ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຮໍ່າຮຽນເອົາຄຸນສົມບັດສິນທຳປະຕິວັດກໍ່ຄືຄຸນງາມຄວາມດີ ຂອງປະທານ ໄກສອນ ພົມວິຫານ ຜູ້ອຸທິດຕົນເພື່ອພາລະກິດ ປະຕິວັດ

ປະທານ ໄກສອນ ພົມວິຫານ ກໍາເນີດໃນວັນທີ 13 ທັນວາ 1920 ທີ່ ບ້ານ ນາເຊັງ, ເມືອງ ຄັນທະບູລີ ແຂວງ ສະຫວັນນະເຂດ ມາຮອດປີນີ້ເພີ່ນມີອາຍຸຄົບຮອບ 99 ປີພໍດີ. ເພີ່ນແມ່ນໜຶ່ງໃນບັນດາວິລະບູລຸດທີ່ສຳຄັນ ແລະ ດີເດັ່ນທີ່ສຸດຂອງຊາດລາວເຮົາ. ເມື່ອເວົ້າເຖິງປະຫວັດ, ຜົນງານ ແລະ ຄຸນງາມຄວາມດີຂອງເພີ່ນທີ່ມີຕໍ່ປະເທດຊາດ. ປະຊາຊົນລາວບັນດາເຜົ່າແມ່ນຮັບຮູ້, ຈົດຈໍາ ແລະ ຈາລຶກບຸນຄຸນ ຄຸນງາມຄວາມດີຂອງເພີ່ນໄວ້ຕະຫລອດມາ ແລະ ຕະຫລອດໄປ ເພາະຕະຫລອດຊີວິດຂອງເພິ່ນ ໄດ້ອຸທິດໃຫ້ແກ່ປະເທດຊາດ ແລະ ປະຊາຊົນລາວບັນດາເຜົ່າ ເພາະເພີ່ນເຮັດວຽກຢ່າງບໍ່ຮູ້ອິດເມື່ອຍໃນພາລະກິດຕໍ່ສູ້ກູ້ຊາດເພື່ອກອບກູ້ເອົາເອກະລາດຕ້ານການຮຸກຮານຂອງພວກລ່າເມືອງຂຶ້ນທັງແບບເກົ່າ ແລະ ແບບໃໝ່ທີ່ຍືດເຍື້ອຍາວນານ ຈົນສາມາດປົດປ່ອຍປະເທດຊາດ, ນຳເອົາຄວາມເປັນເອກະລາດ, ອິດສະຫລະພາບ  ແລະ  ຜືນແຜ່ນດິນອັນຄົບຖ້ວນມາໃຫ້ປວງຊົນລາວບັນດາເຜົ່າໄດ້ຢ່າງມີໄຊ ແລະ ສະຖາປະນາ ສປປ ລາວ ຢ່າງສະຫງ່າຜ່າເຜີຍໃນວັນທີ 2 ທັນວາ 1975 ຈາກນັ້ນເພິ່ນໄດ້ສືບຕໍ່ນຳພາປວງຊົນລາວທັງຊາດປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດເພື່ອກ້າວສູ່ຈຸດໝາຍສັງຄົມນິຍົມດ້ວຍທ່າກ້າວທີ່ໜັກ
ແໜ້ນ ແລະ ມີຜົນສຳເລັດຢ່າງຕໍ່ເນື່ອງ.

ປະທານ ໄກສອນ ພົມວິຫານ ຖືເປັນສັນຍະລັກ ແລະ ເປັນຫລັກແຫລ່ງແກ່ນສານຂອງຄວາມສາມັກຄີພາຍໃນພັກ ແລະ ພາຍໃນຊາດ, ຍາມໃດເພິ່ນກໍ່ເອົາໃຈໃສ່ສ້າງ ແລະ ເພີ່ມທະວີຄວາມສາມັກຄີປອງດອງລະຫວ່າງເຜົ່າ, ຄວາມເປັນປຶກແຜ່ນພາຍໃນຊາດ ແລະ ຄວາມເປັນເອກະພາບພາຍໃນພັກ, ເປັນຜູ້ນຳທີ່ມີຄຸນສົມບັດສິນທຳປະຕິວັດອັນສູງສົ່ງ, ມີທັດສະນະມະຫາຊົນກວ້າງຂວາງ, ເປັນຜູ້ນຳທີ່ດຸໝັ່ນ,ດຳລົງຊີວິດແບບງ່າຍດາຍ, ປະຢັດ ແລະ ບໍລິສຸດຜຸດຜ່ອງປອດໃສຂາວສະອາດ. ພ້ອມນີ້ ເພິ່ນຍັງເປັນນັກເຄື່ອນໄຫວສາກົນຜູ້ດີເດັ່ນ, ເປັນຜູ້ວາງແນວທາງນະໂຍບາຍ ແລະ ເປັນແບບຢ່າງປະຕິບັດແນວທາງການຕ່າງປະເທດ ຢ່າງຖືກຕ້ອງ ເຮັດໃຫ້ປະເທດລາວມີບົດບາດໃນເວທີສາກົນນັບມື້ສູງເດັ່ນຂຶ້ນ.

