ເກມຈີນພວມເຜີຍແຜ່ວັດທະນະທຳທີ່ດີເລີດຂອງຈີນໄປທົ່ວໂລກ
ເມື່ອເວົ້າເຖິງຊຸນຫງໍຄົງ, ຊາວເນັດທັງຫຼາຍຂອງປະເທດລາວອາດຈະຮູ້ຈັກກັນດີແລ້ວ. ຫວ່າງມໍ່ໆ ມານີ້, ເກມ 3A ສະບັບທຳອິດທີ່ຜະລິດຈາກຈີນທີ່ພາດຫົວຂໍ້ວ່າ “Black Myth: Wukong” ແມ່ນຫາວັດຖຸດິບຈາກນະວະນິຍາຍອະມະຕະເລື່ອງ “ໄຊອິວ” ຂອງຈີນ, “Black Myth: Wukong” ພໍອັບໂຫຼດບົນອິນເຕີເນັດກໍໄດ້ຮັບຄວາມນິຍົມຊົມຊອບຈາກລູກຄ້າຢ່າງຫຼວງຫຼາຍ. ຕົວເລກຂໍ້ມູນຈາກ Steam ທີ່ເປັນເວັບໄຊຫຼິ້ນເກມສະແດງໃຫ້ເຫັນວ່າ: ເກມຈີນດັ່ງກ່າວໄດ້ລຽງຢູ່ອັນດັບທີໜຶ່ງເປັນຫຼາຍມື້ລຽນຕິດ ໃນການລຽງອັນດັບເກມດີເດັ່ນໃນທົ່ວໂລກ.
ໃນນະວະນິຍາຍເລື່ອງ “ໄຊອິວ” ນັ້ນ, ຊຸນຫງໍຄົງເປັນພະຍານາວອນໂສພາ ຫຼື ລາຊາລີງທີ່ສວຍງາມໂຕໜຶ່ງ. ເປັນຫຍັງຊຸນຫງໍຄົງໄດ້ຮັບຄວາມນິຍົມຊົມຊອບຫຼາຍປານນີ້? ໂທລະພາບສາກົນຈີນ ຫຼື CGTN ຂອງວິທະຍຸໂທລະພາບສູນກາງຈີນ ຫຼື CMG ໄດ້ຈັດ ການສຳຫຼວດປະຊາມະຕິຕໍ່ຜູ້ໃຊ້ອິນເຕີເນັດທົ່ວໂລກ ເຊິ່ງຜົນການສຳຫຼວດໄດ້ສະແດງອອກມາຄື: ຜູ້ຕອບແບບສອບຖາມທົ່ວໂລກເຫັນວ່າ ເກມດັ່ງກ່າວໄດ້ສ່ອງແສງໃຫ້ເຫັນເຖິງຄວາມສາມາດອັນເຂັ້ມແຂງຂອງຈີນໃນຂະແໜງການຫຼິ້ນເກມອິນເຕີເນັດ ແລະໄດ້ພາໃຫ້ຊາວໂລກຕິດອົກຕິດໃຈຕໍ່ວັດທະນະທຳອັນເປັນມູນເຊື້ອຂອງຈີນ. ເກມ “Black Myth: Wukong” ໄດ້ຮັບຄວາມນິຍົມຊົມຊອບຈາກທົ່ວໂລກສະແດງໃຫ້ເຫັນເຖິງຄວາມມີສະເໜ່ຂອງວັດທະນະທຳຈີນ.
ໃນຖານະເປັນສື່ສຳພັນວັດທະນະທຳທີ່ພັດທະນາຂຶ້ນມາໃໝ່ຢ່າງໜຶ່ງ, ເກມມີພະ ລັງທີ່ແຜ່ກະຈາຍໄປສູ່ຂອບເຂດທົ່ວໂລກຢ່າງແຂງແຮງ. ກ່ອນໜ້ານີ້, ເກມຈີນຫຼາຍສະບັບ ເຊັ່ນ: “Genshi Impact” “Tower of Fantasy” ເປັນຕົ້ນ ກໍໄດ້ດຶງດູດຄວາມສົນໃຈຈາກທົ່ວໂລກແລ້ວ. ເກມ “Black Myth: Wukong” ໄດ້ຮຸ່ງເຮືອງຂຶ້ນເທື່ອນີ້ ໄດ້ສະແດງໃຫ້ເຫັນວ່າ: ເກມຈີນໄດ້ກາຍເປັນສື່ໃໝ່ໃນການເຜີຍແຜ່ວັດທະນະ ທຳທີ່ດີເດັ່ນຂອງຈີນ. ເກມ “Black Myth: Wukong” ໄດ້ເອົາວັດທະນະນຳອັນເປັນມູນເຊື້ອ, ວິຈິດຕະທັດແບບຈີນ ແລະ ເກມສະໄໝປັດຈຸບັນມາປະສານສົມທົບກັນ ເຊິ່ງໄດ້ກາຍເປັນການທົດລອງແບບໃໝ່ທີ່ປະສົບຜົນສຳເລັດ.
