ກອງປະຊຸມຮຽບຮຽງເນື້ອໃນຮ່າງກົດໝາຍວ່າດ້ວຍການຕ້ານການສໍ້ລາດບັງຫຼວງ (ສະບັັບປັບປຸງ) ໄດ້ຈັດຂຶ້ນໃນລະຫວ່າງວັນທີ 8-9 ກໍລະກົດ ນີ້ ທີ່ທ່າລາດ ແຂວງວຽງຈັນ ໂດຍການເປັນປະທານຮ່ວມຂອງທ່ານ ພັອ ພູທອນ ວໍລະເພັດ ຮອງປະທານກຳມາທິການກົດໝາຍ, ທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ແລະ ທ່ານ ວິໄລວັນ ບຸດດາຄຳ ຮອງປະທານອົງການກວດກາແຫ່ງລັດ, ເຂົ້າຮ່ວມມີທ່ານຮອງລັດຖະມົນຕີກະຊວງຍຸຕິທຳ, ທ່ານຮອງຫົວໜ້າຫ້ອງວ່າການສຳນັກງານປະທານປະເທດ, ທ່ານຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຄະນະທີ່ປຶກສາທາງດ້ານກົດໝາຍຂອງຄະນະປະຈໍາສະພາແຫ່ງຊາດ ແລະ ພາກ ສ່ວນທີ່ກ່ຽວຂ້ອງ.
ທ່ານ ພັອ ພູທອນ ວໍລະເພັດ ໄດ້ມີຄຳເຫັນກ່າວເປີດວ່າ: ພວກເຮົາຈະໄດ້ພ້ອມກັນຄົ້ນຄວ້າຄືນບັນດາຄຳເຫັນຂອງສະມາຊິກສະພາແຫ່ງຊາດ (ສສຊ) ແລະ ເລືອກເຟັ້ນເອົາຄຳເຫັນທີ່ມີເຫດມີຜົນປັບປຸງໃສ່ກົດໝາຍ ແນໃສ່ເຮັດໃຫ້ເນື້ອໃນຂອງກົດໝາຍມີຄວາມຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້, ເພື່ອຮັບປະກັນໃຫ້ບັນດາຄໍາເຫັນທີ່ ສສຊ ປະກອບໃສ່ກົດໝາຍສະບັບນີ້ ໄດ້ຮັບການຄົ້ນຄວ້າພິຈາລະນາຢ່າງຖີ່ຖ້ວນ ແລະ ເລິກເຊິ່ງນັ້ນ ຈຶ່ງຂໍສະເໜີໃຫ້ບັນດາທ່ານພ້ອມກັນຄົ້ນຄວ້າຕື່ມຕໍ່ບັນດາຄໍາເຫັນທີ່ສາມາດປັບປຸງໄດ້ ແລະ ບໍ່ສາມາດປັບປຸງໄດ້ນັ້ນ ຄະນະຮັບຜິດຊອບໄດ້ໃຫ້ເຫດຜົນພຽງພໍແລ້ວບໍ່ ຫຼື ຄວນຕ້ອງໄດ້ປັບປຸງຄືແນວໃດ ເພື່ອເຮັດໃຫ້ກົດໝາຍສະບັບນີ້ປະກາດໃຊ້ແລ້ວ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ.
ກອງປະຊຸມໄດ້ຮັບຟັງການສະເໜີ ແລະ ຄົ້ນຄວ້າຄຳເຫັນຂອງ ສສຊ ຕາມການປະກອບຄໍາເຫັນໃນຕອນເຊົ້າຂອງວັນທີ 18 ມິຖຸນາ 2024 ຢູ່ກອງປະຊຸມສະໄໝສາມັນເທື່ອທີ 7 ຂອງສະພາ ແຫ່ງຊາດຊຸດທີ IX ຈຳນວນ 24 ທ່ານ ແລະ ປະກອບຄໍາເຫັນສົ່ງໃຫ້ກອງເລຂາ 8 ທ່ານ, ໃນນີ້ກວມເອົາ 36 ມາດຕາ 77 ເນື້ອໃນ, ຈາກນັ້ນ, ຄະນະຮັບຜິດຊອບປັບປຸງກົດໝາຍວ່າດ້ວຍການຕ້ານການສໍ້ລາດບັງຫຼວງ ກໍໄດ້ຈັດກອງປະຊຸມຄົ້ນຄວ້າພິຈາລະນາບັນດາຄໍາເຫັນຂອງ ສສຊ ໃນຄັ້ງວັນທີ 20 ມິຖຸນາ 2024 ສາມາດປັບປຸງ 14 ມາດຕາ ກວມເອົາ 21 ເນື້ອໃນ, ສະເໜີຮັກສາໄວ້ຄືເກົ່າ 22 ມາດຕາ ກວມເອົາ 56 ເນື້ອໃນ ແລະ ໄດ້ລາຍງານຄືນຜົນການປັບປຸງຕໍ່ກອງປະຊຸມພິຈາລະນາ ຮັບຮອງເອົາໃນຕອນເຊົ້າຂອງວັນທີ 28 ມິຖຸນາ 2024 ດ້ວຍຄະແນນສຽງເຫັນດີ 93,18%.
ບັນດາຜູ້ເຂົ້າຮ່ວມກອງປະຊຸມ ໄດ້ສຸມສະຕິປັນຍາຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນກົດໝາຍດັ່ງກ່າວເພື່ອໃຫ້ສອດຄ່ອງກັບສະພາບຄວາມເປັນຈິງ, ຮັບປະກັນໃຫ້ບັນດາຄຳຄິດຄຳເຫັນຂອງ ສສຊ ທີ່ໄດ້ປະກອບໃສ່ຮ່າງກົດໝາຍວ່າດ້ວຍການຕ້ານການສໍ້ລາດບັງຫຼວງ (ສະບັບປັບປຸງ) ທີ່ຜ່ານການພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໄດ້ຮັບການຄົ້ນຄວ້າເລືອກເຟັ້ນປັບປຸງໃສ່ຮ່າງກົດໝາຍດັ່ງກ່າວໃຫ້ມີຄວາມຮັດກຸມ, ຈະແຈ້ງ, ສອດຄ່ອງກັບແນວທາງນະໂຍບາຍຂອງລັດ, ລັດຖະທຳມະນູນ, ກົດໝາຍອື່ນ, ສົນທິສັນຍາສາກົນ ທີ່ ສປປ ລາວ ເປັນພາຄີ, ແທດເໝາະກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ ແລະ ສາມາດຈັດຕັ້ງປະຕິບັດໄດ້ຢ່າງຍາວນານ.
ຈູດປະສົງຂອງກອງປະຊຸມເພື່ອລະດົມສະຕິປັນຍາ ຈາກທຸກພາກສ່ວນທີ່ກ່ຽວຂ້ອງກັບການຮ່າງກົດໝາຍແຕ່ລະສະບັບ ເພື່ອປັບປຸງໃສ່ຮ່າງກົດໝາຍຢ່າງຮອບດ້ານ ຈາກນັ້ນນໍາສະເໜີກອງປະຊຸມຄະນະປະຈຳສະພາແຫ່ງຊາດ ພິຈາລະນາ ກ່ອນນໍາສະເໜີ ປະທານສະພາແຫ່ງຊາດ ລົງລາຍເຊັນ ເພື່ອສະເໜີຕໍ່ ປະທານປະເທດ ປະກາດໃຊ້.
(ຂ່າວ-ພາບ: ກົງທະນູຄຳ ພິພັດເສລີ)