ປະທານ ໄກສອນ ພົມວິຫານ ແມ່ນລູກຮັກຫລານແພງຂອງປະຊາຊົນລາວບັນດາເຜົ່າແມ່ນ ຜູ້ນຳສູງສຸດຂອງພັກ-ລັດ ເປັນວິລະບູລຸດຂອງຊາດທີ່ມີຄວາມປີຊາສາມາດ, ສະຫລາດສ່ອງໃສ ແລະ ມີຄວາມສະດຸ້ງໄວ. ເພິ່ນເປັນທັງນັກທິດສະດີ ແລະ ພຶດຕິກຳ, ເປັນນັກປຸກລະດົມຂົນຂວາຍ ແລະ ເປັນນັກໂຄສະນາປາຖະກະຖາທີ່ດີເລີດ, ເປັນນັກຍຸດທະສາດ, ນັກອອກແບບນະໂຍບາຍ ແລະ ວິທີປະຕິວັດທີ່ສະຫລາດຄ່ອງແຄ້ວ.

ໃນແຕ່ລະປີພໍໃກ້ຈະຮອດວັນເກີດປະທານ ໄກສອນ ພົມວິຫານ ບັນດາກະຊວງ-ອົງການ ແລະ ແຕ່ລະທ້ອງຖິ່ນໃນທົ່ວປະເທດໄດ້ຈັດຕັ້ງປາຖະກະຖາເພື່ອຫວນຄືນມູນເຊື້ອຄຸນສົມບັດສິນທຳປະຕິວັດ ກໍ່ຄື ຜົນງານ ແລະ ຄຸນງາມຄວາມດີຂອງເພີ່ນທີ່ມີຕໍ່ປະເທດຊາດໃຫ້ຄົນຮຸ່ນຫລັງໄດ້ຮ່ຳຮຽນເອົາແບບຢ່າງ. ແຕ່ຄົງປະຕິເສດບໍ່ໄດ້ວ່າພະນັກງານ-ລັດຖະກອນຫລາຍຄົນໃນຫລາຍລະດັບນັບແຕ່ສູນກາງຮອດທ້ອງທີ່ຖິ່ນໄປຮ່ວມຮັບຟັງປາຖະກະຖາເພື່ອເອົາຂະບວນການເທົ່ານັ້ນ ຈຶ່ງບໍ່ສາມາດເຊື່ອມຊຶມຕໍ່ຄຸນງາມຄວາມດີ ກໍ່ຄື ການຮ່ຳຮຽນເອົາແບບຢ່າງແຫ່ງການເສຍສະຫລະ ແລະ ຄຸນສົມບັດສິນທຳປະຕິວັດຂອງ ປະທານ ໄກສອນ ພົມວິຫານ ໄດ້.

ດັ່ງນັ້ນ ເພື່ອສືບຕໍ່ເຈດຕະນາລົມຂອງປະທານ ໄກສອນ ພົມວິຫານ ໃຫ້ປະກົດຜົນເປັນຈິງ  ພວກເຮົາທຸກຄົນຕ້ອງຕັ້ງໜ້າຮ່ຳຮຽນ ແລະ ສືບທອດມໍລະດົກອັນລ້ຳຄ່າຂອງເພີ່ນທີ່ໄດ້ສ້າງໄວ້ ດ້ວຍການຕັ້ງໜ້າສືບຕໍ່ສ້າງບາດກ້າວບຸກທະລຸທາງດ້ານຈິນຕະນາການຢ່າງແຂງແຮງ ດ້ວຍການສັງລວມເອົາທັດສະນະແນວຄິດ, ຄຸນທາດການເມືອງ ແລະ ຄຸນສົມບັດສິນທຳປະຕິວັດຂອງເພີ່ນມາເປັນບ່ອນອີງ ແລະ ເປັນແບບຢ່າງໃນການຝຶກຝົນຫລໍ່ຫລອມຕົນເອງໃຫ້ກາຍເປັນສະມາຊິກພັກ-ພະນັກງານທີ່ດີເດັ່ນ, ເປັນແບບຢ່າງນຳໜ້າໃນພາລະກິດປະຕິວັດໃນໄລຍະໃໝ່ໃຫ້ບັນລຸຜົນຕາມລະດັບຄາດໝາຍທີ່ວາງໄວ້, ພ້ອມກັນເດັດດ່ຽວຢຶດໝັ້ນອຸດົມການກ້າວເດີນສູ່ຈຸດໝາຍສັງຄົມນິຍົມຢ່າງໜັກແໜ້ນ, ເປັນເຈົ້າການປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ຢຶດໝັ້ນການກໍ່ສ້າງພັກ- ພະນັກງານ ເພື່ອເພີ່ມທະວີຄວາມສາມາດກຳອຳນາດ, ລັກສະນະເປັນແບບຢ່າງນຳໜ້າ ແລະ ກຳລັງແຮງສູ້ຮົບຂອງພັກໃຫ້ສາມາດເຮັດສຳເລັດພາລະກຳປະຫວັດສາດ ແລະ ຕັ້ງໜ້າປະຕິບັດແນວທາງການຕ່າງປະເທດ ສັນຕິພາບ ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍກັບປະເທດເພື່ອນມິດຍຸດທະສາດ, ບັນດາປະເທດໃກ້ຄຽງ  ແລະ ປະເທດເພື່ອນມິດໃນທົ່ວໂລກ ເຊິ່ງແມ່ນຄວາມຈຳເປັນພາວະວິໄສ ເພື່ອສ້າງເປັນກຳລັງແຮງສັງລວມເຂົ້າໃນການສ້າງສາ ແລະ ພັດທະນາປະເທດຊາດໃຫ້ນັບມື້ຈະເລີນກ້າວໜ້າຢ່າງບໍ່ຢຸດຢັ້ງ.

ປະທານ ໄກສອນ ພົມວິຫານ ຍືນຍົງໃນພາລະກິດປະຕິວັດຂອງພວກເຮົາ ຕະຫລອດໄປ

ໂດຍ: ມົດແດງນ້ອຍ