ພິທີຮັບຮອງແຜນງານສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກ ແລະ ການປົກຄອງທ້ອງຖິ່ນ ເພື່ອປັບປຸງສຸຂະພາບແມ່-ເດັກ ແລະ ໂພຊະນາການ ຜ່ານວິທີການແບບຄອນເນັກ ຢູ່ ສປປ ລາວ ລະຫວ່າງ ກະຊວງສາທາລະນະສຸກ, ກະຊວງພາຍໃນ, ອົງການພັດທະນາສາກົນ ສະຫະລັດອາເມລິກາ (USAID) ແລະ ອົງການອະນາໄມໂລກ ຈັດຂຶ້ນໃນວັນທີ 24 ເມສາ 2024 ຢູ່ ນະຄອນ ຫລວງວຽງຈັນ ໂດຍມີ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ, ທ່ານນາງ ມິເຊວ ເອົ້າລໍ ອຸປະທູດຮັກສາການຊົ່ວຄາວ ສະຫະລັດອາເມລິກາ ປະຈຳ ສປປ ລາວ ແລະ ທ່ານ ທິມໂມຕີ ອາມສະຕຣອງ ຮັກສາການຜູ້ຕາງໜ້າອົງການອະນາໄມໂລກ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ວິທີການຄອນເນັກ ແມ່ນນຳພາໂດຍ ກະຊວງສາທາລະນະສຸກ ແລະ ກະຊວງພາຍໃນ ໂດຍໄດ້ຮັບການສະໜັບສະໜູນຈາກ ອົງການອະນາໄມໂລກ ເຊິ່ງມີເປົ້າໝາຍສູງສຸດ ໃນການສົ່ງເສີມການເຂົ້າເຖິງການບໍລິການສຸຂະພາບທີ່ຈຳເປັນ ເປັນຕົ້ນ ການສັກຢາກັນພະຍາດ ແລະ ການບໍລິການສຸຂະພາບແມ່ ແລະ ເດັກ ໂດຍຜ່ານການເສີມສ້າງຄວາມເຂັ້ມແຂງໃຫ້ແກ່ການບໍລິການສຸຂະພາບ ຂັ້ນຕົ້ນ ເພື່ອກ້າວໄປສູ່ການປົກຄຸມສຸຂະພາບທົ່ວປວງຊົນ. ວິທີການແບບຄອນເນັກ ມີເປົ້າໝາຍໃນການສ້າງຄວາມໄວ້ເນື້ອເຊື່ອໃຈ ລະຫວ່າງພະນັກງານແພດໝໍ ແລະ ຊຸມຊົນ ໂດຍຜ່ານການປະສານງານຢ່າງໃກ້ຊິດກັບອຳນາດການປົກຄອງທ້ອງຖິ່ນ ເພື່ອສ້າງຄວາມເຂັ້ມແຂງ ໃຫ້ແກ່ອົງການປົກຄອງທ້ອງຖິ່ນ, ການວາງແຜນ ແລະ ການປະສານງານຮ່ວມກັນ, ພ້ອມທັງການເສີມສ້າງ ແລະ ເຊື່ອມສານວິທີການດັ່ງກ່າວ, ໃຫ້ມີຄວາມຍືນຍົງ ເຊິ່ງແຜນງານດັ່ງກ່າວ, ອົງການ USAID ມີເຈດຈຳນົງທີ່ຈະໃຫ້ການສະໜັບສະໜູນເປັນມູນຄ່າ 10 ລ້ານໂດລາສະຫະລັດ ເປັນເວລາ 5 ປີ.
