ວັນທີ 23 ກໍລະກົດ 2024 ນີ້, ທີ່ສະໂມສອນໃຫ່ຍຂອງເມືອງຈອມເພັດ ແຂວງຫລວງພະບາງ ໄດ້ຈັດພິທີປະກາດຮັບຮອງ ເມືອງຈອມເພັດ ເປັນເມືອງຢຸດຕິການຖ່າຍຊະຊາຍ ເມືອງທີ 11 ຂອງແຂວງ. ມີ ທ່ານ ບຸນເລື່ອມ ມະນີວົງ ຮອງເຈົ້າແຂວງຫລວງພະບາງ, ພາກສ່ວນກ່ຽວຂ້ອງ ແລະອົງການປົກຄອງບ້ານພາຍໃນເມືອງດັ່ງກ່າວເຂົ້າຮ່ວມ.
ທ່ານ ບຸນເພັງ ພົມມະວົງ ຫົວໜ້າຫ້ອງການ ສາທາລະນະ ສຸກເມືອງ ໄດ້ຜ່ານບົດລາຍງານການຈັດຕັ້ງປະຕິບັດວຽກງານ ຊຸມ ຊົນເປັນເຈົ້າການດ້ານສຸຂາອະນາໄມ ເຊິ່ງປະກອບມີ 69 ບ້ານ, ມີພົນລະເມືອງທັງໝົດ 35,523 ຄົນ, ຍິງ 17,148 ຄົນ, ປະກອບມີ 3 ເຜົ່າໃຫຍ່ ອາໄສຢູ່ຮ່ວມກັນ. ຜ່ານການຊີ້ນໍາໆພາຂອງຄະນະ ພັກ-ອົງການປົກຄອງເມືອງຈອມເພັດ ໃນແຕ່ລະໄລຍະ ຕາມບົດແນະນໍາການຈັດຕັ້ງປະຕິບັດ ວ່າດ້ວຍການສ້າງບ້ານ ແລະເມືອງຢຸດຕິການຖ່າຍຊະຊາຍ, ຮັບປະກັນເຮັດໃຫ້ວຽກງານຊຸມຊົນເປັນເຈົ້າດ້ານສຸຂາອະນາໄມ ຫຼື ວຽກງານ ຢຸດຕິການຖ່າຍຊະຊາຍ ໃຫ້ບັນລຸຄາດໝາຍໃນປີ 2025 ໄດ້ກໍານົດໃຫ້ໄດ້ປະກາດຮັບຮອງເມືອງຈອມເພັດ ເປັນເມືອງຢຸດຕິການຖ່າຍຊະຊາຍໃນປີ 2024. ປັດຈຸບັນ, ທົ່ວເມືອງມີໂຮງໝໍ ຊຸມຊົນ 1 ແຫ່ງ, ໂຮງໝໍນ້ອຍ 9 ແຫ່ງ, ມີບ້ານແບບຢ່າງສາທາລະນະສຸກ 69 ບ້ານ ເທົ່າກັບ 100%, ອັດຕາການຊົມໃຊ້ນໍ້າສະອາດ 100%, ອັດຕາການຊົມໃຊ້ວິດຖ່າຍ ເທົ່າກັບ 100%.
ນອກຈາກ ວຽກງານຊຸມຊົນເປັນເຈົ້າການດ້ານສຸຂາອະນາໄມ ອົງການປົກຄອງເມືອງຈອມເພັດ ໄດ້ສຸມໃສ່ໃນການຈັດຕັ້ງປະຕິບັດ 11 ຕົວຊີ້ບອກ ຕິດພັນກັບວຽກງານສຸຂາພິບານ ແລະສ້າງບ້ານຢຸດຕິການຖ່າຍຊະຊາຍ, ສ້າງບ້ານ ສາທາລະນະສຸກແບບ ຢ່າງ ໃຫ້ບັນລຸຕາມ 10 ມາດຖານ 30 ຕົວຊີ້ວັດ ແລະສະໜອງນໍ້າສະອາດໃຊ້ໃຫ້ພຽງພໍກັບຄວາມຕ້ອງການ ຊຶ່ງສາມາດບັນລຸຕົວຊີ້ບອກສໍາເລັດ 100%.
ໃນໂອກາດນີ້, ທ່ານ ທອງງາມ ອາຍາສອນ ຫົວໜ້າຫ້ອງການພາຍໃນເມືອງ ໄດ້ຜ່ານຂໍ້ຕົກລົງຂອງທ່ານຫົວໜ້າພະແນກ ສາ ທາລະນະສຸກແຂວງ ວ່າດ້ວຍການຮັບຮອງເອົາ ເມືອງຈອມເພັດ ເປັນເມືອງ ຢຸດຕິການຖ່າຍຊະຊາຍປະຈໍາປີ 2024 ແລະຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍ ການຍ້ອງຍໍສັນລະເສີນໃຫ້ອົງການປົກຄອງບ້ານ ທັງ 69 ບ້ານ ພາຍໃນເມືອງ ຈອມເພັດ ທີ່ມີຜົນງານດີເດັ່ນໃນການຈັດຕັ້ງປະຕິບັດ ຊຸມຊົນ ເປັນເຈົ້າການວຽກງານຢຸດຕິການຖ່າຍຊະຊາຍ.
