ຮັບຮອງ ບ້ານພູຖ້ຳພວງ ເປັນຕົວເມືອງນ້ອຍໃນຊົນນະບົດ

ບ້ານພູຖ້ຳພວງ ເມືອງລະຄອນເພັງ ແຂວງສາລະວັນ ຖືກຮັບຮອງເປັນຕົວເມືອງນ້ອຍໃນຊົນນະບົດ ເປັນບ້ານທຳອິດຂອງເມືອງ ໃນວັນທີ 23 ສິງຫາ 2024 ຜ່ານມາ ໂດຍການເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງໆ ສາລະວັນ.

ທ່ານ ພັທ ໄພວັນ ກໍ່າໄຊຍະລາດ ຫົວໜ້າການທະຫານ ກອງບັນຊາການ ປກຊ ເມືອງລະຄອນເພັງ ໄດ້ລາຍງານວ່າ: ອີງໃສ່ການປະເມີນຕາມດຳລັດ 348/ລບ, 16 ມາດຖານ ເຫັນວ່າ ບ້ານພູຖ້ຳພວງ ສາມາດຈັດຕັ້ງປະຕິບັດ ບັນລຸຕາມຄາດໝາຍ ກວມເອົາ 80% ຂຶ້ນໄປ ໂດຍສະເພາະ ຈຸດສຸມບ້ານພູຖໍ້າພວງ ເປັນໃຈກາງທາງດ້ານເສດຖະກິດມີ 3 ທ່າແຮງຕົ້ນຕໍເຊັ່ນ: ການປູກຝັງ, ລ້ຽງສັດ ແລະ ການຄ້າຂາຍ-ບໍລິ ການ ຕາມແຄມເສັ້ນທາງເລກທີ 13 ໃຕ້, ມີຫົວໜ່ວຍທຸກລະກິດ ທີ່ມີຄວາມໝັ້ນຄົງ, ຍືນຍົງ ເປັນຕົ້ນ ໂຮງສີເຂົ້າທັນສະໄໝ, ໂຮງສີເຂົ້າຂະໜາດກາງ 3 ແຫ່ງ, ຫົວ ໜ່ວຍບໍລິການເຮືອນພັກ ແລະ ອື່ນໆ ທີ່ແໜ້ນໜາສົມຄວນ, ພື້ນຖານການຜະລິດຂອງປະຊາຊົນ ກໍມີຄວາມເຂັ້ມແຂງ ແລະກາຍເປັນທ່າແຮງທີ່ສຳຄັນ ເຊັ່ນ: ມີຄອບ ຄົວຕົວແບບຂອງບ້ານ, ຂອງເມືອງ, ການລ້ຽງໝູພັນຊີ້ນ, ລ້ຽງໄກ່ລາດ, ລ້ຽງງົວ, ຫັດ ຖະກຳສານຟອຍກ້ານພ້າວ, ມີເສັ້ນທາງຄົມມະນາຄົມ ທີ່ເຊື່ອມຈອດກັບບັນດາບ້ານ, ເມືອງ ໄດ້ຢ່າງສະດວກສະບາຍ, ມີຕະຫລາດຖາວອນ 1 ແຫ່ງ ແລະ ມີການບໍລິການຊື້-ຂາຍ, ການຊົມໃຊ້ລະບົບໄຟຟ້າຢ່າງທົ່ວເຖິງ. ດ້ານຂົງເຂດການສຶກສາ ມີໂຮງຮຽນອະນຸບານ 1 ແຫ່ງ, ປະຖົມສົມບູນ 1 ແຫ່ງ ແລະ ໂຮງຮຽນມັດທະຍົມ 1 ແຫ່ງ ທັງສາ ມາດເຂົ້າເຖິງດ້ານການບໍລິການເຕັກນິກກະສິກຳ, ການປູກ-ການລ້ຽງ, ປະຊາຊົນສ່ວນໃຫຍ່ໃນບ້ານພູຖ້ຳພວງ ມີອາຊີບຖາວອນໃນການດໍາເນີນກິດຈະການ ສະເລ່ຍລາຍຮັບ 12 ລ້ານກີບຕໍ່ຄົນຕໍ່ປີ.

ບ້ານພູຖ້ຳພວງ ມີພົນລະເມືອງທັງໝົດ 1.725 ຄົນ ໂດຍໄດ້ກໍານົດເອົາບ້ານດັ່ງກ່າວ ເປັນບ້ານເທສະບານ ແລະ ມີ 3 ບ້ານຂຶ້ນກັບຄື: ບ້ານໂອກາດ ມີພົນລະເມືອງ 911 ຄົນ, ບ້ານໂນນສະຫວ່າງ 763 ຄົນ ແລະ ບ້ານນາພະບາງໃຫຍ່ ຈຳນວນ 509 ຄົນ, ທັງ 3 ບ້ານນີ້ ແມ່ນໄດ້ເຊື່ອມໂຍງກັນ ແລະ ເປັນຈຸດສຸມໜຶ່ງ ດ້ານຂອດການບໍ ລິການ ຊື້-ຂາຍ ພ້ອມທັງມີການພົວພັນກັນ ແລະ ດ້ານອື່ນໆ, ຊຶ່ງກວມເອົາ 100% ຂອງມາດຖານ ແລະ ເງື່ອນໄຂສ້າງເປັນຕົວເມືອງນ້ອຍໃນຊົນນະບົດ.

ຂ່າວ-ພາບ: ວິໄລວອນ ສິດທິໄຊ