ວັນທີ 4 ພະຈິກ 2022, ທ່ານ ສີ ຈິ້ນຜິງ, ປະທານປະ ເທດຈີນ ໄດ້ໃຫ້ກຽດກ່າວປາໄສໄຂງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 5 ຢ່າງເປັນທາງການ ໂດຍຜ່ານລະ ບົບອອນລາຍ ພາຍໃຕ້ຫົວຂໍ້: “ຮ່ວມກັນສ້າງອະນາຄົດທີ່ດີງາມກວ່າເກົ່າໃນການເປີດປະຕູສູ່ພາຍນອກ ແລະ ຄວາມຈະເລີນຮຸ່ງເຮືອງ” ເຊີ່ງທ່ານຊີ້ໃຫ້ເຫັນວ່າ: ການເປີດປະຕູສູ່ພາຍນອກ ແມ່ນກຳລັງຂັບເຄື່ອນທີ່ສຳຄັນແຫ່ງຄວາມກ້າວໜ້າຂອງອະລິຍະທຳຂອງມວນມະນຸດ ແລະ ແມ່ນເສັ້ນທາງທີ່ຕ້ອງເດີນຜ່ານແຫ່ງການພັດທະນາ ແລະ ຄວາມຈະເລີນຮຸ່ງເຮືອງຂອງໂລກ. ຈີນ ຈະຍຶດໝັ້ນນະໂຍບາຍພື້ນຖານແຫ່ງຊາດທີ່ເປີດປະຕູສູ່ພາຍນອກ, ຍຶດໝັ້ນຍຸດ ທະສາດເປີດປະຕູສູ່ພາຍນອກທີ່ຕ່າງຝ່າຍຕ່າງມີຜົນປະ ໂຫຍດ, ຍຶດໝັ້ນທິດທາງທີ່ຖືກຕ້ອງແຫ່ງເສດຖະກິດໂລກາພິວັດ ເພື່ອສ້າງໂອກາດໃໝ່ໃຫ້ແກ່ໂລກ ດ້ວຍການພັດທະ ນາໃໝ່ຂອງຈີນຢ່າງບໍ່ຢຸດຢັ້ງ.
ຈີນ ຈະສືບຕໍ່ຊຸກຍູ້ໃຫ້ບັນດາປະເທດໃນໂລກຮ່ວມກັນຊົມໃຊ້ໂອກາດດ້ານການຕະຫຼາດໃຫຍ່ຂອງຈີນ, ຊຸກຍູ້ໃຫ້ການຄ້າພັດທະນາແບບມີຫົວຄິດປະດິດສ້າງ ແລະ ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະ ພາບສູງ, ພ້ອມທັງຊຸກຍູ້ໃຫ້ບັນດາປະເທດ ແລະ ຝ່າຍຕ່າງໆ ຊົມໃຊ້ໂອກາດເປີດປະຕູສູ່ພາຍນອກແບບລະບຽບການ, ປະ ຕິບັດຍຸດທະສາດຍົກລະດັບເຂດທົດລອງການຄ້າເສລີ ເພື່ອເສີມຂະຫຍາຍບົດບາດເປັນເວທີທົດລອງສັງລວມແຫ່ງການປະຕິຮູບ ແລະ ເປີດປະຕູສູ່ພາຍນອກ.
ທ່ານກ່າວຕື່ມວ່າ: ຈີນຍິນດີຮ່ວມກັບບັນດາປະເທດ ປະຕິບັດລັດທິຫຼາຍຝ່າຍທີ່ແທ້ຈິງ, ເຕົ້າໂຮມຄວາມເຫັນທີ່ເປັນເອກະພາບກັນແຫ່ງການເປີດປະຕູສູ່ພາຍນອກທີ່ຫຼາຍກວ່າເກົ່າ, ຮ່ວມກັນຜ່ານຜ່າຄວາມຍຫຍຸ້ງຍາກ ແລະ ສິ່ງທ້າທາຍທີ່ມີຢູ່ໃນການພັດທະນາເສດຖະກິດທົ່ວໂລກ ເພື່ອນຳເອົາອະນາຄົດທີ່ສະຫວ່າງສະໄຫວໃໝ່ມາໃຫ້ແກ່ການພັດທະນາທົ່ວໂລກ ດ້ວຍການເປີດປະຕູສູ່ພາຍນອກ.
ສໍາລັບງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 5 ຈັດຂຶ້ນຢູ່ນະຄອນຊຽງໄຮ້ຢ່າງເປັນທາງການໃນລະຫວ່າງວັນທີ 5-10 ພະຈິກ 2022 ໂດຍມີຫລາຍກວ່າ 280 ຫົວ ໜ່ວຍທຸລະກິດທີ່ນອນຢູ່ໃນບັນດາ 500 ບໍລິສັດໃຫຍ່ລະດັບແຖວໜ້າຂອງໂລກຈາກ 145 ປະເທດ, ພາກພື້ນ ແລະ ອົງການຈັດຕັ້ງສາກົນນໍາເຂົ້າຮ່ວມ ເພື່ອໃຫ້ກາຍເປັນເວທີໃນການຊຸກ ຍູ້ສົ່ງເສີມການຊື້-ຂາຍສິນຄ້າ, ການສົ່ງ ເສີມການລົງທຶນ, ການແລກປ່ຽນວັດທະນະທຳ, ການເປີດປະຕູສູ່ພາຍນອກ ແລະ ອື່ນໆ.