ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຜົນການກວດສອບສາເຫດປາຕາຍຈໍານວນຫລາຍຢູ່ວັງສະ ຫງວນໃນຂອບເຂດ 3 ບ້ານ ຄື: ບ້ານວັງໄຮ, ນໍ້ານົວ ແລະ ບ້ານນາແພ່ນ ເມືອງວຽງໄຊ, ແຂວງຫົວພັນ ທີ່ເກີດຂຶ້ນໃນອາທິດຜ່ານມານີ້ ອອກມາແລ້ວ: ສາເຫດແມ່ນເປັນຍ້ອນນໍ້າເປື້ອນທີ່ປ່ອຍອອກ ຈາກຟາມໝູແຫ່ງໜຶ່ງຢູ່ບ້ານເມືອງງາ ທີ່ຕັ້ງຢູ່ເຂດໃກ້ຄຽງ.
ທ່ານ ສໍສະຫວັນ ບານຄຳມີ ຫົວໜ້າພະແນກຊັບພະຍາກອນ ທຳມະຊາດ ແລະ ສິ່ງ ແວດລ້ອມ ແຂວງຫົວພັນ ໃຫ້ສໍາພາດຕໍ່ນັກວິທະຍຸກະຈາຍສຽງແຫ່ງຊາດລາວ ໃນວັນທີ 30 ມັງກອນນີ້ວ່າ: ຜ່ານການກວດກາຕົງຈິງຢ່າງລະອຽດຂອງເຈົ້າໜ້ທີ່ກ່ຽວຂ້ອງຂອງແຂວງ ແລະ ເມືອງ ສາມາດຢືນຢັນໄດ້ວ່າ: ສາເຫດທີ່ເຮັດໃຫ້ປາຕາຍຢູ່ 3 ບ້ານດັ່ງກ່າວ ແມ່ນເກີດຈາກນໍ້າເປື້ອນທີ່ປ່ອຍອອກ ຈາກຟາມໝູທີ່ຢູ່ໃກ້ຄຽງແທ້ ຍ້ອນເຈົ້າຂອງຟາມຈະນໍາເອົາໝູມາລ້ຽງໃໝ່ຈໍານວນ 2.000 ໂຕ ຈິ່ງອະນາໄມຄອກລ້ຽງແຕ່ອ່າງບໍາບັດນໍ້າເປື້ອນຂອງຟາມມີການຮົ່ວໄຫລສູ່ສາຍນໍ້າເຮັດໃຫ້ມີປາຕາຍເກີດຂຶ້ນ.
ຕໍ່ເຫດການທີ່ເກີດຂຶ້ນ, ພາກສ່ວນທີ່ກ່ຽວຂ້ອງໄດ້ລົງໄປເຮັດບົດບັນທຶກກັບເຈົ້າຂອງຟາມດັ່ງກ່າວ ເພື່ອໃຫ້ປັບປຸງອ່າງບໍາບັດນໍ້າເປື້ອນໃຫ້ໄດ້ມາດຕະຖານ ແລະ ໃຫ້ເຈົ້າຂອງຟາມຊົດເຊີຍປາທີ່ຕາຍໄປດ້ວຍການເອົາແນວພັນປາມາປ່ອຍໃສ່ວັງສະຫງວນຄືນໃໝ່. ຢ່າງໃດກໍຕາມ, ມາຮອດປັດຈຸບັນ ສະພາບນໍ້າຢູ່ວັງສະຫງວນໃນຂອບເຂດ 3 ບ້ານທີ່ມີປາໄດ້ກັບຄືນສູ່ສະພາບປົກກະຕິແລ້ວ.
Cr: ຂ່າວອອນລາຍ, ວສລ