ທ່ານ ບຸນແຝງ ພູມມະໄລສິດ ໄດ້ມີຄຳເຫັນວ່າ: ການບໍລິການສຸຂະພາບ ບໍ່ເປັນພຽງແຕ່ການບໍລິການ, ແຕ່ມັນເປັນການໃຫ້ຄໍາໝັ້ນສັນຍາອັນໜຶ່ງ ເຊິ່ງເຮົາຕ້ອງໄດ້ເອົາໃຈໃສ່ ແລະ ຮັກສາໄວ້ຮ່ວມກັນ, ການສ້າງຄວາມເຂັ້ມແຂງໃຫ້ແກ່ການປົກຄອງທ້ອງຖິ່ນ ເປັນດັ່ງການບົວລະບັດຮາກໄມ້ ຍິ່ງຮາກໄມ້ໝັ້ນຄົງ ກິ່ງງ່າກໍຍິ່ງແຂງແຮງ ສະມາຊິກໃນບ້ານກໍເຊັ່ນດຽວກັນ, ນັບແຕ່ປະຊາຊົນ, ພະນັກງານທ້ອງຖິ່ນ, ຕາງໜ້າຈາກອົງການຈັດຕັ້ງສັງຄົມ, ແພດໝໍ ແລະ ພະຍາບານ ພ້ອມທັງ ຜູ້ນຳທາງສາສະໜາ ແລະ ຊົນເຜົ່າ ລ້ວນແຕ່ມີສ່ວນຮ່ວມນຳກັນ ໃນການສ້າງໃຫ້ຊຸມຊົນມີຄວາມເຂັ້ມແຂງທັງໝົດ. ເມື່ອເຮົາສົ່ງ ເສີມໃຫ້ຊຸມຊົນ ແລະ ການປົກຄອງທ້ອງຖິ່ນໃຫ້ເປັນເຈົ້າການໃນການຮັກສາສຸຂະພາບ, ເຮົາຈະສາມາດສ້າງຄວາມໄວ້ເນື້ອເຊື່ອໃຈ, ສ້າງຄວາມຮັບຜິດຊອບ ແລະ ນຳໃຊ້ຊັບພະຍາກອນທີ່ມີຢູ່ແລ້ວໃນຊຸມຊົນຢ່າງມີປະສິດທິພາບ. ການຊ່ວຍເຫລືອອັນເອື້ອເຟື້ອເຜື່ອແຜ່ ຈາກອົງການ USAID ໃນຄັ້ງນີ້, ຈະຊ່ວຍໃຫ້ເຮົາສາມາດບັນລຸເປົ້າໝາຍດັ່ງກ່າວນັ້ນໄດ້ ໂດຍການຍົກລະດັບການປົກຄອງໃນຂັ້ນທ້ອງຖິ່ນ ແລະ ຮັບປະກັນໃຫ້ທຸກຄົນມີສຸຂະພາບທີ່ດີ; ການໃຫ້ຄວາມສໍາຄັນແກ່ສຸຂະພາບ ຈະສ້າງຜົນດີໃຫ້ກັບທຸກຄົນ ແລະ ພວກເຮົາເອງ ຍາມໃດກໍເອົາໃຈໃສ່ຮ່ວມມືເຊິ່ງກັນ ແລະ ກັນເພື່ອໃຫ້ບັນລຸເປົ້າໝາຍນີ້.
ພ້ອມກັນນີ້, ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ກໍໄດ້ກ່າວວ່າ: ວຽກງານການບໍລິການສຸຂະພາບ ເປັນສິ່ງຈໍາເປັນອັນໜຶ່ງ ໃນການຍົກສູງຊີວິດການເປັນຢູ່ ແລະ ຄຸນນະພາບຊີວິດຂອງພໍ່ແມ່ປະຊາຊົນ. ພ້ອມທັງ ສະແດງຄວາມດີໃຈ ທີ່ວິທີການຄອນເນັກ ໄດ້ມີສ່ວນຊ່ວຍໃຫ້ເຮົາສາມາດບັນລຸເປົ້າໝາຍດັ່ງກ່າວໄດ້ ໃນວິທີທີ່ບໍ່ຄືໃຜ ແລະ ຍັງໄດ້ຮັບໝາກຜົນທີ່ພົ້ນເດັ່ນອີກດ້ວຍ. ພ້ອມນີ້, ທ່ານຍັງໄດ້ສະແດງຄວາມຫວັງວ່າ ຈະໄດ້ຂະຫຍາຍວິທີການຄອນເນັກ ອີກຕື່ມ, ນອກຈາກຈະໄດ້ຈັດຕັ້ງປະຕິບັດວຽກງານເພື່ອຍົກສູງສຸຂະພາບແລ້ວ ຍັງໄດ້ສ້າງຄວາມເຂັ້ມແຂງ ໃຫ້ແກ່ວຽກງານການປົກຄອງທ້ອງຖິ່ນ ແລະ ຍົກສູງຄຸນນະພາບການບໍລິການສຸຂະພາບ, ສົ່ງເສີມໃຫ້ປະຊາຊົນໄປໃຊ້ບໍລິການຕື່ມອີກ ເຊິ່ງສິ່ງນີ້ຖື ເປັນຈຸດເລີ່ມຕົ້ນຂອງການພັດທະນາໃນທ້ອງຖິ່ນ.
