ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປັດຈຸບັນຮ້ານໂຮມຄາເຟຢູ່ບ້ານນາເລົາ ເມືອງໄຊ ແຂວງອຸດົມໄຊ ກາຍເປັນສະຖານທີ່ຫຼັກໃນການພົບປະ ແລະ ເປັນຈຸດນັດພົບຂອງຄົນທຸກໄວໃນສັງຄົມ ເນື່ອງຈາກມີຫລາຍຜະລິດຕະພັນໃຫ້ຜູ້ມາໃຊ້ບໍລິການໄດ້ເລືອກຊື້ ແລະເລືອກຊິມ ເປັນຕົ້ນກາເຟລາວ, ເຂົ້າໝົມເຄັກທີ່ຫລາກຫລາຍລົດຊາດ, ອາຫານຕາມສັ່ງ ປະສົມປະສານກັບວິວທຳມະຊາດທີ່ສວຍງາມ, ມີການຕົບແຕ່ງທີ່ທັນສະໄໝ ແລະການບໍລິການທີ່ປະທັບໃຈເປັນກັນເອງ ກາຍເປັນແຮງດຶງດູດໃຫ້ນັກທ່ອງທ່ຽວໃຫ້ຄວາມສົນໃຈເຂົ້າໄປສໍາຜັດ ແລະໃຊ້ບໍລິການເປັນຈໍານວນຫລາຍ.
ທ່ານ ນາງ ກິ່ງແກ້ວ ສຸກສົມບູນ ເຈົ້າຂອງຮ້ານໂຮມຄາເຟ ໃຫ້ສໍາພາດເຖິງແຮງບັນດານໃຈ ແລະ ແນວຄວາມຄິດໃນການເຮັດຮ້ານໂຮມຄາເຟ ວ່າ: ກ່ອນຈະມາເປີດຮ້ານໂຮມຄາເຟ ໂດຍພື້ນຖານແມ່ນເປັນຄົນນະຄອນຫຼວງວຽງຈັນ ແລະໄດ້ໄປທ່ຽວເຫັນຫຼາຍໆຮ້ານໃນນະຄອນຫຼວງວຽງຈັນທີ່ງາມ ທັນສະໄໝ; ພາຍຫຼັງສ້າງຄອບຄົວແລ້ວ ຈີ່ງໄດ້ຍ້າຍມາຢູ່ກັບຄອບຄົວທີ່ແຂວງອຸດົມໄຊ, ທໍາອິດແມ່ນໄດ້ຮຽນເຮັດເຂົ້າໜົມຢູ່ເຮືອນ ແລະ ໄດ້ໃຫ້ຄົນໃນຄອບຄົວຊິມກ່ອນ ເພິ່ນກໍວ່າມີລົດຊາດດີ ບວກກັບຕົນເອງກໍມັກຮັກໃນການເຮັດເຂົ້າໜົມ ແລະ ມັກກິນຂອງຫວານ, ຈຶ່ງເກີດມີຄວາມຄິດຢາກເປີດຮ້ານກາເຟທີ່ມີຄວາມທັນສະໄໝເປັນຂອງຕົນເອງ ແລະສາມາດຮອງຮັບແຂກພາຍໃນ ແລະ ສາກົນ ທີ່ເດີນທາງມາທ່ຽວ ຫຼືແຂກທີ່ເດີນທາງມາຈັດງານຕ່າງໆ ທີ່ແຂວງອຸດົມໄຊ ຈຶ່ງເກີດມີຮ້ານໂຮມຄາເຟນີ້ຂຶ້ນ.
ຈຸດເດັ່ນຂອງຮ້ານໂຮມຄາເຟແມ່ນເນັ້ນໃສ່ກາເຟລາວສົດຈາກປາກຊ່ອງ ແຂວງຈໍາປາສັກ ເຊັ່ນ: ອາລາບີກ້າ ມີທັງກາເຟຮ້ອນ- ເຢັນ-ປັ່ນ ພ້ອມເຂົ້າໜົມ ແລະ ອາຫານຕາມສັ່ງ, ນອກຈາກບໍລິການພາຍໃນຮ້ານແລ້ວ ຍັງມີບໍລິການນອກສະຖານທີ່ຕື່ມອີກ, ສໍາລັບລູກຄ້າແມ່ນມີທຸກກຸ່ມ ເປັນຕົ້ນນັກຮຽນ, ນັກສຶກສາ, ພະນັກງານ, ນັກທ່ອງທ່ຽວ ແລະ ຄົນຈີນທີ່ອາໄສຢູ່ແຂວງອຸດົມໄຊ. ປັດຈຸບັນຮ້ານໂຮມຄາເຟ ມີສາຂາດຽວ ໃນຕໍ່ໜ້າມີເປົ້າໝາຍຈະຂະຫຍາຍສາຂາຢູ່ນະຄອນຫຼວງວຽງຈັນ ແຕ່ຈະໃສ່ຊື່ວ່າ: ຮ້ານລູມຄາເຟ ເພື່ອແນໃສ່ໃຫ້ບໍລິການສັງຄົມໄດ້ຢ່າງທົ່ວເຖິງ.