ເກມດັ່ງກາວໄດ້ປະສົມປະສານມໍລະດົກວັດທະນະທຳນາມມະທຳຂອງຈີນ, ທີມງານຄົ້ນຄວ້າຜະລິດເກມຍັງໄດ້ໄປທັດສະນະສຶກສາຢູ່ແຫຼ່ງທ່ອງທ່ຽວວັດທະນະທຳຫຼາຍແຫ່ງໃນທົ່ວປະເທດຈີນ, ໄດ້ຈັດເອົາແຫຼ່ງທ່ອງທ່ຽວທີ່ມີຊື່ສຽງຕ່າງໆ ເຊັ່ນ: ຄູຫາຢຸນກາງແຂວງຊ່ານຊີ່, ວັດຫຼິງຢິນນະຄອນຫາງໂຈ່ວແຂວງເຈີ້ຈ່ຽງເປັນຕົ້ນເຂົ້າໃນເກມ ດ້ວຍເຕັກນິກສະແກນພາບຕົວຈິງ ເຊິ່ງໄດ້ເຮັດໃຫ້ຮູບພາບໃນເກມງາມປານີດ, ເຮັດໃຫ້ຜູ້ຫຼິ້ນເກມໃນຂອບເຂດທົ່ວໂລກສາມາດສຳຜັດກັບວັດທະນະທຳທີ່ດີເລີດງົດງາມຕະການຕາຂອງຈີນໂດຍກົງ.
ເພື່ອເຂົ້າໃຈເນື້ອໃນເກມໄດ້ດີກວ່າເກົ່າ, ມີຜູ້ຫຼິ້ນເກມບໍ່ໜ້ອຍໄດ້ໄປຄົ້ນຫາ “ຕົ້ນກຳເນີດ” ຂອງລາຊາລີງໂຕນີ້ ເຊິ່ງໄດ້ໂພດນະວະນິຍາຍເລື່ອງ “ໄຊອິວ” ສະບັບພາສາອັງກິດ, ສະບັບພາສາຈີນ-ອັງກິດ, ສະບັບພາສາອີຕາລີ ແລະ ສະບັບພາສາແອັດສະ ປາຍ ເປັນຕົ້ນ, ຈົນມີບາງຄົນໄດ້ສະຫຼຸບວໍລະຍຸດ ແລະ ອິດທິລິດທຸກຢ່າງຂອງຊຸນຫງໍຄົງທີ່ເຄີຍໃຊ້ໃນປຶ້ມນະວະນິຍາຍເລື່ອງ “ໄຊອິວ”.
ສະຫຼຸບແລ້ວວ່າ, ເກມໄດ້ກາຍເປັນຂົວຕໍ່ທີ່ເຊື່ອມຕໍ່ຜູ້ຫຼິ້ນເກມທີ່ມີສະພາບວັດທະ ນະທຳຕ່າງກັນ ແລະ ປຸກຄວາມຢາກຮູ້ວັດທະນະທຳຈີນຂອງເຂົາເຈົ້າ. ດັ່ງຄຳເວົ້າຂອງເຈົ້າຂອງບລອກຫຼິ້ນເກມຊາວອາເມຣິກາຄົນໜຶ່ງທີ່ໄດ້ຕີລາຄາວ່າ: ການຫຼິ້ນເກມ “Black Myth: Wukong” ເຮັດໃຫ້ຜູ້ຫຼິ້ນສາມາດສຳຜັດກັບວັດທະນະທຳຈີນແບບມີສ່ວນຮ່ວມຢ່າງເຕັມທີ່.
ເກມເອເລັກໂຕຣນິກໄດ້ເຮັດໃຫ້ຈີນມີຊື່ສຽງໂດ່ງດັງຂຶ້ນໃນໂລກເກມ. ບໍ່ພຽງແຕ່ເກມ “Black Myth: Wukong” ເທົ່ານັ້ນ, ເກມ “Genshi Impact” ທີ່ເປັນເກມພະຈົນໄພໃນໂລກເປີດກວ້າງໄດ້ເພີ່ມປັດໄຈການເຊີດສີງ, ວັດທະນະທຳດື່ມຊາ ແລະ ສະຖາປັດຕະຍະກຳສະໄຕອ່າຍຮຸ່ຍຂອງຈີນ; ນາງອັບປະສອນ-ຢາງອີ້ຫວນ ໃນເກມ “Honor of Kings” ໄດ້ສະແດງໃຫ້ເຫັນເຖິງຄວາມງົດງາມຂອງຮູບແຕ້ມຝາຜະໜັງຕຸ່ນຮວງ… ເກມຈີນເຫຼົ່ານີ້ໄດ້ດຶງດູດຜູ້ຫຼິ້ນເກມຕ່າງປະເທດເປັນຈຳນວນຫຼວງຫຼາຍ. ນັກຫຼິ້ນເກມປະເທດຕ່າງໆ ໂດຍສະເພາະແມ່ນຜູ້ຫຼິ້ນເກມທີ່ເປັນຊາວໜຸ່ມ ໄດ້ສຳຜັດກັບວັດທະນະທຳຈີນໂດຍກົງ ໂດຍຜ່ານຈາກເກມທີ່ເປັນດັ່ງພາສາໂລກທີ່ໃໝ່ອ່ຽມນີ້ ເຊິ່ງໄດ້ພິສູດຄຳເວົ້າທີ່ວ່າ “ຂອງປະຈຳຊາດກໍເປັນຂອງໂລກເຊັ່ນດຽວກັນ” ແລະກໍເຮັດໃຫ້ພວກເຮົາໄດ້ເຫັນວ່າ ວັດທະນະທຳດີເດັ່ນຂອງຊົນຊາດ ກໍເປັນວັດທະນະທຳທີ່ດີເດັ່ນຂອງໂລກເຊັ່ນດຽວກັນ.
