫາຍາກ ແລະ ໃກ້ສູນພັນ. ປັດຈຸບັນ, ຊີວະນານາພັນຂອງ ສປປ ລາວ ກໍາລັງຖືກໄພຂົ່ມຂູ່ເນື່ອງຈາກ ການປ່ຽນແປງຂອງດິນຟ້າອາກາດ, ການຄ້າ-ຂາຍສັດປ່າທີ່ຜິດກົດໝາຍ, ການລ່າສັດແບບດັບສູນ, ການລັກລອບລ່າສັດແບບຜິດກົດໝາຍ, ຄວບຄູ່ກັບອັດຕາການຕັດໄມ້ທຳລາຍປ່າທີ່ສູງ ສົ່ງຜົນໃຫ້ຖິ່ນທີ່ຢູ່ອາໄສຂອງສັດປ່າຖືກຕັດຂາດ ແລະ ສູນເສຍໄປ.
ທ່ານ ສົມຫວັງ ພິມມະວົງ ຫົວໜ້າກົມປ່າໄມ້ ໄດ້ກ່າວວ່າ: “ແຜນການຄຸ້ມຄອງ ແລະ ສະໜອງທຶນແບບຍືນຍົງໃຫ້ແກ່ ປ່າສະຫງວນແຫ່ງຊາດ ຢູ່ ສປປ ລາວ ໄດ້ຖືກອອກແບບໃຫ້ມີລັກສະນະຮອບດ້ານ ແລະ ຮັດກຸມ ໃນໄລຍະເວລາ 3 ປີ ໂດຍຊີ້ໃຫ້ເຫັນເຖິງ ວິທີການທີ່ຈະຫັນໄປສູ່ການຈັດຕັ້ງປະຕິບັດບັນດານະໂຍບາຍກ່ຽວກັບກິດຈະການປ່າສະຫງວນໃນໄລຍະໃໝ່ໃຫ້ປາກົດຜົນເປັນຈິງ. ໂຄງສ້າງຂອງແຜນການນີ້ ຖືກກໍານົດຂຶ້ນໂດຍມີການວາງ “ກອບຜົນໄດ້ຮັບ” ທີ່ປະກອບມີ: ຈຸດປະສົງ, ຜົນໄດ້ຮັບທີ່ຄາດຫວັງໄວ້, ກິດຈະກໍາ ແລະ ງົບປະມານທີ່ຕ້ອງການ.”
ແຜນການຄຸ້ມຄອງ ແລະ ສະໜອງທຶນແບບຍືນຍົງໃຫ້ແກ່ ປ່າສະຫງວນແຫ່ງຊາດ ຢູ່ ສປປ ລາວ ຕອບສະໜອງຕໍ່ເປົ້າໝາຍ ບຸລິມະສິດເຊັ່ນ: ການສ້າງຄວາມເຂັ້ມແຂງ ໃຫ້ພາກສ່ວນກ່ຽວຂ້ອງ ເຂົ້າຮ່ວມໃນການປົກປັກຮັກສາ ແລະ ພັດທະນາປ່າສະຫງວນຂອງພວກເຮົາ. ນີ້ລວມເຖິງ ການສະໜັບສະໜູນ “ບ້ານພັດທະນາດ້ານປ່າໄມ້” ໂດຍການກໍານົດເຂດ ແລະ ສິດນຳໃຊ້ທີ່ດິນປ່າສະຫງວນ ໃຫ້ມີຄວາມຊັດເຈນຍິ່ງຂຶ້ນ.
ຮັບປະກັນ ການທົດແທນຊີວະນານາພັນເທົ່າເດີມ (no-net-loss) ເມື່ອນຳໃຊ້ປ່າສະຫງວນ. ລວມເຖິງ ການນຳໃຊ້ວິທີການທີ່ເໝາະສົມ (ເປັນຕົ້ນ: ລໍາດັບມາດຕະການຫຼຸດຜ່ອນຜົນກະທົບ) ເພື່ອເຮັດວຽກໂຄງການ ແລະ ກິດຈະການ ທີ່ນຳໃຊ້ປ່າສະຫງວນ ໃນການຮັບປະກັນວ່າ ກິດຈະກໍາການນໍາໃຊ້ປ່າສະຫງວນຂອງເຂົາເຈົ້າ ໃຫ້ມີຜົນກະທົບໜ້ອຍທີ່ສຸດຕໍ່ຊີວະນານາພັນ ແລະ ລະບົບນິເວດ.
ອໍານວຍຄວາມສະດວກໃຫ້ແກ່ທຸລະກິດທີ່ສອດຄ່ອງກັບເປົ້າໝາຍການອະນຸລັກ ແລະ ປັບປຸງການປະຕິບັດຄວາມສອດຄ່ອງກັບ ກົດໝາຍ ແລະ ລະບຽບ ແນໃສ່ປັບປຸງສະພາບແວດລ້ອມຂອງການລົງທຶນໃຫ້ແກ່ຜູ້ປະກອບການທີ່ສະໜັບສະໜູນກິດຈະການປ່າໄມ້ ແລະ ຮັບປະກັນໃຫ້ຜູ້ປະກອບການປະຕິບັດຕາມກົດໝາຍ, ລະບຽບການ ແລະ ແຜນການທີ່ໄດ້ຕົກລົງກັນ ຢ່າງມີປະສິດທິຜົນ.
ປັບປຸງການສະໜອງທຶນແບບຍືນຍົງໃຫ້ແກ່ ປ່າສະຫງວນແຫ່ງຊາດ ລວມເຖິງການປະຕິບັດຍຸດທະສາດເພີ່ມເຕີມທີ່ຫຼາກຫຼາຍ ເພື່ອເພີ່ມທະວີການເຂົ້າເຖິງແຫຼ່ງທຶນ ແລະ ສະຖຽນລະພາບຂອງແຫຼ່ງທຶນ ແລະ ກົນໄກທາງການເງິນເພື່ອສະໜອງ ແລະ ນໍາໃຊ້ທຶນ ຢ່າງມີປະສິດທິພາບ ແລະ ປະສິດທິຜົນ.
ຂ່າວ: ຄ. ຄຳປະສິດ