ປັດຈຸບັນ, ສິນຄ້າຜະລິດຕະພັນລາວ ຖືວ່າມີຄຸນນະພາບ ແລະ ມາດຖານ ຢູ່ໃນລະດັບໜຶ່ງ ເຊິ່ງສັງຄົມໃຫ້ການຍ້ອມຮັບ ແລະ ຊົມໃຊ້ ເປັນຈຳນວນຫລາຍ ແລະ ໃນອະນາຄົດ ເຊື່ອວ່າຈະໄປໄດ້ດີ ກວ່ານີ້ ຖ້າປະຊາຊົນລາວບັນດາເຜົ່າຮ່ວມໃຈກັນສະໜັບສະໜູນຜະລິດຕະພັນລາວ, ຫລຸດຜ່ອນການນຳໃຊ້ຜະລິດຕະພັນພາຍ ນອກທີ່ມີສິນຄ້າລາວຢູ່ແລ້ວ ເຊິ່ງສິນຄ້າລາວໄດ້ຮັບການສົ່ງເສີມ ຢ່າງເຕັມທີ່ຈາກພາກລັດ ແລະ ເອກະຊົນ ເພື່ອຊ່ວຍໃຫ້ປະເທດ ຊາດ ຫລຸດພົ້ນຈາກສະພາບເສດຖະກິດ ກໍຄື ບັນຫາເງິນເຟີ້ ເຊິ່ງລັດຖະບານ ກໍຄື ກະຊວງອຸດສາຫະກຳ ແລະ ການຄ້າ ລວມເຖິງພາກສ່ວນທີ່ກ່ຽວຂ້ອງ ໄດ້ສຸມເຫື່ອເທແຮງຮ່ວມມືກັບຜູ້ປະ ກອບການ ແລະ ຜູ້ຜະລິດພາຍໃນຢ່າງຈິງຈັງ ເພື່ອສົ່ງເສີມການຜະລິດພາຍໃນ ໃຫ້ພຽງພໍຕໍ່ການຊົມໃຊ້ຂອງ ພໍ່ແມ່ປະຊາຊົນລາວ ໃນລາຄາທີ່ຖືກ ແລະ ມີຄຸນນະພາບ.
ປັດຈຸບັນ, ໃນງານວາງສະແດງຜະລິດຕະພັນຕ່າງໆ ແລະ ຢູ່ຮ້ານຄ້າຊັ້ນນໍາຂອງລາວ ແມ່ນພົບເຫັນສິນຄ້າລາວຫລາຍຂຶ້ນ, ລວມເຖິງປະຊາຊົນລາວຈໍານວນຫລາຍ ໄດ້ຮ່ວມແຮງຮ່ວມໃຈ ປ່ຽນພຶດຕິກຳການຊົມໃຊ້ ຈຶ່ງເຮັດໃຫ້ສິນຄ້າລາວພົ້ນເດັ່ນໃນປີ 2024, ແຕ່ກໍຍັງມີຫລາຍຄົນທີ່ຍັງບໍ່ເຫັນຄວາມສຳຄັນຂອງການສົ່ງເສີມຜະລິດຕະພັນລາວ ແຕ່ໄປນິຍົມຂອງນອກ ແລະ ໃຊ້ຜະລິດຕະພັນຈາກພາຍນອກ, ທັ້ງທີ່ປະເທດຕົນເອງກໍສາມາດຜະລິດໄດ້ ແລະ ມີຄຸນນະພາບເທົ່າທຽບກັນ.
