ນັບແຕ່ຕອນເຊົ້າຂອງວັນທີ 29 ສິງຫາ 2023 ໄດ້ເກີດມີຝົນຕົກໜັກຕິດຕໍ່ກັນຫຼາຍຊົ່ວໂມງ ເຮັດໃຫ້ນ້ຳຫ້ວຍຫຼາຍສາຍເກີດມີນ້ຳປ່າໄຫຼຊຸ ແລະຍື່ງຖ້ວມເຮືອນຂອງປະຊາຊົນຢູ່ນະຄອນ ຫຼວງພະບາງ ບາງບ້ານ ໂດຍສະເພາະເຂດທີ່ມີພື້ນທີ່ຕ່ຳ, ສະເພາະບ້ານກົກງີ້ວ ໄດ້ມີເຮືອນຫຼາຍຫຼັງເກີດມີນ້ຳຖ້ວມເຂົ້າເຮືອນ ພາຍຫຼັງທີ່ເກີດເຫດການ ອົງການປົກຄອງບ້ານ ໄດ້ລະ ດົມກຳລັງຊາວໜຸ່ມ-ປ້ອງກັນ-ກອງຫຼອນພາຍໃນບ້ານ ສຸມໃສ່ຊ່ວຍປະຊາຊົນຍັບຍ້າຍເຄື່ອງຂອງທີ່ສຳຄັນ ໄວ້ບ່ອນປອດໄພ ທັງໄດ້ຊ່ວຍອະນາໄມເຮືອນພາຍຫຼັງນ້ຳໄດ້ຫລຸດລົງ. ທ່ານ ບຸນສົງ ຈິນດາລັກ ໄດ້ໃຫ້ສຳພາດໃນຕອນເຊົ້າຂອງວັນທີ 29 ສິງຫານີ້ ວ່າ: ໃນແຕ່ລະປີ ອົງການປົກຄອງບ້ານໄດ້ປະກາດໃຫ້ປະຊາຊົນ ພ້ອມກັນມີສະຕິເຝົ້າລະວັງສະພາບນ້ຳຖ້ວມ ທີ່ອາດຈະເກີດຂຶ້ນ, ສຳລັບສະພາບນ້ຳຖ້ວມທີ່ເກີດຂຶ້ນຄັ້ງນີ້ ເນື່ອງຈາກເກີດມີຝົນຕົກໜັກຕິດຕໍ່ກັນຫຼາຍຊົ່ວໂມງ ເຮັດໃຫ້ນ້ຳຫ້ວຍສອງສາຍເກີດມີນ້ຳປ່າໄຫຼຊຸ ແລະຍື່ງຖ້ວມເຮືອນຂອງປະຊາຊົນ ທັງເຂົ້າຖ້ວມພື້ນທີ່ທຳການຜະລິດ ເປັນຕົ້ນແມ່ນນາ, ປັດຈຸບັນສາມາດເກັບກຳຜົນເສຍຫາຍເບື້ອງຕົ້ນສຳເລັດ 50% ສ່ວນປະຊາຊົນທີ່ຖືກຜົນກະທົບ ໄດ້ອະນາໄມບ້ານເຮືອນຂອງຕົນສຳເລັດແລ້ວ 50%.
ນອກຈາກປະຊາຊົນບ້ານກົກງີ້ວ ຍັງມີບາງບ້ານພາຍໃນນະຄອນ ຫຼວງພະບາງ ໄດ້ຮັບຜົນກະທົບເລັກນ້ອຍ ແລະເສັ້ນທາງບາງເສັ້ນລະບາຍນ້ຳບໍ່ທັນ ເຮັດໃຫ້ເກີດມີນ້ຳຖ້ວມເສັ້ນທາງ ແຕ່ພາຍຫຼັງຝົນຢຸດຕົກ ສະພາບນ້ຳຫ້ວຍແຕ່ລະສາຍ ໄດ້ກັບຄືນບົກແຫ້ງເປັນປົກກະຕິ.