ທ່ານ ນາງ ມິເຊວ ເອົ້າລໍ ໄດ້ກ່າວວ່າ: ການສະໜັບສະໜູນຈາກອົງການ USAID ຄັ້ງນີ້ ຈະເຮັດໃຫ້ເຮົາສາມາດຜັນຂະຫຍາຍວິທີການຄອນເນັກ ໄປອີກ 5 ແຂວງ ກໍຄື ແຂວງຜົ້ງສາລີ, ອຸດົມໄຊ, ສະຫວັນນະເຂດ, ສາລະວັນ ແລະ ເຊກອງ ເພີ່ມເຕີມຈາກປັດຈຸບັນ ທີ່ມີການຈັດຕັ້ງປະຕິບັດວິທີການຄອນເນັກ ຢູ່ 259 ບ້ານ ໃນ 10 ແຂວງທົ່ວປະເທດ. ການສະໜັບສະໜູນຈາກອົງການ USAID ຈະຊ່ວຍໃນການປະສານງານ ເພື່ອຮັບປະກັນການໃຫ້ບໍລິການສຸຂະພາບມີປະສິດທິພາບ ແລະ ປະສິດທິຜົນ ແລະ ເພື່ອເຊື່ອມສານການບໍລິການສຸຂະພາບສໍາລັບແມ່ ແລະ ເດັກ ເປັນຕົ້ນ ການບໍລິການສັກຢາກັນພະຍາດ ແລະ ໂພຊະນາການເຂົ້ານຳ, ທັງນີ້ ກໍເພື່ອໃຫ້ສາມາດບັນລຸເປົ້າໝາຍໃນການຍົກສູງຄຸນນະພາບຂອງການບໍລິການ ສາທາລະນະສຸກໃນຂັ້ນແຂວງ ຈົນເຖິງຂັ້ນຊຸມຊົນ, ການສ້າງ ແລະ ນໍາໃຊ້ຄູ່ມືການປິ່ນປົວຕ່າງໆ ແລະ ການຝຶກອົບຮົມໃຫ້ແກ່ພະນັກງານແພດໝໍ ຈາກສະຖານທີ່ບໍລິການສາທາລະນະສຸກຫລາຍກວ່າ 200 ແຫ່ງທົ່ວປະເທດ.
ທ່ານ ທິມໂມຕີ ອາມສະຕຣອງ ໄດ້ມີຄຳເຫັນວ່າ: ອົງການອະນາໄມໂລກ ໃຫ້ຄຳໝັ້ນສັນຍາວ່າຈະສະໜັບສະໜູນ ສປປ ລາວ ໃນຊ່ວຍເຫລືອກຸ່ມຄົນທີ່ອາໄສຢູ່ເຂດຫ່າງໄກສອກຫລີກ ໃຫ້ສາມາດເຂົ້າເຖິງການບໍລິການສຸຂະພາບທີ່ມີຄຸນນະພາບ ແລະ ສ້າງຄວາມເຂັ້ມແຂງໃຫ້ແກ່ອົງການ ການປົກຄອງທ້ອງຖິ່ນ ເພື່ອຊຸກຍູ້ໃຫ້ວຽກງານສາທາລະນະສຸກ ກາຍເປັນວຽກງານບູລິມະສິດຂອງທຸກພາກສ່ວນ. ການຮ່ວມມືຄັ້ງໃໝ່ນີ້, ຈະໄປເສີມໃສ່ການຮ່ວມມືອັນແໜ້ນແຟ້ນທີ່ມີຢູ່ແລ້ວ ແລະ ຈະຊ່ວຍຮັບປະກັນໃຫ້ປະຊາຊົນຊົນລາວ ທຸກຄົນສາມາດເຂົ້າເຖິງການບໍລິການສາທາລະນະສຸກ ທີ່ມີຄຸນນະພາບ ແລະ ຊ່ວຍຮັບປະກັນໃຫ້ຊຸມຊົນ ທີ່ມີຄວາມທຸກຍາກ ໄດ້ຮັບສິດເທົ່າທຽມກັບທຸກຄົນ ໃນການເຂົ້າເຖິງການບໍລິການດັ່ງກ່າວ.
ທີ່ມາ: ຂປລ
