ສະພາທິດສະດີສູນກາງພັກ ໄດ້ເປີດກອງປະຊຸມວິທະຍາສາດ ເພື່ອພິຈາລະນາ-ຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດໃນຫົວຂໍ້: “ການສ້າງເສດຖະກິດຕະຫຼາດ ຕາມທິດສັງຄົມນິຍົມ ຢູ່ ສປປ ລາວ” ໃນວັນທີ 27 ພຶດສະພານີ້ ທີ່ຫ້ອງປະຊຸມ ສະພາທິດສະດີສູນກາງພັກ ໂດຍການເປັນປະທານ ຂອງທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ.
ໂຄງການຄົ້ນຄວ້າດັ່ງກ່າວເປັນໜຶ່ງໃນບັນດາໂຄງການຄົ້ນຄວ້າ ທາງດ້ານທິດສະດີ-ພຶດຕິກຳ ທີ່ຄະນະເລຂາທິການສູນກາງພັກໄດ້ອະນຸມັດ ແລະ ໄດ້ສຳເລັດການດຳເນີນການຄົ້ນຄວ້າ ໂດຍຜ່ານກອງປະຊຸມສຳມະນາວິທະຍາສາດເປີດກວ້າງລະດົມຄຳຄິດເຫັນ ທັງພາຍໃນຄະນະຮັບຜິດຊອບໂຄງການ ແລະ ຮ່ວມກັບຄະນະກຳມະການດ້ານເສດຖະກິດ, ຄະນະປະຈຳສະພາທິດສະດີສູນກາງພັກ ເພື່ອປະກອບຄຳເຫັນໃນໄລຍະຜ່ານມາ.
ຜ່ານການຈັດຕັ້ງປະຕິບັດໂຄງການຄົ້ນຄວ້າຕ່າງໆໃນໄລຍະຜ່ານມາຮອດປັດຈຸບັນ, ສາມາດຮັບຮອງເອົາເນື້ອໃນຜົນການຄົ້ນຄວ້າໂຄງການລະດັບຊາດໄດ້ 3 ໂຄງການ ໃນນັ້ນ ໄດ້ສະເໜີຈັດພິມເປັນສະບັບສົມບູນ 1ໂຄງການ. ບັນດາຜະລິດຕະພັນດັ່ງກ່າວຖືໄດ້ວ່າເປັນຜົນງານການຄົ້ນຄວ້າ ຂອງສະພາທິດສະດີສູນກາງພັກ ກໍຄືບັນດາສະຫາຍໃນຄະນະຮັບຜິດຊອບໂຄງການຄົ້ນຄວ້າໃນຫົວຂໍ້ຕ່າງໆ ທີ່ໄດ້ສຸມທຸກກຳລັງສະຕິປັນຍາໃນການດຳເນີນການຄົ້ນຄວ້າ ແລະ ກອງປະຊຸມ ກໍໄດ້ຕົກລົງເຫັນດີເປັນເອກະພາບລົງຄະແນນສຽງຮັບຮອງເອົາຜົນຂອງການຄົ້ນຄວ້າດັ່ງກ່າວ.
ຂ່າວ: ປະຊາຊົນ
